Vankau Tlang raap sakhan…
==========
Kawlrawn Kalaymyo lei in raap sachia an hong kai tikah, Falam tiang zalong tein an rak lut kho zungzal. Falam van lonh ah tlawmte terh an rak si. “Hrang Ṭhio khuapi cu lungdam mahmah in an lut” tiah capar ka rak thai bal khah.
HKA-TT lei panh in an ral hrihhrampi bik hrawh duh ai thawhmi an si ti an theih ruangah, Ramthlo, Chunchung, Ṭaal ti hrawnghrang in rak phomh an si ko khah. HKA lei cu a um cia an va si. Kawlei in a tomtom rami pawl hloh khawhnak dingah, karlak bawm khotu bik cu Vankau Tlang raap sakhan an si ti khawh si. Vankautlang ah helicopter a ṭum zuang kho cuh. Lampi strategic hmun a si.
Caan karlak Chin cozah a si kho cang dingmi Chin hriamtlai bupi nih ramri lei Ṭio le Rihkhuadar an ihum cang ti awk a si. CNDF pasal ṭha hna nih Tibual raap sakhan an von laak khawh chinchin cang tikah, Hualngoram chung i Rih lam cu a thiang ti awk si cang tinak si ko hnga lo maw?
Tikah, A pahnihnak raap pawl lam chah khawhnak ding cu Vankautlang raap sakhan khi si. TT laak an itim bak lai ti i an ruah saling ahkhin, Vankautlang (an rak luh hnawh bal cang hna kha mu) la kho lawlaw cang hna sehlaw cu lawmh um lai ning.
Falam khuapi zong cu mah miphun uknak khuapi a pahnihnak ah ai cang colh hnga. Chin cozah sernak ah Falam peng ah mifim tampi an um ko i a bawm khotu zong tampi an chuak te lai. FLM irunvennak caah ti in mu.
Chinram khualipi khi erh-khumh a va si cang hnga. TT lam cu a donghmarawt zong i a vengtu raap sachia vialte futhul bak in meicung an kan hreempiak khawh tikah kan ilawm bik te ko lai cu.
FLM khi cheih hmasa ding si. CNDF cu a hme luakchuak te a hei si ko i a cheih ngam lai lo caah, mahameit deuh i a dir khotu bupi phu nih cheihpiak hmasa ding an si. Mah khan CNDF pawl zumhtlak an si ko, an sin i ap phu an si ko le ap hngap ding. Idea itat cionak sawh ah, ka hei thai bia. YGN hmanh him ti lo.
Chin cozah a dir khawh hmasa biknak ding Rihkhuadar si lai maw? Nihin ni cu kan miphun chungah thanuamhnak in an khahnak Facebook cahmai ah hmuh khawh a si. Rihkhuadar in raap 43 cu Mizoram lei ah ui tlik le vok zaam in an zaam hna i tuzing Chinland Time 9:00 am hrawngah khan Champhai peng Hnahlang khua in India cozah nih helicopter in a thiar hna, ti si.
Khampat lei zong khan MAH raap pawl cu India ramchung ah a zaammi torlak te an um. An zat cu ka van ciing ti lo. Mah bantuk ral ituknak i a zaammi pawl khi refugee cu an si ve ko rua. International Law siloah Humanitarian phung a umtuning lam cu ka theihfianmi si lo i, zeitindah India cozah nih a tuah hna hnga ti khi interesting si pah, ka ti. But…
Humanitarian kongkau ah “nain” timi “but” a um kho men. Mipi a serhsat, a thattu phu, siloah ralhrang tuahsernak a bawmtu le a tuahtu na si maw si lo, ti a um. Tikah, India khi democracy dik tak rampi a si ko ahcun, mipi harsatnak le fahnak a petu ralkap phu minung cu hawidang minung bantuk cun zohkhenh phung si rua lo. A zaammi pawl khi MAH sinah kir hna sehlaw, a ṭuanvo a tlamtlinh kho lotu lawngte an si tikah, thong thlak pet ding an ti men hna lai dah.
Cu pinah MAH a thang an chiat tuk lawlaw fawn i an caah khin fawi bak lai lo. Ka van google fukfak ahkhin khi bantuk khi refugee an si ti phunphai in ka hmu. Kam khatlei ah, Khuapi hei lak ko cangah cun, uktu cozah si khawh si ko cang. Cozah bantuk tein lak cangmi khuapi a uk kho si hram hna sehlaw, Chin tuanbia cu ai dawh ngai lai.
Chinshwehaw lei i MNDAA nih mipi a kutrit hna ning kha cu ai dawh dom. Cozah bantuk taktak in thawngthanhnak le theihternak tehna an thanh kha hmuh cio a si. Rihkhuadar in Falam ah. Falam tlangbo raap hlumhnak hmun khin Zinghmuh in Vuichip tiang vanral zong ai veeng khomi hei si ulaw ti duh um e. A thirh tuk cangmi MAH raap pawl vialte Rungtlang in dawi khawh dih si hna sehlaw ti lam cu na duh lai ning hi…TT raap sachia vialte zei tikah dah futhul in hreem khawh an si te lai ti zong cu kan minung thisa nihcun ai ngaih dom ko. Credit: Salai C Alexander