ZRA Nih CDF-Tonzang Cu Remnak Kan Ser Lai Tiin An Hlen Hna Hnu Ah Tonzang Khua Ah ZRA Pawl Umhmun An Khuar
=========
Zomi Revolution Army (ZRA)nih CDF-Tonzang cu remnak kan ser hna lai tiin an hlen hna hnu ah Tonzang khua chung hmun dangdang ah ZRA pawl cu umhmun an khuar hna tiah CDF-Tonzang tuanvo ngeitu pakhat nih a chim.
“ZRA lei nih rem deihnak ser ding in bia kan i ruah hna lai tiah phone in an kan chawnh mi cu kan cohlan hna, nain ralthuam le hriamnam i ken lo dingin kaphnih lungtlin nak kan nei, a si nain ZRA lei an rat lo caah kan tuah thai lo” tiah CDF-Tonzang upa pakhat nih an chim.
“Kap hnih i ton ding ni caan a phak tik ah ZRA lei an rat ti lo tikah an kan hlen kan theih than, a si nain RC biaknak lei lutlai cu an chawnh hnu ah Tonzang khuachung Tower tung ah ZRA nih an thantaar (flag)an thlai pin ah Meithah nak zung ah umhmun an khuar, zanlei sang hna ah cun khuachung ah mipi aa chok mi hna zong an tuk velh hna”tiah CDF-Tonzang chimphuannak nawl ngei tu Salai Thang Suan Mung nih a chim.
Kaphnih remdeihnak tuah ding a si lai caah tiin CDF-Tonzang nih khua luh lai ah sentari conghnak Gate chiah mi zong an dinhdorh piak hna mi cu ZRA nih caan tha ah i lak in a thli in khua chungah luh le umhmun tiang an khuar hi a si.
ZRA lei nih a voi hnihnak remdaihnak tuah dingin an chimhchonh than hna mi zong a karlak ah ZRA hna cu Tonzang khuachung luh khawhnak lam an rak kawltu a si. “ZRA 30 cu a thli in Tonzang khuachung ah an rak lut, an luh ni thum hnu ah kan i tongthan hna lai tiah an rak kan chimh than i kan cohlan than hna, mah lio ah an rak kan hlen timi a ruah awk kan rak thei lo i a hnu ah kan hngalh than. Cu nithum chung lila ah cun ZRA 20 cu Tonzang khuachung ah an rak lut nolh than.”tiah a cunglei upa nih a chimchap.
Aluan cio August 31 lio ah Tonzang khua he meng 2 tluk aa hlatnak caan karlak CDF-Tonzang sakhan pakhat cu ZRA le SAC ralhrang nih an luh hnawh hna caah Drone, eidin, hriamnam le thil dangdang hna cu ralhrang lei nih an rak lak piak hna tiah theih a si.
CDF-Tonzang Battalion 3 A Luhhnawhtu ZRA Cu Teirul Kan Cham Hna Lai – CDF-Tonzang. SAC ralkap he i bawm in CDF-Tonzang Battalion 3 sakhan a luhhnawhtu ZRA cu teirul kan cham hna lai, tiah CDF-Tonzang nih September 5 ah an thanh.
“ZRA doh dingin CDF-Tonzang hi kan rak dirhmi a si lo, SAC ralkap doh ding tu ah a si. Asinain kan sakhan an kan luhhnawh caah kan doh ve hrimhrim cang hna lai,” tiah CDF-Tonzang Secretary Thang Sun Mung nih a chim. Zomi Revolutionary Army(ZRA) cu anmah hmunram kilven khawhnak ca ah rak dirhmi hriamtlai phu a si tiin rak pompiak an si ko nain SAC ralkap he an i fonh caah anmah doh ve cang dingin an itimhnak kong CDF-Tonzang nih an langhter.
August 31 ah CDF-Tonzang Battalion 3 sakhan cu ZRA le SAC ralkap i bawm in an rak luhhnawh ruangah CDF-Tonzang ralkap pakhat a nunnak a liam i Drone 2, 60mm zun khat, 40mm zun khat, RPG zun khat, meithal kuan 1,000 hrawng le cycle 7 an rak chuh hna.
