Yangon Khuachung Hmunli Ah Bomb A Puak!
=========
Yangon khuachung, Yankin palek sakhaan pawng telh in North Okkala, Sorth Okkala, North Dagon, hmunli ah, August 29 zaan ah bomb a puak tiah People Spring News nih a chim. “Zan 8:30 ah Yankin peng, Kanbeh lampi cung um Myomya palek sakhaan pawng ah bomb a puak. A puah thawng a thang tak. Bomb a puahnak hi Yankin myomya palek sakhaan le hngakchia siizung karlak a si. Minung hliam a tuar mi an um lo, Bomb a puak hnu ah palek le ralkap tampi an ra tiah khuachung mi pakhat nih a chim.
“Cun, zaan sml 9:00pm hrawng ah Northokkala peng sang no(10), Northokkala peng Khemati lamcung le East Dagon sang 115 lei zong ah bomh a puak. North Okkala Thitsa lam lei ah bomb a puahnak hmun lei ah palek sakhaan pakhat a um. Bomh a puah hnu ah North Dagon peng Thitsa lam le Tuhmingalar lamton, North Okkala peng Khemarti lamcung le East Dagon Shwepauhkam lam kar ah a umkal mi an check hna tiah khuachung mi nih an chim tiah theih a si.
Mah Operation cu KMD 18- UG (Crow Squad) in Nwe Oo Aunglam min in Operation an tuah mi a si. Yangon khuachung ah SAC ralkap uknak ngei kho lo ding in tuah mi a si, Mipi lei zong nih dohthlennak ah ṭangrual ṭi ding le ralkap he aa naihnak hmun ah um lo ding in KMD 18- Under Ground (Crow Squad) nih thawngthanhnak a tuah.
Hramhram In Uknak Lak A Si Hnu Ah Mipi 1,300 Leng An Thah Hna. Myanmar ram ah hramhram in uknak lak a si hnu thawk in mipi thahnak thil sining 400 leng a cang i cu chung ah a thi mi 1,000 leng an um tiah Equality Myanmar nih cathanh a chuah.
2021 July in 2023 March thla tiang mipi thahnak thil sining 441 a cang i cu chung ah minung 1,363 an thi tia Equality Myanmar nih August 28 ah a thanh. Myanmar ramchung peng le ramṭhen kip ah a cang mi a si i Bangladesh ram, Kawbaza ralzaam camp ah a um mi zong a ing mi lak ah an i tel ve tiah an chim. A thi mi a cheu leng hi pa an si i a tang mi hi nu le kum 18 tang hngakchia telh in, nu le pa thleidan khawh rih lo mi ruak le pum tlamtling lo pawl zong an i tel tiah an langhter.
Atu bantuk in mipi a that mi hna hi SAC ralkap le amah leiṭang mi pawl leng ah PDF pawl nih an buar mi cheukhat zong a um ve tiah Equality Myanmar nih an chim. PDF nih an buar mi thil sining he pehtlai in fehter a har ngai rih tiah an chim.
SAC ralkap le amah leiṭang phu pawl nih an buar mi mipi thahnak chung ah meithal in kahnak, mei in khanghnak le lu tannak, hriamngan nih khen ruang le hramhram in tlaihhremnak hna zong an i tel tiah an langhter. Atu langhter mi report hi NUG telh in vawlei cung hmun kip ah a um mi Nuhrin Covo phu pawl sin ah kuat a si lai tiah an chim fawn.
Muse Peng Ah SAC Ralkap le TNLA Karlak Ah Kahdohnak A Fak, SAC Lei A Thi Mi An Tam. Shan ram, Muse peng ah SAC ralkap le Ta’ang National Liberation Army (TNLA) karlak ah kahdohnak a fak i SAC lei a thi mi an tam tiah Khit Thit nih a langhter. August 28 thawk in Muse peng chung ah SAC ralkap le TNLA karlak ah kahdohnak a chuak i SAC lei a thi mi an tam, August 29 zaanlei sml 3:46pm ah SAC nih vanlawng in Selan khua ah bom a thlak tiah theih a si.
“August 28 thawk in Muse ah TNLA le SAC ralkap karlak ah kahdohnak a fak. Kahdohnak thawng hi Muse khuapi ning in theih a si” tiah khuami pakhat nih Khit Thit ah a chim. Kahdohnak chung ah kaphnih lei a thi mi an um i SAC ralkap pawl cu TNLA sakhaan umnak Selan khua lei an panh tiah theih a si.
Pakokku-Yesagyo Lam Ah SAC Ralkap Mawṭaw Bom An Puah Hnawh Hna I 5 An Thi. Magway ramṭhen, Pakokku peng, Pakokku-Yesagyo lam ah a kal mi SAC ralkap mawṭaw bomrap an puah hnawh hna i 5 an thi tiah Young Force – UG nih thawng an thanh.
August 29 zinglei ah Pakokku in Yesagyo lei ah mawṭaw thlalang phit lo in a kal mi mawṭaw pakhat cu ralrin peknak ah bomrap an puah hnawh i mawṭaw a khen nain a thi mi an um lo, cubantuk in Pakokku in Yesagyo lei a kal mi SAC ralkap mawṭaw cu bomrap an puah hnawh ṭhan i 3 an thi tiah theih a si.
Cun August 28 zaan sml 8:00am hrawng zong ah Pakokku peng, Pandaichung khua in Pakokku khua lei a kir mi SAC ralkap mawṭaw cu bomrap lung 3 in an puah ṭhan tiah theih a si. Cubantuk bomrap puah hnawh nak cu Pakokku pengkomh B13, Shwe Nyar Mae PDF le Young Force UG hna an i bawm tiah theih a si.
Myaing Ah Palek Bawi Chang Le Corporal 1 Sniper In An Thah Hna. Magway ramṭhen, Myaing peng ni tlaklei khua chuahnak, Koesaung phungki sianginn gate a hngak mi palek bawi chang le Corporal cu Sniper in an kah hna i an pahnih ning in an thi tiah theih a si.
August 29 zinglei sml 7:00am hrawng ah atu bantuk in palek bawi chang cu gate a hngak mi palek le pyusawthi pawl bia a ruah hna lio ah Myaing PDF B01 nih Sniper in an kah i a hmun ah a thi Myaing PDF sin in thawng theih a si. Cu ni zaanlei sml 6:24pm hrawng zong ah Koesaung phungki sianginn gate cu an kah ṭhan hna i Corporal pakhat an khen caah a ril colh i adang ralkap pawl nih mins 10 hrawng meithal an thlah tiah theih a si.
Myanmar Ram Lemcang Minthang Daung Nih Dothlennak He Pehtlai In A Zumh Ning. A min a thang i hlawhtlinnak zong a hmu mi Lemcang minthang Daung hi atulio dothlennak ah a chungpi tiang aa teltum mi a si i a thiamnak lemcang lei in dothlennak caah Fund a kawl lengmang mi a si.
Daung aa telnak “ကျောက်ဖုရားမှဧရာ၀တီသို့” ti mi Series cu Thai ram muicawl puai ah laksawng a hmuh bantuk in လိပ်ပြာစံအိမ် muicawl zong a voikhatnak bik Netflix ah aa tel kho mi muicawl a si. Cubantuk in hlawhtlinnak a hmu mi nih a sinning dihlak in dothlennak ah aa teltum mi Daung a zumh ning kha RFA nih biaruahnak a tuah mi a si. Credit: The Chinland Post