Syria Le Iraq I Iran He Pehtlaihnak Ngeimi Hmun 85 Cu U.S Nih A Kah
=========
Syria le Iraq i misual hriamtlaiphu hna umnak hmun 85 cu U.S ralkap nih Jet Fighter hmangin a kah tiah theih a si.
U.S ralkap 3 Iran dirpitu misual hriamtlaiphu kahdohnak in a thimi hna lehrulhchamnak ah a tu bantuk kahdohnak hi kan tuah mi a si, tiah U.S ralkap nih an chim. A tu thok in lehrulhcham kahdohnak hi pehzulh in kan tuah peng cang lai tiah U.S President Joe Biden nih a chim.
A luancia caan zeimawzat chung khan Jordan hmunram U.S base Tower 22 tiah kawhauh mi sakhan cu Iran dirpitu misual hriamtlaiphu nih an rak kah caah U.S ralkap 3 an thi, 40 leng nih hliam an rak tuar. Lungmili Post
Thawngpang dang: Mindat-Matupi Lampi Ah Rallam A Sial Mi SAC Ralkap Pawl CDF-Matupi Nih Bomb An Puahhnawh Hna.
=====================
Chinram, Mindat-Matupi lampi lei ah Matupi khuapi hrambunh Khah-Lah-Yah 304 in SAC ralkap 100 hrawng rallam a sial mi cu CDF-Matupi nih bomb an puahhnawh hna i minung 6 hliam an pu, Chianpian (B) khua cu a ningpi ti tluk in an khangh, tiah CDF-Matupi nih nizan February 2 ah an thanh.
Khah-Lah-Yah 304 in SAC ralkap 200 hrawng cu February 1 ni ah Mindat-Matupi lampi cung Chianpian (B) khua lei ah rallam an sial i CDF-Matupi nih bomb an puah hna hnu, nizan February 2, zinglei suimilam 8:00 hrawng ah an thinhun lung in Chianpian (B) khua cu an khangh, tiah theih hna.
SAC ralkap 200 chung in a zatceo hrawng cu Matupi khuapi lei ah an kir cang nain minung 100 hrawng an taan rih caah CDF-Matupi he zeitik caan paoh ah aa kap kho mi an si bantukin tualchung mi zong nih Matupi-Mindat lampi hmang rih lo ding in le ram ah kal rih lo ding in CDF-Matupi nih tualchung mi cu ralrin an pek hna.
Matupi khuapi hrambunh Khah-Lah-Yah 304 Battalion cu a liamcia 2023 December thla chung ah Thebuai sakhan a chuahtak mi SAC ralkap nih thazaang an chapnak Battalion a si pin ah tukum 2024 January thla chung ah Sami khuapi no.2 Byuha sakhan a chuahtak mi SAC ralkap nih thazaang an chapnak Battalion a si.Crd:TCP