US President Hlun Donald Trump Cu Thonginn Nawlngeitu Sinah Aa Langh!
===========
US president hlun Donald Trump cu 2020 thimnak kongkau i sualpuhnak(case) a ngeih ruangah atuzarh Cawnnili ni ah khan Georgia state nawlngeitu sinah aa langh. Republican hruaitu, president hlun hi a umnak Bedminster, New Jersey in Atlanta, Georgia ah a kal i, Fulton County thonginn nawlngeitu hna sinah aa pe.
Thonginn i aa langh hnu ah hin hman an thlak i, phung ning tein chinchiahnak an tuah. US president a si cang mi lak ah thongtla hmanthlak(mugshot) thlak hmasa bikmi a si. A hmanthlak cu amah ṭhiam nih social media ah a taar colh.
Thonginn chung ah minutes 20 hrawng an hren hnu ah tiamkamnak he USD 200,000 in chuahter chung a si i, Trump cu Oct 23 ah i langh ṭhan dingin ti a si. Cu hnu ah Georgia state zong a chuahtak colh. Airport i thawnglatu hna nih an bia an halnak ah Trump nih cun, suaknak a tuah lo kong a chim i, 2020 kum thimnak ah a sungh ning cu a dik lo caah dohkalh ding in covo ka ngei, tiah a chim.
Donald Trump hi a luancia 2020 president thimnak ah khan result thlennawn timh kongkau ah sualpuh a si i, amah ṭuanpi hawi midang 18 he case tuahpiak an si. Midang 18 zong nawlngeitu sinah an i pe dih cang, tiah theih a si.
Donald Trump Mugshot Fluton County Thonginn Ah Kupinam Dinginn Aa Pe. President ṭhing Donald Trump cu Fulton County, Georgia hmunhma ah thimnak (Election) 2022 lio khan thil sual a tuah tiah ruah/zumh in atu bantuk an tlaihnak hi asi tiah an langhter.
Trump hi tukum chung lawngah Fulton county thonginn ah voi 4 tiang kutpinam (Finger print) tuahnak in a langh lai, cu hlan ah voi 3 tiang aa langh cang tiah theih asi. Donald Trump a rihzan le a san ning hoih in thongtla mumber P01135809 an pek. Amah chuahnak (Bial) dingah tangka $200,000 liam in an rak chuah thonginn chungah minute 20 tluk aum manh tiah an langhter.
President ṭhing Donald Trump a rianṭuan hawi Mark Meadows zong amah tein aa pe October 23, khin Willis le Georgia ah Donald Trump buainak (Case) hlathlai ṭhan asi lai. A rianṭuan hawi tampi hna zong an hmanthlak le ID lak piak ansi tiah theih asi.
Wagner Prigozhin Hna An I Citmi Pumpak Vanlawng Tlaknak In Minung 10 An Thi. Wagner PMC tangka duh in ramdang ralkap rian a ṭuan mi ralbawi Prigozhin hi June, 2023 lio i Moscow lei panh in Vladimir Putin cozah thlak an timh hnu khan t (Wagner mercenary group) hi kahdohnak ah caan saupi an dirkhawh lai lonak kong an rak chim chung cang.
Kan hnu te khan Prigozhin hi Africa buainak lei panh in a um kalnak kong telegram ah video in a langhter. Prigozhin hi a ho thah mi dah asi? Kremlin timhlamhnak asi maw? tiah biahalnak le ruahnak zong tampi a chuak. August 23, ah tangka duh in ramdang ralkap rian a ṭuan mi phu (Wagner mercenary group) nih Kremlin sin ah Prigozhin hi a thih si ahcun ‘March For Justice’ kan tuah lai tiah an chim.
Tangka duh in ramdang ralkap rian a ṭuan mi ralbawi Wagner Prigozhin hi vawlei pumpi zumh/ruahnak leng in anun khua asau tiah a chimtu an um hna. Wagner nih cozah uk hruainak a doh hnu khan caansau rau loin a thih colh te lai tiah a chimmi zong an um sihmanhsehlaw Putin nih hin thah colh loin caan zeimawzat chung a thluak hmangin a rak vahveihter chung tiah an langhter. Wagner Prigozhin hi atutiang in aho thah mi dah asi ti an theih fiang kho rih lo micheu nih Vladimir Putin nih a thah mi asi lai tiah ruah/zumh naak zong an ngei.
The Russian Federal Air Transport Agency nih, Prigozhin aa citnak vanlawng tlaknak in nunnak liam mi hna minung 10 milurelnak ah min a langhter ning cun vanlawng chung aa citmi hna hi, Propustin Sergey, Makaryan Evgeniy, Totmin Alexander, Chekalov Valeriy, Utkin Dmitry, Matuseev Nikolay, Prigozhin Evgeniy, hna le Crew chungtel (members) Levshin Aleksei ralbawi, Karimov Rustam vanlawng khaltu, le Raspopova Kristina hna hi ansi hna an 10 ning tein an thi dih tiah a langhter.
Kum 19 Nu Ngakchia Fir In Thattu Gabriel Palik Nih An Tlaih. California thlanglei pangpar dum (Park) pakhat hmunhma ah kum 19 (Nu) ngakchia cu fir asi hnu ah thah asi tiah palik ṭuanvo ngeitu hna nih an langhter.
Hikonglam he pehtlaiin, kum 19 Andrea thahtu le firtu ah ruah/zumh asi mi Gabriel kum 20 micu August 21, khan pali nih an tlaih cang tiah ṭuanvo ngeitu hna nih an chim. Kum 19 Andrea ruak hi August 21, khan Moreno horkuang thingram umnak hmun ah palik nih an char tiah theih asi.
Thlapa Cung Ah India Ram Thlah Mi Chandrayaan Tluang Tein An Ṭum Ter Khawh. India ram nih a thlah mi Thlapa cung kainak Chandrayaan cu tlamtling tein August 23 zan ah Thlapa cung ah a ṭum kho cang tiah India nih a langh ter.
“Atu bantuk in Thlapa cung tiang a phak khawh mi hi India ram caah teinak nganpi pakhat a si”tiah India ram Prime Minister Narendra Modi nih a chim. Prime Minister Narendra Modi cu thlanglei Africa ram ah BRICS tonpumhnak an tuah lio a si i cuka hmun cun a rak zoh ve, a pawngkam mi zong nih an lawmhpi ngai.
India ram nih Thlapa cung kaiding in voi 2nak aa zuam nak chungah a tu bantuk in tlamtling tein a kai khawh hi a si. Thlapa cung ah a kai kho mi ram cu America ram, Soviet ram, Tuluk ram le India ram hna an si. Russia ram zong voi 25 tiang aa zuam nain voi khat hmanh a tlamtling lo tiah kan theih. Credit: The Chin Post, Lungmili Media