Global Zotung Supreme Council Nih CDF-Zotung Cu Ralrin An Pek Hna
============
CDF-Zotung nih Zotung hmunram ah minung lungthin pu loin thil an tuahmi cu Global Zotung Supreme Council(GZSC) nih faak piin kan doh i kan cohlang hrimhrim lo, ralhrang phu pakhat an si. Hi hnuah Zotung hmunram um tualchung cung ah kutthlak in thil an tuah le a phunphun in hrocernak an tuah ṭhan ahcun faak piin kan lehrulh hna lai, tiah an thanh.
Global Zotung Supreme Council(GZSC) cu hramhram uknak a dongh tiang doh ding le Federal rampi ser khawh nakding ah CNF/CNA he i bawm in doh a thleng i rian a ṭuan cuahmahmi kan si pinah mizapi an him nakding ca ah GZSC cu dirhmi a si, tiah an langhter.
GZSC in a chuakmi CDF-Zotung nih Zotung hmunram ah chek gate an tuah i khualtlawng mi hna cu ngunkhuai an khawlh hna leng ah khuate zong ah ngunkhuai an khawlh hna. Sualnak ngei lo tualchung mi hna tlaihkhihnak, tukvelhnak le hriamnam in tlerhkhawnnak a phunphun an tuah, tiah an cathanh ah cun an langhter.
GZSC nih an langhter ning ah CDF-Zotung an thil tuahmi lakah ngaih a chia khunmi cu lungrual tein a um komi tualchung mi karah rem lonak thil an tuah hi a si. Anmah he lung aa khat lomi paoh cu an ṭhawl dawi hna. Nu hna zong hual loin an tuk an velh hna i an tlerhkhawn hna.
Cu pinah Zotung hmunram Yansi khua B.E.H.S sianginn ṭhen ah ca a cawngmi siangngakchia Lung Ṭhung, Cung Lian Uk, Bawi Khan Lin le Romin Thang hna cu an tlaih hna i an tuk an velh hna. Tualchung mi cheukhat an tlaihmi hna zong atu tiang an thlah rih hna lo, tiah an langhter. CDF-Zotung nih siangngakchia pali an tuk an velh hna tiin GZSC nih cathanh an chuahmi ah an tuk an velh hnanak a ruang an langhtermi a um lo.
Kanpetlet Khuachung Le Khuate Dihlak Tluk Kan Humhak Khawh Cang – CDF-Kanpetlet. Chinram, Kanpetlet khuachung le khuate dihlak tluk cu kan humhak khawh cang, tiah CDF-Kanpetlet chimphuannak nawlngeitu pakhat nih a chim. “Kanpetlet khuachung ah SAC ralhrang pawl cu an i chawkvak ngam ti lo, sianginn zong an hung ngam lo, khuachung ummi cheukhat hmanh zalong te in an um ngam lo, khua pawngkam ah hmunhma kan laak dih i kan uk khawh ṭhan cang pinah khuate lei zong kan humhak khawh dih ti tluk a si” tiah a cunglei upa nihcun a chim.
SAC ralhrang pawl cu Kanpetlet khuachung um pengukzung, BEHS sianginn, Yangaung pura le penguk fimcawnnak zung lawng ah umhmun an khuar kho cang, tiah a langhter. A luancia October ni 20 ah CDF-Kanpetlet nih khuachung um SAC ralhrang pawl nih umhmun an khuarnak cu an luhhnawh hna i an kahdoh hna caah ralhrang 2 an thi. Mah pinah hliampu mi zong an tam, tiah CDF-Kanpetlet nih thawngthanhnak an rak tuah.
Kanpetlet khuachung ah SAC ralhrang le CDF-Kanpetlet kap 2 karlak kahdohnak faak a chuak tawn caah tualchung mi dihlak ti nawn cu ral an zaam i chungkhar 20 hrawng lawng an taang cang, tiah CDF-Kanpetlet in chimphuannak nawlngeitu nih a chim chap.
