Zeiruang dah CDF Le MDF an i remh kho lo?
=========
2022 kumthawk, CDF-Mara le Mara Army rak fonh le cang ka in, Mara mipi biachahnak zei ah a rello mi upa pakhat pahni ruang ah atu bantuk dirh hmun hi kan phan mi cu asi. Hi upa pawl an min tthenkhat hi cu aherh ah cun a hnu deuh ah ka rak langhter te lai.
Cu lawng silo in CJDC ah a um cia mi MPC/ CDF- Mara ( Atu MDF) kusahle vialte cu CNF General Secretary Pu Thla Hei nih, CJDC member 18 biachahnak tello in CDF-Mara min hlun a dirhpi mi pahni pathum cu chihkhat caah tiah a cohlang hna. Cu lio ah biakamh nak atuah ter mi lak ah thlathum chung ah Mara ram chung ah SAC nan doh hrimhrim lai arak ti.
Cu tlinter an duh caah thalthum a tlin lai ni hnithum hrawng ah MEC nih a dirh mi COME school le Lailenpi High School Library hna mei in an rak khang hrulh i cun lamhlat pi in SAC Camp cu voi khat hnih hrawng an rak kap. Cu ti te cun CJDC ah cun mi nupi thit cia mi a chuh mi bang hmunhma cu an rak coh nak kha asi ko. Cu cu biadik le biahman asi i zeitik poh ah chim ding mi asi peng lai.
Mara mipi nih dirh mi MTC/ MDF cu CJDC in an hlawnh hnu mi 200 renglo traning kainak ding cahh AA lei ah pehtlainak a thar in an rak tuah tthan kha asi. CJDC ah kha rak pomh hna sehlaw CNA nih apek mi ah an kai ding khi an si.
M. Cu cu kan duhpi zong a si fawn. MTC/MDF nih cun CJDC hawikomhnak ah um kha an duh lo silo i CJDC hruaitu CNF GS nih Veto power hmang in a rak hlawnh mi tu kha asi deuh. MDF nih Chin Arm forces ah rak um ve ding kah a saduh thah bik mi zong a si ko. A si nain an ruah ning bang a si tilo caah chihkhat cu an ngei zong achiat ngaingai.
Cu ni thawk in C. Laiki nih a umnak Rangon in a lih le hrawkhrawl in atu CC VP Bawi Kung (Bieko) he an i bawmh i Online ah aphun phun in MTC/ MDF cu he tiah an doh. MDF le CDF karhlak huatnak thlaici a tuhtu zong an si tikhawh a si. Hi pa hi atu a fale vialte SAC ralhrang siang inn ah a kaiter ko hna i Mara ram chung CDM atuah lo mi pawl atthiphai peng rih mi pa zong a si.
Cu lio ah atu an hruaitu C. Laiki nih MTC/ MDF a țanhtu poh cu an umnak hmunhna hriim ah that u law dawi dih hna u tiah tlang a rak au caah Malaysai Kuala Lumpur ah MDF supporter pawl Sportday caah an chiah mi Volleyball tung le an thilri vialte cu zantim ah CDF tanhtu pawl nih an rak hrawk piak dih hna. Cu ruangah cun CDF-Mara tanh tu mi tam pi nih MDF tantu pawl cu Kuala Lumpur khualai park chungah i vel ding an rak Challenge hna. A sinain an ni ruatning silo in an mah tu ceihlak an phomh hna.
Cu lio hrawng thiamthiam cun USA Maryland um CDF supporter hna nih MDF supporter pa i a Motor thar pakhat cu lung in an rak denh piak hoi. Police nih tlaih ding a si cang ko nain a ngeihtu pa nih kan mah le kanmah asi caah tiah a ngaithiam i a luat mi kha asi.
Cu hnu tlawmpal ah Vauhrawng nih an GS pa Pu Tetlô cu zumh ngai in bia an rak hal hawi. Law kumkhat hmanh adih lo mi pi kha Online ah cun Law Degree zong an ngah ter dih zong kha kan theih. CDF tuanbia a pelte hmanh atheilo mi pi cu Vaurawng nih he tiah Interview an tuah cemmam i a ruahnak bak in an chim ter i mipi nih nan hei zumh ngai mi kha asi.
Cu hnu tlawmpal ah Chin mi kan ni lungrual a hau ti phun khin a buai lio mi Mara mi karhlak remdaih nak biatu chim i tim lo in CBCUSA pi nih CDF-Mara cu meithal zunnli cawknak an rak bawmh hoi ai. Cu hnu cun MDF huatnak le kawl ralhrang an doh duhlo e, cu e, Chin state in kan chuah lai anti e, India lei pawl he an i komh e Mara state kan dirh lai an ti e tiah aphunphun cu Lai Media nih lih bia cu he tiah an aupi caah mi tampi nih an zumh ve hawi i atutiang an zumh rih mi zong an um.
