US Thawngpang; Lousina Highway Ah Mawṭaw 150 Renglo An I Pah, Minung 7 A Hmun Ah An Thi
==========
October 23, cawnnikhatni ah US ram Lousiana ramkulh Highway ah mawṭaw 158 an i pah i a hmun ah minung 7 an thi, 25 nak tam sizung ah an tlikpi hna. Hliam tenau deuh a tuar mi zong an tampi tiah ramkulh palik nih an chim.
Zeiruang ah an i pah, zeitindah an i pah? Zeibantuk mawṭaw dah an i pah hmasa? Hi biahalnak hna hi fiang tein theih khawh ding ah ramkulh palik nih an zohfel cuahmah lio a si. Mawṭaw a kang mi le a rawk mi a tam tikah ṭha tein zohfel a har i a thi mi cu kan hmuh lo mi zong a um kho tiah ramkulh palih ṭuanvo ngeitu nih an chim.
House Speaker Aa Cuh Ding Minung 8 An I Fiang, Thaizing Ah Thimnak An Tuah Lai; House Speaker sinak in Kevin McCarthy an dinhter hnuah atu tiang House Speaker an thim kho rih lo. Jim Jordan thim dingin voithum tiang vote thlak a si i speaker sinak dingah a herh mi vote 217 a hmuh khawh lo caah amah tein ai hnukdawk (withdraw).
Jim Jordan ai hnukdawh hnu in Republican in House Speaker cuh ai tim mi mining 9 an i fiang nain Mike Johnson cu ai let ṭhan caah 8 an taang. Cu hna cu Jack Bergman (Michigan), Byron Donalds (Florida), Kevin Hern (Oklahoma), Mike Johnson (Louisiana), Gary Palmer (Alabama) le Pete Sessions (Texas), Dan Meuser (Pennsylvania), Tom Emmer (Minnesota) le Austin Scott (Georgia) hna an si.
Hi hna chungah hin Tom Emmer le Austin Scott dah ti lo a dang vialte hi 2020 thimnak a lungtling lo mi le ṭha tein zohfelnak tuah ṭhan dingin a duh mi an si. Phundang in chim ahcun 2020 thimnak kong ah Trump he an ruahnak aa khat tinak a si. Thaizing, October 24, zinglei ah a cunglei 8 hna chungin ahodah House Speaker caah kan chuahpi lai ti kha Republican pawl innkhar hrenh in thimnak an ngei lai.
Bengal Rili Cung Thlichia Ruang Ah Chin Ramkulh Le Mizoram Chung Ah Ruahpi A Tam Kho. Bengal rili cung thlichia cu October 23 zanṭim ah suimilam 1 ah meng 40 tluk thazaang in a hrang kho i Cyclone thlichia a si kho, tiah Bangladesh khuacaan zohnak zung Cyclone News BoB nih an langhter.
Thlichia thazaang ruang ah Chin ramkulh, Mizoram le Rakhine ramkulh hna ah ruahpi a tam kho men, tiah an zumh. Thlichia cu suimilam 1 ah meng 30-35 tiang in a hrang kho i ruahpi zong fak ngai in a sur khomi a si caah ralring tein um a herh. Thlichia umtuning ah chaklei hoih si lo in thlanglei hoih ah meng 40 asiloah meng 50 a tlak ahcun ṭihnung ngai a si kho, tiah an chim.
Thlichia cu October 25 zinglei Bangladesh ram ah suimilam 1 ah meng 45 thazaang in a hrang kho i zanlei ah suimilam 1 ah meng 40 ah a tla kho. October 26 ni ah suimilam 1 ah meng 31 ah a thlihran ning a ṭum deuh lai, tiah an zumh.
A biapi in Rakhine ramkulh chaklei hna ah thlichia a fak kho i tilet a tho khomi dirhmun a phan. Thlichia cu suimilam 1 ah meng 30-35 in a hrang kho i tilet cu a san pe 9 tluk in a tho kho, tiah khuacaan zohthiam Win Naing nih a donghnak bik a zumhnak a langhter. A luancia May thla chung zong ah Rakhine ramkulh le Chin ramkulh hna ah Mocha thlichia a rak hranng i Biakinn telh in inn tam ngai a rak rawk.