September 1 ah ZRA nih an rak thanh ning ah mizei hriamtlai poh Zomi hmunram in chuak u, tiah an rak langhter. ZRA ah hin ralkap 200 hrawng an um i ramri hngaktu ah SAC ralkap he an i bawm. SAC ralkap nih hriamnam zong in an bawmh hna, tiah CDF-Tonzang Secretary nih a chim. ZRA cu Chin ramkulh chaklei Tedim le Tonzang peng ah hrambunh in SAC ralkap a doh cuahmahtu CDF sakhan cheukkhat an rak kah pinah CNA le CDF he zong aa kap tawnmi an si.
CDF-Tonzang Battalion-2 Cu CDF-Tonzang Sinak In An Chuah Hna. Thado phu cheukhat hna khuakhan lairelnak tangah a cawlcang mi CDF-Tonzang Battlion-2 hna nih CDF-Tonzang Battlion-3 in phuthen (3) lutlai Pu Mang Mon Piang cu sualnak a neih lo pin ah buainak chuah ter duh ah Kingkaan khua an um lio ah an tlaih. An tlaih mi Pu Mang Mon Piang cu meithal zun 8 in an tlanh ter hna hnu ah an thlah than.
CDF-Tonzang Battalion 2 aa timi Thado phu pawl nih Pu Mang Mon Piang cu uah in an tlaih than i a nunnak dih tiang dantatnak an pek. Cu bantuk tuahser nak cu Zo cithlah a si mi CDF-Tonzang hruaitu upa vialte nih kan duh lo i kan lung a fak. Cucaah CDF-Tonzang Battalion-2 aa timi Thado phu pawl cu CDF-Tonzang ralkap sinak in an chuah hna nak kong cu CDF-Tonzang aiawh in chungtuan tu Thang Suan Mung le CDF-Tonzang chimphuannak nawlnei tu nih thawng thanhnak kan tuah tiah CDF-Tonzang nih September 5 ah thanhca an chuah.
Sualnak ngei lo Pu Mang Mon Piang a that tu CDF-Tonzang Battalion 2 aa timi Thado phu pawl cu September 5 thok in a voi 2nak CDF-Tonzang ralkap sinak in kan in chuah hna tiah CDF-Tonzang nih an langhter chih.
Kum 2 Chung Ah Chin Ramkulh Um SAC Ralhrang Sakhan 9 An Lak Khawh. SAC ralhrang nih uknak lak hnu in kum 2 chung Chin ramkulh ah ralhrang umhmun khuarnak sakhan 9 lak a si cang tiah Ministry of Defence-NUG nih September 7 ah a langh ter. Mipi ralkap nih SAC ralhrang kum 2 chung a dohnak le a cawlcangh nak cu NUG nih langh ter in thanhca an chuah hi a si.
Hi kum 2 chung kahdohnak ah Chin ramkulh chungah SAC ralhrang sakhan lak lio kahdohnak he telh in voi 550 kaphnih kahdohnak a chuak. Myanmar rampi huap in SAC ralhrang sakhan 135 lak a si cang. Hakha-Falam kar Chuncung khua ah CNA le Chin ralkap ṭangṭi phu nih ralhrang raltuknak EE-9 Cascavel motor Tank 2 an hrawh mi kong zong NUG nih a langhter chih.
Chin ramkulh ah ralhrang sakhan 9 an lak mi kong cu NUG nih fiang in a langhter lo nain, Thantlang sakhan, Lungler sakhan, Mindat peng Makuinu sakhan, Matupi peng ralram ralhrang sakhan pakhat, Falam peng Vaar sakhan le Tonzaang khua Darkhaing sakhan hna cu Chin ralkap nih an lak hna. Mah pin ah SAC ralhrang nih Chin ramkulh ah inn 1,630 renglo an khangh i Sagaing le Magway ramthen chungah inn an khangh mi a tam bik tiah Dalta for Myanmar nih August thla lio ah a langh ter. Credit: Lungmili Media