MTC/ MDF nih kum 2 chung remhnak tuah ding open letter in siseh, chawnbiaknak in siseh, nitlak lei MADC upa, Biaknak upa le NGOs pawl hmalaknak in Peace talk Committee voi hnih tiang dirh in hma an lak nain CDF nih zeitik hmanh aduh ballo caah, kan hnu thla ah khan East Maraland Peace Talk Committee zong cu dinhternak cathanh an tuah cang. Cu ka ah an tail mi cu remhnak aduhlo mi hi CDF an si i remhnak aduhlo mi cu Mara miphun kan ral asi ti tiang an langhter.
Lailenpi Camp an kap hlan ah khan Chapi khua, India Mara ram ah Peace talk Committee nih CDF leader pawl C. Laiki hruaimi pawl cu a hnubik tawnnak an ngei. Cu lio ah MTC/ MDF nih i remhnak kan duh caah bu min thar siseh, Leader position siseh, Alliance kan tuah mi siseh kan ni remhnak ding asi poh cun kan remh kho ko lai ti mi bia cu an i phorh i tonbiaruahnak cu an ngei. An leader C. Laiki nih aduh lo caah an meeting an dihter i an tlung.
Cu hnu a thazing kiptu ah cuka aa tel ve mi CDF upa thenkhat nih MTP president Pu Pakhaw cu Saiha ah an va tong i C. Laiki nih aduh lo zongah kanmah tal cu kan duh an rak ti i cu bia cu MDF General Secretary sin zong an rak chim caah remhnak tuah ding in MTC/ MDF lei nih he tiah an hngak thaim rih hna. Cu ve bantuk cun peace talk committee zong nih an hngak ve nain bia le hla thar um lo in an um. Cu lio ah CNA le CDFs he Lailenpi camp cu an vun lak tikah MTC/ MDF chawnbia ding cu a ruat hrim an ruatlo mi kha asi. A fawinak in chim ah cun kum 2 chung remhdaihnak tuah ding aduh ballo mi hi CDF-Mara hi asi ti cu Mara mipi nih kan theih mi asi.
Kan hnu lei deuh ah MDF nih Lailenpi camp an rak kap bal lio ah ralhrang he pehtlai phun in a um mi kha an mah CDF-Mara lila tu an rak si caah MDF nih ralkap a kah lio ah an duhlo nak cathanh zong an rak thanh mi kha asi. CNA nih Lailenpi kha kap rih hla sehlaw Lailenpi SAC le CDF-Mara cu hawikomh thatuk an si canglai tiah tualchung mi nih an ti len kha kan theih. An duh bik mi cu atu Hakha te hna himte in a um bantuk te khin Lailenpi zong him tein um seh ti kha asi ko. Idea cu aa khat dih tiah ka ruat caah an mawh ve lo tiah ka ruah. I remh hna seh tiah na duhtak maw?
Atuhi i remh hna hlaseh titu nih Meithal, le chawva thazang he CDF lei tanh in MDF doh ding ah a dirhkamhtu bu zeimawzat an um caah an i remh ding nak in i doh nak lamtu a tam deuh tiah ka ruat. MDF a kal nak poh ah CDF le ahawi hna nih Embush an tuah asi kaw methal aa tlai veve mi nih cun an i kap lo ah zeidah, an i kup bal lailo ti cu zaapi nih thei cia mi kha asi ko.
Cu caah i remh hnaseh tiah nan duh taktak ah cun CDF lei zong tanh lo MDF leizong țanh lo tein chikhat hawikomh sinak in rak dinhter chung u law, nan mah le nanmah remhnak van tuah ta u ti in Mara ram in chikhat te van kan chauk tak rih ulaw, cu ti cun Mara upa pawl nih Meithal zunkhat puak lo bak in thlakhat, thlahnih chungah remhnak kan tuah khawh ko lai. Cu tik ah Chin mipi zong kan i lawmh lai i kan ni lungrual deuh lai.
A leng lei budang nih diplomatic lam lei tu in van bawmh cio law chikhat te in an i rem ko lai tiah ka zumh. Hi kong pehtlai in catial cawk asi lo i chimding tampi aum. Podcast phun in chim nak um sehlaw ka duh ngai. Hi tuanbia details deuh in biahal na duh ah cun hal khawh ka si ko. Credit: Maipa Khaimichho