Kanpetlet khuachung ah kahdohnak faak deuh in a chuak kho ṭhanmi a si caah tualchung mi zong SAC ralhrang nih umhmun an khuarnak ne anmah he naihniam ah umkal lo ding in CDF-Kanpetlet nih ralrin peknak zong an tuah. Milu 5,000 leng le inn 1,200 tluk a umnak Kanpetlet khuami hna cu Magway peng, Saw khua leng ramtang le dum hna ah ralzaam in an i dornak kum 3 a tling deng cang, tiah theih chih a si.
India Lei In A Rami Chin Kuki Liberation Army Cu CDF-Tonzang Nih An Kah Hna. Chin ramkulh, Tonzang peng, CDF-Tonzang battalion 2 nih a humhaknak hmunram chung simi Thansi khua le Santone khua hna ah India lei in a rami Chin Kuki Liberation Army(CKLA) nih tualchung mi hna cu tlerhkhawnh in tangka an hal hna pinah an thilri tiang an chuh hna caah CDF-Tonzang battalion 2 le battalion 1 nih meithal kah in an ṭhawl hna, tiah kan theih.
CKLA hriamtlai phu nih CDF-Tonzang humhaknak hmunram chung cheukhat ah khualtlawng mipi hna cu meithal he an tlerhkhawnh hna i an thilri, tangka pawl an chuh hna pinah khuate cheukhat ah minung 1 ah India tangka Singnga (500,000), Singhra (100,000) hramhram in an khawlh hna caah CDF-Tonzang battalion 1 le 2 nih atu bantuk in kan kah hna hi a si, tiah CDF-Tonzang battalion 2 nih nizan October 26 ah cathanh an chuah.
CDF-Tonzang nih hmunhma zohfelnak (thianhlimhnak) kan tuah caah CKLA hriamtlai phu cu an zaam caah anmah chungtel 3 hna cu India ralkap nih an tlaih hna i, a dang pawl cu Manipur tiva lei ah vokkuang-lawng cit in an zaam caah CDF-Tonzang battalion 1 le 2 fonh nih kan kah hna i hliampu mi an tam, tiah an langhter. CKLA hriamtlai phu cu India ram mi Mr.Ngam Cha le Mr.Ja Mon hna 2 nih an hruai hna i, aluan ciami 2023, March 24, zan suimilam 10:00 tluk ahkhan Tonzang peng, Phaisat khua zong tangka an chuh hna tiah CDF-Tonzang battalion 2 nih an langhter chih.
Chin Kuki Liberation Army(CKLA) phu hi India-Myanmar ramri hrawng ah umhmun khuar in a cawlcang mi phu an si, tiah naihniam in a ummi hna nih an chim. Kuki Chin miphun aiawh tu hriamtlai phu cu Kuki National Organization/ Kuki National Army (KNO/KNA) ralkap 1 lawng an si i, a dang hriamtlai phu pawl cu Kuki Chin miphun aiawh tu an si hna lo, tiah tualchung hriamtlai phu le Kuki mizapi nih an chim.
Kyunku Peng Pyusawhti Ralhrang Sakhan Le SAC Ralhrang Motor Kahdohnak In Ralhrang 9 An Thi. Tanintharyi ramṭhen, Kyunku peng Pyusawhti ralhrang sakhan le SAC ralhrang motor kahdohnak in ralhrang 9 an thi tiah Tanintharyi peng mipi ralkap nih an langhter.
October 24, zaan suimilam 12:00 tluk khan Kyunku khua hmai Pyusawhti ralhrang sakhan cu Tanintharyi peng mipi ralkap, Palaw ပုလော le Kyunku peng mipi ralkap phufonh nih luhhnawh in an kah inn zeimawzat an khangh piak hna tiah theih asi.
Cupin ah October 25, zinglei suimilam 11:51 tluk khan Myeik peng Taungpuh khua pawngah a rak chuak mi SAC ralhrang motor 1 cu. Tanintharyi peng mipi ralkap, Palaw le Kyunku peng mipi ralkap phufonh nih ankah caah ralhrang 9 an thi tiah theih asi.