Zu Chia Din Sualnak In Mipi Ralkap 2 An Nunnak A Liam
=========
December 22, khan mipi ralkap 2 cu Chin ramkulh, Thantlang peng, Sopum khua ah zu cawk dingin an va kal i an tlun hnu ah an hawi le 2 hna he hmunkhat ah an ding ṭi hna, minung 4 lak ah 1 hi hraikhat a din ah a luak colh i, a dang 3 nih tam deuh an din manh tiah theih a si.
Zu chia tam deuh dingmi 3 hna cu an dirhmun a ṭhat lo caah sii-inn ah an kalpi hna i culak ah Gabriel hi Farrawn khua an phak ah a nunnak liam, a dang 2 lak ah 1 hi Tio sii-inn an phakpi hnu ah sii-bawi te nih a thihri tiang a hrawn dih cang caah a nunnak kan chanh kho lai lo anti i kan va laak tlawmpal ah a nunnak liam ve, 1 tu cu a tu hi zohkhenh cuahmah lio a si thalcamnak in bawmhchanh cio hna usih. An din mi zu an cawknak le an laaknak zong kan hlathlai liopi a si. Zu chia hmangin Min Aung Hlaing nih a kan doh cang i ralrin tak tak kan hau.
Matupi Khuapi Ah Non-CDM Fimchimtu Nu 2 Le Fim Cawmg Liomi Ngakchia 4 SAC Ralhrang Nih An Tlaih Hna. December 22, khan Chin ramkulh, Matupi khuapi Siangsangrun ah Non-CDM fimchimtu nu 2 le fim cawng liomi ngakchia 4 cu SAC ralhrang nih an tlaih hna tiah theih a si.
Zei ruangah dah SAC ralhrang nih an tlaih hna ti cu kan chim fiang kho lo nain Matupi khuapi ah a ummi SAC ralhrang cheukhat cu khuapi chuahtaak in an zaam caah a tu bantuk in an tuah mi zong hi a si tiah an langhter. A tu tiangah cun fim cawng liomi ngakchia 4 an tlaihmi hna hi zei ruangah dah an tlaihkhih hna ti le catlang zeizat a cawng liomi dah ansi ti zong fianghlang in kan thei kho lo tiah an chim.
Mizoram ah Cozah Zung Baoh In Phaisa Sing 11 Leng A Fir Tu Myanmar Mi le Mizo Mi pakhat An Tlaih Hna. December 21 zaan ah Deputy Commissioner of State Tax Office, Mamit cu baoh a a rak si i, a baoh tu hna cu December 22 suimilaam 2 hrawng ah palek nih Aizawl ah an tlaih hna.
Zung baoh in Phaisa fir tu hna hi Zothanpuia, Mamit vengthar kum 18 le Alex Vanlalhruaia, Letpanchawng Kalay, tu Mamit Chhinga sang ummi kum 27 hna an si tiah theih a si. An pahnih hin Aizawl hotel pakhat ah an phan i, VIP room an hlaan, an room in nuai 4.35 hmuh a si hlei ah an zaampi mi tangka in an cawkmi guitar, thilri, suimilaam, mobile phone etc.. hmuh a si fawn. Palek FIR nih an langhter ning ah cun Deputy Commissioner of State Tax Office ah hin safe ah chiahmi dihlak professional tax khonmi Rs. 1,100,500 le OE Rs 30,000 a tlau.
ZZLMS,CDF Mindat,CDF-KKG,CNDF Le PDF Phukomh Hna Nih Gangaw Peng Myittha Tidil Um SAC Sakhaan An Laak. Magway ramthen,Gangaw peng Myittha tidil um SAC sakhaan pakhat cu ZZLMS,CDF Mindat,CDF-KKG,CNDF Le PDF Phukomh Hna Nih nihin December 22 zinglei sang ah an laak tiah theih a si.
Myittha tidil ah hmun a khuar mi hna hi Gangaw khua hrambunh SAC IB 50 i ralkap an si tiah theih a si i dothlennak ralkap phukomh hna nih an laak hnu ah SAC ralkap cheukhat cu an zam caah an hnuzul in an dawi lio hna tiah theih a si.
“Jet fighter in bomb lungthum a rak thlak, Gangaw SAC hmunpi zong in hriamngan in kah a rak bawmh hna,tidil chung ah lunghnih a puak,kanmah lei zong in aa hliam mi an um ve” tiah CDF KKG in rian ngeitu pakhat nih Zalen ah a chim.
Myittha tidil SAC sakhaan laak kahdohnak ah CDF-Mindat in the column commander (Sitkyaughmu) Tamlingha a nunnak a liam tiah CDF Mindat ralkap pakhat nih a chim. Myittha sakhaan laak a si hnu ah Gangaw khuachung ah ralhraang hna motor 6 khat in an i chawk hna tiah Gangaw khuami sin in theih a si.