Zualko: Kalaymyo Peng Ah SAC Ralhrang Vuaknak In Pyidawta Khuanu Pakhat A Thi!
==========
Sagaing ramṭhen, Kalaymyo peng, Pyidawta khua nu pakhat cu SAC ralhrang hna nih August 27 ah an rak vuaknak hliamhma in September 5 zaanlei ah a nunnak a liam tiah theih a si. Pyidawta khuami nu Do Deih Hoi (kum 30) cu a hawi nu he Kalaymyo lei an rak tlawn lio ah SAC ralhrang nih lampi ah an i cit mi motor cycle le phone, tangka bawm an lak piak hna hnu ah Nu Do Deih Hoi cu an vuak hlei ah tangka 50,000 le motor cycle le phone cu thaizing ah rak hlam ṭhan te tiah an ti hna tiah khuami pakhat sin in theih a si.
“A hliamtuar mi a fak ngai, cun motor cycle cu tangka 50,000 ken in rak hlam ṭhan te tiah an ti, vuak a tong mi nu cu thaizing ah motor cycle cu tangka 50,000 in va hlam ding aa tim nain, cu zingka rawl a ei lio ah a lu a fak, a hnakhaw in thi a chuah caah Kalaymyo khuachung siizung ah an chiah” tiah khuami nih a chim.
Kalaymyo siizung ah an thlop ko nain a dam kho hlei lo i, Mandalay siizung lei an kalpi lio September 5 zaanlei lampi ah hliamtuarnak hma in a nunnak a liam hi a si. Cu bantukin August 27 zong ah Kalaymyo in Tahan lei kalnak lam ah nu 2 cu SAC ralhrang nih motor cycle license ken lo ruang ah tiin tangka an rak hal bal hna.
“Kalaymyo Bogyoke lampi ah ralkap, palek pawl nih motor cycle license a um lo tiah tangka sing 5 an hal hna, atu kan pe colh uh, nan kan pek lo ahcun tlaihkhih nan si lai, sing 5 kan ngei lo, kan ngeih mi sing 3 hi la ko uh tiah kan ti hna i, an kan thlah ṭhan tiah tlaih a tong mi nih an chim.
Sagaing ramṭhen, Kalaymyo peng ah SAC nih uknak a lak hnu 2022 hrawng in SAC ralhrang nih Bogyoke lampi umkal mi hna checknak ah ralkap telh in Pyusawhti bu zong an i tel cang tiah khuachung mi sin in theih a si.
Kalaymyo Datsi Man A Fah Ruangah Falam Ah Datsi Man A Kai. Chin ramkulh, Falam khua datsi zuartu hna nih Kalaymyo lei in datsi an cah khawh ti lo ruangah Hakha lei in an laak mi an zuar chin, tiah theih a si.
August zarhkhatnak ah Kalewa in Maharmyaing lam cu caan karlak a rak pit i Mandalay in Kalaymyo leiah motor a kal kho ti lo. Mandalay lei in a rami cu Gangaw-Hakha lei lawng in an kal khawh caah Kalay le Falam lei datsi man a kai, tiah theih a si.
“Hakha in kan cahmi datsi hi Gallon khat kyats 16,500 in kan zuar, Kalaymyo i kan cahmi tu cu Gallon khat kyats 14,000 in kan rak zuar. Hakha lei i datsi kan laak hnu in dawr cheukhat ah gollon khat Ks 18,000 in 20,000 tiang a zuarmi an um,” tiah Falam khua um datsi zuartu pakhat nih Zalen ah a chim.
“Kalay ah datsi Gallon khat ah kyats 16,500 a si i diesel Gallon khat ah kyats 17,000 a phan. Hakha lei va cah a phu deuh,” tiah motor khaltu pakhat nih a chim ve. Datsi man a ṭum khawh rih hlei lo ruangah Kalay in Chin ram ah meh-hang le eidin phorhmi vialte zong an man an kai ngai hna, tiah theih a si.
Facang, chiti, pe le a dangdang eidin thil a zuartu pakhat nih cun, a hlan ah cun facang tun khat ah kyats 125,000 in an rak zuar i atu cu kyats 150,000 in zuar a hau cang. Lakphak hrai khat ah 1,000 in a zuarmi zong an um cang, tiah Zalen ah a chim.
Kalay peng ah facang a chuah ngainak hmun a simi Inkyinkhun, Tharyarkone le Letpanchaung khua zong ah facang a tlawm cang. A um chun hna zong a dih pah cang caah Kalay khuapi chung ah facang duh poh in cawk khawh a si lo, tiah theih a si.
CDF-Tonzang Battalion 2 Cu CDF-Tonzang Chungtel Sinak In Chuah An Si. CDF-Tonzang Battalion 2 cu CDF-Tonzang chungtel sinak in kan chuah hna, tiah September 5 ah CDF-Tonzang nih an cathanh an chuah.
Thado miphun cheukhat phu nih an ukmi CDF-Tonzang Battalion 2 nih CDF-Tonzang Battalion 3(Company 3) Company Commander Mang Mun Piang cu a sual lo bu ah Khuangkhan khua ah an tlaih i meithal zun 8 he an tlanhter hna hnu ah an thlah ṭhan. Asinain CDF-Tonzang Battalion 2 nih Mang Mun Piang cu an tlaih ṭhan i an thah, tiah CDF-Tonzang nih an langhter.
Thahnawnnak tiang in thil an tuahmi hi Zo miphun zei an kan rel lo a si caah Zo miphun CDF-Tonzang hruaitu hna nih kan cohlang hrimhrim lo. Cu ruangah CDF-Tonzang Battalion 2, Thado phu cu CDF-Tonzang chungtel sinak in kan in chuah hna, tiah CDF-Tonzang nih cun an langhter.
Mang Mun Piang cu a sual lo buin a sualnak kawl in thahnawnnak tiang a tuahtu CDF-Tonzang Battalion 2 cu 2023 September 5 ah a voihnihnak CDF-Tonzang chungtel sinak in kan hrawh cang, tiah CDF-Tonzang nih cathanh an chuah. Hi cathanh an chuahmi hi CDF-Tonzang Secretary Thang Suan Mung le CDF-Tonzang chimphuannak nawlngeitu theihpinak in an chuah mi a si. Credit: The Chinland Post