Michigan Chawdawr Ah Meithal Kahnak A Chuak Minung 5 Hliam An Tuar!
=========
July 30, ah Lansing Michigan chawdawr motor chiahnak hmunhma ah meithal kahnak a chuak minung 5 hliam tuarmi lak ah 2 hi fak ngai in hliam an tuar tiah ṭuanvo ngeitu hna nih an chim. Meithal kahnak hi zinglei suimilam 1:00 tluk ah cang in hliam tuar mi hna hi kum 16 in 26 karlak ansi minung 2 hi hliamfak an tuar caah sii-inn pi ah an tlik pi colh hnan tiah Lansing palik ṭuanvo ngeitu hna nih an langhter. Palik hna nih meithal zeimawzat an tlaih nain thil sual tuahtu cu tuni tiang in an tlai kho rih hna lo tiah theih a si.
President Nih Nawlngeihnak A Laak Ṭhan Lo Ahcun Niger Ram Ah Ralkap A Cawlcang Lai – Nitlak Chaklei Africa. Nitlak Chaklei Africa nih an president Mohamed Bazoum tlaitu Niger ralkap cu an tlaihkhih mi an president cu nawlngeihnak pek ṭhan dingah ni 7 chung caan an pek hna tiah theih asi.
Hi kong he pehtlaiin, “Niger cozah ralkap nih nitlak chaklei Africa ralkap hriamtlai phu sin ah bialehnak a tuah mi cu ralrinnak na ka pek mi hi zeihmanh ah ka rello” tiah a chim. Ralkap nih cozah uknak lak hnatlak pitu tualchung mipi hna nih Niamey khuapi France embassy zung hmai ah duhlonak langhter an i tim tiah theih asi.
Nitlak chaklei Africa Union of Ecowas hruaitu Mali le Burkina Faso hna cu kan hnu zarh chung khan Nigeria ram Abuja ah Niger ram cozah thlak a sinak kongah tonbiaruahnak an ngei tiah theih a si. Tonbiaruahnak ah biakhiahnak an tuah mi cu ni 7 chungah an president nawlngeihnak an pek ṭhan li si ahcun a herh ning in cawlcangnak kan ngei lai tiah an chim.
Pakistan Ramkhel Kongkau Tonbiaruahnak Hmun Ah Bomb Puahkehnak A Chuak Minung 39 Nunnak Liam 200 Hliam An Tuar. July 30, ah Pakistan peng Khyber Pakhtunkhwa khua ah Islamic ramkhel party tonbiaruahnak (Meeting) an tuah lio ah bomb puahnak a chuak minung 39 nunnak liam 200 tluk nih hliam an tuar tiah ṭuanvo ngeitu hna nih an chim.
July 30, zanlei suimilam 4:00 tluk ah Pakistan peng Khyber Pakhtunkhwa khua i Islamic ramkhel party tonbiaruah (Meeting) tuahnak hmun ah mah tein nunnak lak aa tim mi nih bomb a puah sual caah minung 39 an thi 200 tluk nih hliam an tuar tiah an langhter.
Bomb puahkeh a chuaknak hmun in hliam tuarmi hna hi ambulance motor in Peshawar leh Timerera sii-inn pi ah an tlikpi colh hna. A tutiang in thilsual tuahtu hna hi theihfian khawh ansi rih lo tiah theih asi. Hi kong he pehtlaiin, JUI-F hruaitu Maulana Fazlur Rehman nih Vuanci Sharif le Inn hngaktu Chief Minister, Azam Khan hna cu hi thil cang mi hi ṭhate hlathlainak tuah ding in a nawl hna tiah an langhter.
Vietnam Vuanci Ṭhing Telh In Zungukbawi Minung 50 Renglo Thongthlak Ding In Hremnak An Pek Hna. Vietnam ram ah Covid-19 zawtnak lio i vantlawng in an lak mi hna sin in tangka haltu hna eihmuarnak konglam he pehtlaiin minung 54 thongthlak ding in hremnak an pek hna tiah theih asi. Culak ah Vietnam Vuanci ṭhing le zungukbawi sang hna zong an i tel tiah an langhter chih. Biaceihzung nih Covid-19 zawtnak lio i Vanlawng in khuatlawng an lak mi hna sin in tangka minung 54 tluk nih an hal hna caah a tu bantuk in thongthlak an timh hnanak hi a si tiah an langhter.
Biaceihzung biakhiahnak hi Vietnam cozah eihmuar dohdalnak an kalpi lio a si caah Vietnam Vuanci ṭhing nih Covid-19 lio khualtlawng mi hna sin in dollar 900,000 tluk a cohlan caah kum 16 chung thongthlak ding in bia an khiah piak tiah theih asi. Hanoi khuapi ah zarhhnih chung an konglam ceih ansi hnu ah Vietnam Vuanci ṭhing telhcinh in zungukbawi minung 54 thongthlak ding in bia an khiah piak hna tiah an langhter.