US sponsor auhnak (Welcome Corp) theih herh tete
========
US cozah nih ralzaam laaknak lamthar an sialmi (Welcome Corp) cu an thoknak kum tluk asi cang ko nain autu lei nih auh duhmi minung i ham (i thim) khawh a rak si lo caah kan nih Laimi (Chinmi) ca cun a tlam a rak tling kho lo. Sinain tu cu autu (sponsor) lei nih auh duhmi minung (ralzaam) i sawh khawh si cang tiah theihter asi bantuk in cheukhat aa fiang lomi tete kan um len caah theih awk tha le theih herh tete ka rak langhter lai.
Ahmasabik ah kan theih dingmi cu hi auhnak (Welcome Corp program) tang ah auhnak tuahmi poh kan kal kho lai tinak asi lo. A fawinak in chim ahcun sungh le awn a um ve. Mah i kan sungh khawhnakbik pakhat cu USCIS interview siloah US lahwahkah (DHS) interview ah kan sung kho. Welcome Corp asi ruangah US lahwahkah (DHS) interview kan luat lo, ngandamnak check (medical check) kan luat lo.
US cozah nih ralzaam a laak tikah an phungphai ning in dothlat le sining hlathlainak an tuah zungzal. Cun UNHCR nih ralzaam ah an kan cohlan hmanh ah US cozah nih ralzaam kan sinak cohlan lo khawh asi. Ram pakhat nih ralzaam asi maw silo tinak tahfung (refugee status determination) an nei cio. Laimi zeimaw zat cu UNHCR nih US kal ding ah kan case an kan kuatpiak ko nain US lahwahkah (DHS) interview kan sung theo tawn. An mah tahfung (policy) ning in ralzaam kan sinak an kan cohlang tawn lo.
Cucaah US cozah nih ralzaam an laaknak tahfung kan tlinh lo ahcun UN card kan neih ko zong ah kan sung ko lai. Cun kan i taap khawhnak pakhat asi rihmi cu kan umnak ram (host country) nih chuahnak nawl (exit permit) an kan pek lo ahcun kal lo khawh thiamthiam asi.
Cun a dang kan theih rih dingmi tete hna cu: 1. Auhmi minung hi kum 18 cung asi lai. 2. Chungkhar pakhat ah minung 10 tiang cohlan asi lai. 3. September 30, 2023 tiang ah UNHCR asiloah kan umnak ram cozah nih ralzaam ah cohlanmi asi lai. 4. Kan ram kan chuah taaknak a ruang le kan kir khawhlonak a ruang (kan case) a herh lai. 5. Hmantlaak (passport size) le kan UNHCRC card, birth certificate tibantuk copy a hau lai.
6. Exit permit fee mah tein i liam si lai. 7. Autu lei nih auhnak an tuah cuahmah lio ah a dang auhnak tuah than a ngah lo. An auhmi a phanh hnu thla 3 hnu lawng ah a dang auhnak an tuah khawh than.Credit: Ceumi Lian