Yangon Ramṭhen, Peng Cheukhat Ah SAC Ralhrang Lut Dingin Min Cazin He An Auh Cang Hna.Yangon ramṭhen, peng cheukhat um sangkip ah SAC ralhrang nih SAC lut ding ah min cazin an chuah cang i, a min aa telmi mino paoh cu sang khuabawi zung ah an auh hna. Cu hnu ah hman an thlak hna i Form nan phit lai tiin sang khuabawi nih theihternak a tuah hna, tiah tualchung mi hna sin in theih a si.
2024, March 14 ah min langhter a duh lomi tualchung mi nu pakhat nih “Kannih sang zong ah mino 19 hna cu sang khuabawi zung ah an auh hna i an min cazin ṭialmi catlap an hmuhter hna. An min aa tel caah hmanthlak 4 le Form phit ding an peek hna i, a ngandam mi nan sinak kong sii-chek nan si lai” tiah an ti hna nakkong cu BVJ ah a chim.
SAC ralhrang nih atu bantuk in mino an auhnak hna hmun pawl cu Shwepyitha, Hlaingthaya le Mayangon pengchung um sang cheukhat in an thok, tiah theih a si. Lungmili Post
Thawngpang dang: Assam Rifle Nih Myanmar Lei Phurh Ding Walkie Talkie Tam Ngai An Tlaih! Assam Rifle le Mizoram palik ṭangṭi hna nih cu Mizoram, Siaha peng, Siahatla sang ah Walkie Talkie set 175, India phaisa in ₹ 2,600,000 man hrawng cu March 11 ah khan an tlaih.
Walkie Talkie hi Siaha in Myamar ramri lei ah phurh ding in timhtuah a si i, Palik le Assam rifle nih motor chekhlatnak an tuah lio ah an tlaih hna.
Walkie Talkie ngeitu ah puh mi pahnih zong tlaih colh an si i, phungning tein kherhhlai ding ah palik sin ah an ap hna. Walkie talkie an tlaih mi hi ahote sin pek ding ti cu an chim lo nain mipi ralkap sin ah pekchanh ding a si lai, tiah zumh a si. The Chin Post