Paletwa Peng AA umnak Nghung Khua Vanlawng Kahnak ah Minung 7 Nunnak Liam!
============
Paletwa Peng, Nghung khua cu SAC ralkap nih raltuknak vanlawng le hriampi in nihin ah an kah caah khuachung ah Datsi a rak zuar mi minung pasarih an nunnak a liam i, khuami inn tampi zong a hrawh, tiah thawng kan theih.
Hi kong he pehtlai hin khuami pakhat nih, “Nihin suimilaam 1:00PM hrawng ah vanlawng in bomb voi thum a thlak. Hriam ngan zong an kah pah. Khuachung ah Datsi a rak zuar mi motor khal le a zultu hna pasarih an nunnak a liam,” tiah The Hakha Post ah a chim.
SAC nih vanlawng in a kahnak Nghung khua ah hin Rakhine hriamtlai AA hmun an khuar, tiah an chim. Nghung khua cu Daai hmunram chung ah a um mi a si i, atutan hi SAC ralkap nih SlDai hmunram chung vanlawng bomb thlaknak a voi hnihnak a tuah a si cang.
Paletwa Peng, Hong Khua Cu SAC Nih Raltuknak Vanlawng In Bomb A Thlak I Tualchung Mi 7 Nunnak A Liam. Chin ramkulh, Paletwa peng, Hong khua cu SAC ralhrang nih raltuknak vanlawng in bomb voi 3 tiang an thlakhnawh hna caah tualchungmi 7 an nunnak liam, khuasaknak inn zeimawzat aa rawk, tiah tualchungmi nih an chim.
January 29, zanlei suimilam 1:00 tluk ah SAC ralhrang nih Chin ramkulh, Paletwa peng, Hong khua cu kahdohnak zeihmanh umlo raltuknak vanlawng in bomb voi 3 tiang an thlakhnawh hna caah tualchungmi 7 nunnak liam, chungkhar khuasaknak inn zeimawzat a rawk, tiah theih a si.
“Zanlei suimilam 1:00 tluk ah thok in SAC nih bomb a kan thlakhnawh caah tualchung mipi cheukhat cu khua chungah lut ngamlo in ramtang hmunhimnak ah an zaam” tiah tualchungmi hna nih Khit Thit Media ah an chim.
Taungoo Pengkomh Ah Kum 28 Chung SAC Ralhrang Nih Umhmun An Khuarnak Sakhan 3 Cu An Chuahtaak. Karen National Union(KNU) humhaknak hmun Taungoo pengkomh Brigade 2 hmunram chung ah kum 28 leng SAC ralhrang nih umhmun an khuarnak sakhan 3 cu SAC ralhrang nih January 13, 14, 15 ah an chuahtaak hna, tiah KNU nih thawng an thanh.
SAC ralhrang nih an chuahtaak mi sakhan 3 hna cu Karen National Defence Organisation (KNDO) Battalion 4 le Brigade Special phu hna nih January 20 ah hmunhma thianhlimnak an tuah cang. Cu sakhan 3 cu 1995 in SAC ralhrang nih umhmun an rak khuar cang i, sakhan a chuahtaak mi SAC ralhrang pawl cu Bogaligyi khua lei ah hnulei an tolh, tiah KNU nih a langhter.
2024, January 29 ah Karenni Army(KA) ralbawizik Col. Bone Naing zong nih “Karenni ramkulh, Mawchi, Ywathit, Nanmekhon le Mese khuapi cu Karenni ralkap le ṭangṭi phu nih kan humhak cang, tiah RFA ah a chim.
Mohnyin Peng Khuate Hna Cu SAC Nih Hriamngan In An Kah Caah Tualchungmi 4 Nunnak Liam, 6 Nih Hliam An Tuar. Kachin ramkulh, Mohnyin peng khuate cheukhat hna cu SAC ralhrang nih hriamngan in an kah caah ngakchia 1 telhchih in tualchungmi 4 nunnak liam, midang 6 nih hliam an tuar, tiah Mohnyin peng KPDF battalion chungin ṭuanvo ngeitu pakhat nih Yangon Khit Thit Media ah a chim.
January 26, zing suimilam 9:30 tluk ah Nanmar ah umhmun khuarmi SAC ralhrang battalion 367 nih Nyaung Pin Thar khua cu hriamngan hmangin an kah caah tualchungmi 1 nunnak liam, midang 1 nih hliam a tuar, tiah theih a si.
Cu bantuk ṭhiam in January 27, ah Mohnyin peng, Nyaunglebin khua cu SAC ralhrang nih hriamngan hmangin an kah ṭhan caah kum 5 ngakchia 1 telhchih in tualchungmi 3 nunnak liam, midang 5 nih hliam an tuar, tiah kan theih.