Mindon Kahdohnak Ah SAC Lei 50 Nak Tlawm Lo An Thi!
=========
Magway ramṭhen, Mindon kahdohnak chung ah SAC lei 50 nak tlawm lo an thi tiah Thayet pengkomh PDF No.4 nih thawng an thanh. August 23 zinglei sml 8:00am ah Mindon peng, Kyowa khuate le Yuathit khuate karlak ah SAC ralkap pawl an rak lut ti mi thawngpang an theih caah PDF phu pawl nih timhcia tein bomrap he an bawh hna, hriamngan le meithal hna bawm in sml 3 deng kaphnih karlak kahdohnak a fak, SAC lei bomrap nih a puah hnawh hna caah tampi an i hliam i a tang mi ralkap pawl nih hriamngan bawm in an kah hna ve hna tiah an ṭial.
Kyowa khuate tlangcung in hriamngan kah an rak bawmh hna nain anmah lei SAC ralkap pawl cung bak ah hriamngan a tlak caah SAC ralkap 15 leng mithmuh ah an thi i khuami hna sin in thawng theih ning ah an zapi 50 leng an thi tiah Thayet pengkomh B04 nih a langhter ve. PDF pawl pawng ah hriamngan a tla ve ko nain an zapi him tein an kir kho tiah an langhter.
Kahdohnak chung ah Thayet pengkomh PDF B04, Student Armed Force, WOLF hna bawm in kahdohnak an tuah hi a si tiah theih a si. Kahdohnak a chuah dih hnu ah SAC ralkap pawl cu Yuathit khua chung ah lut in mipi eidin le mansung thilri pawl an fir, khuachung in a zaam lo mi khuami 5 zong an velh hna tiah theih a si.
Kani Peng, Nwachankone Khua Kahdohnak Ah SAC Squad Leader An Tlaih. Sagaing ramṭhen, Kani peng, Nwachankone khuate in a rak chuak mi SAC ralkap 25 le dothlennak phu pawl karlak ah kahdohnak a chuak tiah Chindwin Myay Division-PDF nih thawng an thanh.
August 20, Kani peng, Nwachankone khua in a rak chuak mi SAC ralkap 25 le dothlennak phu pawl cu Nwachankone hmunhma ah kahdohnak a chuak i SAC ralkap 1 a thi, Squad Leader 1 a nung in an tlaih tiah theih a si. An tlaih mi SAC ralkap Squad Leader sin in 40MM bom, kuan 250, kuanbawm 2 an lak khawh tiah theih a si. Kahdohnak chung ah ULF, KLG le Alpha hna an i bawm tiah theih a si.
Kani Peng, Nwachankone Khua Kahdohnak Ah SAC Squad Leader An Tlaih. Sagaing ramṭhen, Kani peng, Nwachankone khuate in a rak chuak mi SAC ralkap 25 le dothlennak phu pawl karlak ah kahdohnak a chuak tiah Chindwin Myay Division-PDF nih thawng an thanh.
August 20, Kani peng, Nwachankone khua in a rak chuak mi SAC ralkap 25 le dothlennak phu pawl cu Nwachankone hmunhma ah kahdohnak a chuak i SAC ralkap 1 a thi, Squad Leader 1 a nung in an tlaih tiah theih a si. An tlaih mi SAC ralkap Squad Leader sin in 40MM bom, kuan 250, kuanbawm 2 an lak khawh tiah theih a si. Kahdohnak chung ah ULF, KLG le Alpha hna an i bawm tiah theih a si.
Demoso Le Hpruso Lam Ah Kahdohnak A Fak. Kayah ram, Demoso le Hpruso peng aa pehnak Pyidaungsu lamcung, Ngwetaung khuathar pawng, August 23 zinglei in chun tiang SAC ralkap le Karenni hriamtlai phu pawl karlak ah kahdohnak a fak tiah dothlennak phu pawl nih an chim tiah RFA nih a langhter.
Vanlei zong in kahdohnak voi 2 a tuah, Demoso-Hpruso lampi hi tlaih an duh caah a si kho men. Pyidaungsu lam a si caah an riahcaw chanhnak ah a biapi tiah KNDF biachimnak nawl a ngeitu nih RFA ah a chim. An Riahcaw chanhnak ah a biapi mi cu pyidaungsu lam an tlaih khawh nak hnga Brigade 55 kuttang Infantry 112, LIB 3 fonh in thazang 300 hrawng nih August 2 thawk in kahdohnak an thawk cang caah kaphnih karlak kahdohnak a fah peng hi a si.
Kahdoh a chuahnak Demoso, Hpruso lam hi thilri luhchuahnak lampi a si caah kahdohnak caan a rauh bantuk in mipi eidin zong a dih thluahmah lai hi thinphang a si tiah khuami hna nih RFA ah an chim. August 10-12 tiang Ngwetaung khuathar le Htidawku khua pawng ah kahdohnak a fak i SAC lei Battalion Commander pakhat le Second Battalion Commander telh in 70 hrawng an thi cang i hriam tampi zong an lak khawh tiah KNDF nih August 19 ah a rak thanh. Kahdohnak chung in KA ralkap pakhat le KNDF hriamtlai pakhat an nunnak a liam ve tiah theih a si.
Salingyi Peng Ah Palek 1 Meithal Zuun 2 He CDM A Tuah. Salingyi peng, Tuluk Wang Bao a hngak mi palek pakhat cu Salingyi peng Tamankya phu sin ah meithal zuun 2 he CDM a tuah tiah Salingyi peng thawngzamh nih an langhter.
Cu palek nih Uzi zuun 1, G3 zuun 1, kuanbawm 1, 7.62 kuan 10, 9mm kuan 9 le Walky Talky hna he Salingyi peng Tamankya phu sin ah CDM a rak tuah hi a si. Salingyi peng Tamankya phu nih CDM a tuah mi palek pa laksawng pek khawh nak caah Fund kan herh ko tiah mipi sin ah bawmhhalnak zong an langhter chih.
Yepya Khua Gate Kahdohnak Ah Palek 1 A Thi, Meithal Zuun 1 An Lak Khawh. Magway ramṭhen, Pauk peng, Yepya khua ah a um mi SAC ralkap gate kahdohnak ah Palek 1 a thi, meithal zuun 1 an lak khawh tiah Anonymous Special Task Force nih thawng an thanh.
August 22 zinglei, Yepya khua ah a um mi SAC ralkap gate cu dothlennak phu pawl nih Naungyoe Operation min in a naih tein an kah hna caah palek 1 a thi, G3 zuun 1, kuan 171, le kahdohnak thilri pawl an lak khawh tiah theih a si. Kahdohnak chung ah ASTF, NPRF, FRG, Justice Fighter le adang dothlennak phu tampi an i bawm tiah theih a si. Credit: The Chinland Post