Zahan Kepong ( Malaysia ) Operasi Nih Chinmi 20 Hrawng An Tlaih Hna. Zahan February 16,2024 zantim hrawng ah khan Malaysia Kepong ah tlaihkhihnak an tuah i Chinmi tam ngai an tlaih hna tiah theih a si.
Zahan zantim ah Malaysia cozah nawlngeitu hna nih Chinmi umnak inn chung ah an luh hnawh hna i Chinmi minung 20 hrawng an tlaih hna tiah kan theih.
Chinmi lawng si loin a dang ramdang mi zong tampi an tlaih hna. Minung zeizat an tlaih hna cu fiang in theih a si rih lo.
Malaysia cu tlaihkhihnak fak piin an tuah cuahmah lio a si. Hmunkip ah zanfatin operasi an lut. Cu caah Chinmi ralring tein um i zuam zungzal hna usih.
Thawngpang dang: SAC ralhrang nih an chuahmi ” People’s Military Service Law of 2010 ” phung thar he pehtlai in Chinram hriamtlaiphu CNA, CDF-Mara le CDF -Kanpalet hna nih Chin mino hna mipi ralkap lut ding in sawmnak cathanh an chuah.
Khuapau dothlennak kum 3 chung ah SAC ralhrang nih a ralkap thazaang ningcang loin a hman i ralkap thar a khawmhsuat khawh tilo caah kumtling mizapi cu ralkap luh ter in ralphaw ah hman a duh hna caah a tubantuk in phung thar a chuah hi a si, tiah CNF nih a chim.
SAC ralhrang nih hramhram in ralkap luhternak in nan luat khawhnak ding caah le limhang a ngeimi mipi ralkap nan si khawhnak ding caah nan mah he nan i neihniamnak sakhan le bu sin i fonh in mipi ralkap kan ṭhawn ter hna lai tiah CDF- Kanpalet Kkei Sing sakhan in rianṭuantu pakhat nih a chim.
SAC ralhrang hna cu sungh lei an panh cang caah a tubantuk in ralkap thar an khawmh hi a si, cucaah Mara ram kilven ding in le federal democracy ramthar kan ser khawhnak ding caah Mara mino hna mipi ralkap tintaan kai ding in kan in sawm hna, tiah CDF-Mara nih cathanh an chuah.
SAC ralhrang nih Kanpalet peng, Kyindway khua cozah zung hna ah umhmun khuar i mipi ralkap hna he kahdohnak a um lengmang caah khuami hna cu a himnak hmun ah thlakhat tluk ral an hrial cang, tiah theih a si.