Vietnam Vuanci Ṭhing Telh In Zungukbawi Minung 50 Renglo Thongthlak Ding In Hremnak An Pek Hna
=========
Vietnam ram ah Covid-19 zawtnak lio i vantlawng in an lak mi hna sin in tangka haltu hna eihmuarnak konglam he pehtlaiin minung 54 thongthlak ding in hremnak an pek hna tiah theih asi. Culak ah Vietnam Vuanci ṭhing le zungukbawi sang hna zong an i tel tiah an langhter chih. Biaceihzung nih Covid-19 zawtnak lio i Vanlawng in khuatlawng an lak mi hna sin in tangka minung 54 tluk nih an hal hna caah a tu bantuk in thongthlak an timh hnanak hi a si tiah an langhter.
Biaceihzung biakhiahnak hi Vietnam cozah eihmuar dohdalnak an kalpi lio a si caah Vietnam Vuanci ṭhing nih Covid-19 lio khualtlawng mi hna sin in dollar 900,000 tluk a cohlan caah kum 16 chung thongthlak ding in bia an khiah piak tiah theih asi. Hanoi khuapi ah zarhhnih chung an konglam ceih ansi hnu ah Vietnam Vuanci ṭhing telhcinh in zungukbawi minung 54 thongthlak ding in bia an khiah piak hna tiah an langhter.
Pakistan Ramkhel Kongkau Tonbiaruahnak Hmun Ah Bomb Puahkehnak A Chuak Minung 39 Nunnak Liam 200 Hliam An Tuar. July 30, ah Pakistan peng Khyber Pakhtunkhwa khua ah Islamic ramkhel party tonbiaruahnak (Meeting) an tuah lio ah bomb puahnak a chuak minung 39 nunnak liam 200 tluk nih hliam an tuar tiah ṭuanvo ngeitu hna nih an chim.
July 30, zanlei suimilam 4:00 tluk ah Pakistan peng Khyber Pakhtunkhwa khua i Islamic ramkhel party tonbiaruah (Meeting) tuahnak hmun ah mah tein nunnak lak aa tim mi nih bomb a puah sual caah minung 39 an thi 200 tluk nih hliam an tuar tiah an langhter.
Bomb puahkeh a chuaknak hmun in hliam tuarmi hna hi ambulance motor in Peshawar leh Timerera sii-inn pi ah an tlikpi colh hna. A tutiang in thilsual tuahtu hna hi theihfian khawh ansi rih lo tiah theih asi. Hi kong he pehtlaiin, JUI-F hruaitu Maulana Fazlur Rehman nih Vuanci Sharif le Inn hngaktu Chief Minister, Azam Khan hna cu hi thil cang mi hi ṭhate hlathlainak tuah ding in a nawl hna tiah an langhter.
Ukraine Ralkap Nih An Ram Khuachak Lei Ram Ah Teinak An Lak. July 28, ah Ukraine ralkap nih an ram khuachak lei ah Russia ralkap lak in teinak an lak tiah Ukraine zunguk ralbawi pakhat ṭuanvo ngeitu nih a langhter.
Hi konglam he pehtlaiin, Ukraine president Zalenskiy nih social network ah a ralkap nih ram an laak lio video tawi zong a langhter chih. Zaporizhzhya khuachak lei ram hmun cheukhat zong ah Ukraine president Zalenskiy nih a ralkap tampi a chiahchap cang hna tiah an langhter.
July 28, Ukraine le Rusiia karlak kahdohnak ah hin, Russia President Putin nih Ukraine kahdohnak cu a fak chin chin ko tiah a chim. sihmanhsehlaw hmunhma an laaknak in ṭhawl ka duh hna si ahcun caan raulo te ah ka deihter khawh hna tiah a chim ve.
Niger Ah Cozah Uknak Thlak Hnatlak Pi Tu Phu Nih An Tlaihkhih Mi An President Party Zung An Khangh Piak. July 27, khan Africa nitlak lei ram Niger ah ralkap hriamtlaiphu cozah uknak thlak duh mi cawlcanghnak hnatlak pitu hna nih an tlaihkhih mi an president party zung an khangh pin ah lenglei ah chiahmi motor zong an khangh chih tiah theih asi.
A tu dirhmun cun Niger cozah ralkap nih president Mohamed tlaitu ralkap hna cu an dirpi hna tiah an langhter. Kum 64 tluk upa president Mohamed hi Africa nitlak thlanglei ram misual hriamtlaiphu hna dohdalnak kongah hawihlei in a cawlcangmi a si tiah an chim. Niger president a tlaitu ralkap hna cu nitlak thlanglei ram ṭuanvo ngeitu Russia le United nations nih thlah ding in an nawl hna tiah theih asi.
Tlaihkhih tongmi Niger president hi tuni tiang misual ralkap phu hna kuttang ah a um rih. Asinain, a ngandamnak cu a ṭha ko tiah france foreign Vuanci nih a chim. France Foreign Vuanci Catherine Colonna nih Niger preaident le France president Mocron cu telephone hmang in pehtlaihnak an ngei kho tiah a langhter.
Manipur Kuki-Chin Nungak 2 Video Konglam Ah CBI Nih Hlathlainak A Laak Lai. India cozah ṭuanvo ngeitu hna le palik hna nih kan hnu Manipur Kuki-Chin nungak pahnih Meitei nih hnipuan lo in an chawh pimi hna video konglam ah cawlcanghnak a laak lo caah (CBI) nih hlathlainak ṭuanvo a laak lai tiah theih asi.
Union Home Vuanci (Minister) Amit Shah nih Manipur Kuki-Chin nungak pahnih hna konglam buainak (Case) hi Center Bureau of Investigation (CBI) nih thil cannak hmun Manipur palik kut in an lak lai i hlathlainak an kalpi lai tiah an langhter. Palik hna nih thilsual tuahtu minung 7 hi an tlaih cang hna. Culak ah video latu zong aa telchih tiah Union Home Vuanci (Minister) Amit Shah nih a chim.
Nawlngeitu cheukhat hna le mipi cheukhat hna nih Prime Minister Narendra Modi cozah nih Manipur buainak konglam ah cawlcanghnak zeihmanh alak lo caah BJP cozah hruaitu hna nih cawlcangnak an laak tiah theih asi.
Manipur Kuki-Chin nungak pahnih konglam hi Modi nih kan hnuzarh video a chuah hnu lawngah chim hram thok in thilsual tuahtu hna cu zuah ansi lai lonak kong zong a chim. Sihmanhsehlaw tuni tiangin Manipur buainak hmunhma hi voikhat hmanh tlawng lo tiah an langhter.