Nihin Tonzang Khua Kahdohnak Ah Tualchungmi Pakhat Nunnak A Liam, Midang 3 Hliam An Pu
==========
Tonzang khuachung ah nihin August 2, zinglei ah kahdohnak a chuak ṭhan i kahdohnak ah cun sualnak ngei lo tualchung mi pakhat nunnak a liam pinah tualchung mi 3 hliamhma an pu, tiah theih a si.
Tuzing lei suimilam 4:00 hrawng in Chin ralkap phufonh le Tonzang khuachung ummi SAC ralkap hna cu an i kap i kahdohnak ngol hnu ah, Tonzang khuachung palik sakhan pawng ummi nupa hna cu cycle in an tlik lio ah, sakhan ummi ralkap nih an kah hna i Mualpi khuami Pu Mang Siang Cing(kum 27) cu a nunnak a liam.
Cu pinah a nupi cu a paw ah meithal kuan nih a hliamh caah sizung ah an kalpi, tiah theih a si. Kahdohnak a chuah lio ah hriamngan zong an puak i, cu hriamngan puakmi kuan choiper nih cun kum 8 le kum 12 ngakchia pahnih zong a hliamh hna, tiah theih a si.
Kalaymyo Thonginn In Minung 36 Nih Luatnak An Hmuh. Sagaing ramṭhen, Kalaymyo thonginn ah thongtla mi hna chung in nizaan August 1, minung 36 nih luatnak an hmuh, tiah theih a si. Myanmar ram pumpi hmunkip thonginn ah thongtla mi hna chung in SAC nih minung 7449 cu luatnak an pek hna. Cu chung ah Kalaymyo thonginn in minung 36 an i tel.
Kalaymyo thonginn in luatnak a hmu mi hna hi pa 31 le nu 5 an si. Luatnak a hmu mi chungah ramkhel lei thongtla an i tel le tel lo fiang tein theih an si rih lo. Minung 7,449 luatnak a hmu mi lakah thihdan pekmi cheukhat zong ngaihthiam an si, tiah theih a si.
Hlasak Thiam Lalngenpuii Tochhawng A Nunnak Liam. August 1, zanlei suimilam 3:40 tluk ah Mizoram hlasak thiam Lalngenpuii Tochhawng Aizawl Bethlehem sangah khuasa mi cu Aizawl Greenwood sii-inn pi ah a nunnak liam tiah theih asi.
Kum 51 simi Lalngenpuii hi damlonak dang dang ngei in, Greenwoood sii-inn UCU ah voitam ngei a zohkhanh cang mi asi. A tu a thihnak ruang zong hi (Kal) zawtnak in asi tiah an langhter chih.
Lalngenpuui thihnak kong he pehtlaiin, social media ah amah duhtu minung tampi nih an sianlonak le an uinak kong zong an langhter.
Kalaymyo Pengkomh Ah Kyats 20,000 Ca Hmankhawh A Si Lo Tiah PDF Nih Ralrin Pek. Sagaing ramthen Kalaymyo pengkomh chung ah mipi hna nih SAC cozah chuah thar mi Kyats 20,000 ca cu hman lo ding in an kham nak kong Kalaymyo pengkomh mipi hriamtlai phu PDF nih ralrin peknak thawng an thanh.
July 31 zinglei ah a thar chuak mi Kyats 20,000 ca cu dothlennak tuah tu phu nih a humhaknak chung ah luhpi lo dingin kham a si i a hmang mi le a luhpi mi kan in hmuh sual hna ah cun nan cung ah dan tatnak tuah dingin tinhtuahnak kan ngei tiah an langhter.
“Tuanvo kan i pek nak pengkomh kip ah kham a si. Hmundang cio zongah a tubantuk in an kham lai zumh a si, minung pakhat nih hi tangka a hman lio voi 3 kan hmuh ah cun upadi ning in dantat a si ko lai” tiah Kalaymyo pengkomh PDF tuanvo ngeitu pakhat nih a chim.
“Mipi sinin Kyats 20,000 ca a hmangtu kan hmuh sual hna ah cun a voi khat nak ah a tangka chuh in kan thleh lai, a voi 2 hnihnak ah ralrin kan pek lai i a voi thumnak ah upadi ningin dandat a si cang lai” tiah a chimchap.
SAC cozah nih Kyats 20,000 ca a chuah mi cu Bank, chawleh thal tuah mi le Non-CDM sin hna in a pek hna lai caah hi tangka cu mipi ralkap nih kan humhaknak hmun ah luh pi in hman khawh a si lai lo tiah thanhca chuah mi ah an langhter chih. NUG cozah zong nih a luan cia July 27 ni ah SAC cozah Center Bank nih Kyats 20,000 ca chuah ding cu kan co hlang lo tiah mipi sin ah thawngthanh nak a rak tuah. Credit: The Chin Post, Lungmili Post