Kokang Hmunram Chung Ah Tualchung Mi 65 Nunnak Liam
============
Shan ramkulh chaklei, Kokang hmunram ah 1027 Operation chung ah tualchung mi 65 an nunnak a liam, tiah Kokang ralkap MNDAA nih nihin December 28 ah an thanh.
Sualnak ngei lo tualchung mi a thimi hna cu SAC ralkap hriamngan ruang ah a thimi an si i minung 66 nih hliam an tuar. December 26 ni ah SAC ralkap hriamngan kahnak in Lauktonekote khua tualchung mi pahnih zong an nunnak a liam, tiah MNDAA nih cun an langhter.
December 25 ni zong ah Kokang Tonechain sang chung Hoang Kum Hotel pawng ah SAC ralkap nih hriamngan an kah ruang ah tualchung 8 an thi i minung 25 hliam an pu.
MNDAA telh in chaklei hriamtlai phu thum hna nih 1027 Operation an kalpi thla hnih chung ah Shan ramkulh chaklei khuapi 9 an laak khawh i Operation kahdohnak chung ah ralkap nih hriamngan le raltuknak vanlawng an hman ruang ah Shan ramkulh hmunkip in tualchung mi 130 leng an nunnak a liam cang, tiah an thanh.
Tedim Khuapi Khah-Lah-Yah 269 In Second Corporal Pakhat Hriamnam He Mizapi Sin Ah Aa Ap.Chinram chung Tedim khuapi hrambunh Khah-Lah-Yah 269 in Second Corporal pakhat cu a hriamnam he nizan December 27 ni ah Sagaing ramṭhen, Pale peng mizapi ukhruaitu phu sin ah aa ap, tiah Pale peng mizapi ukhruaitu phu in ṭuanvo ngei nih an thanh.
Khah-Lah-Yah 269 in Second Corporal Wai Lin cu MA 3 pakhat, kuanbawm 5, kuanfang 150, 40mm bomb lung 10, kutcheh bomb 1 i put in Pale peng mizapi ukhruaitu phu sin ah cun aa ap, tiah theih a si.Hriamnam he mizapi sin ah aa fonhmi Second Corporal Wai Lin cu Pale peng mizapi ukhruaitu phu nih tangka kyats sing 100 an pek, tiah theih a si.Credit : The Chin Post