Yaw Le Chinram Lei A Rak Kai Mi SAC Ralhrang Motor Rual Cu Hnu Lei An Kir Ṭhan Cang!
==========
Pakokku in Chinram lei panh in a rak kai mi ralhrang hna motor bu cu Pauk le Htilin Khua kar Zipyia khua an phak hnu, November 7, 2023 ah khan hnu ah an kir cang i November 9 ah Pauk peng Yipyia khua an phan tiah theih a si.
Magwe ramṭhen, Pakokku hrambunh LIB 101 in a hnulei a um mi, Yaw le Chin ramkulh, thlanglei ah riakcaw a phor mi motor 70 hrawng cu Pakokkku – Pauk peng ah thlakhat hlei kham an si i atu cu an kir kho cang tiah theih a si.
SAC ralkap 300 hrawng le riakcaw a phortu motor rual cu September 28 ah Pakokku in an rak i thawh hi a si. Lampi ah kham an ton caah zarhkhat tiang cu Pauk peng ah an tang. Magwe hrambunh mipi ralkap he kahdohnak a chuak. SAC ralkap nih Pakokku-Pauk- Kyaukhtu- Mindat lampi hmang in Chin ramkulh thlanglei ah ralkap thazang a chap ṭhan lengmang.
2023 June 21 ah Pakokku in a rak chuak mi SAC ralkap mawṭaw 9 cu ralkap 100 hrawng nih himnak an lakpiak i Mindat-Kyaukhtu lei an panh caah cuka lamcung mipi hna nih ṭha tein ralrinnak ngei uh tiah CDF-Mindat nih an rak thanh.
June 21 ah cu SAC ralkap pawl cu phu 3 ṭhen in Kyaukhtu hmunhma chung ah an lut i lam kehlei le orhlei ah hriamngan an thlah thlorh, meithal an puah thlorh i hmai an fon thluahmah caah CDF phu hna nih cuka hmunhma khuami hna kha umkalnak tuah rih lo ding in ralrinnak an rak pek hna.
May 2022 thla ah Mindat-Matupi ah hriamnan, meithal, kuan, zen le riakcaw phortu motor runpi he an rak kai lio ah atu Ongtaw hlei cu bom in an hrawh bal cang. Ralhrang motor bu chung i ralhraang cheukhat cu November 8 chun 12:00 hrawng ah Yipyia khua ah Monywa hrambumh North-Western command lei in Mi 17 vanlawng nih an rak laak hna i nichuah chaklei hoih in a zuang pi hna tiah theih a si.
Tonzang Peng Mipi Uknak Phu Sin Ah Palek 4 CDM An Tuah. Chin ramkulh chaklei, Tonzang hrambunh palek sakhaan in palek 3 le Tamu pengkomh Khampat khua hrambunh palek sakhaan in palek 1 cu Tonzang peng mipi uknak phu sin ah an rak i fonh tiah theih a si. An pali hi September le October thla chung ah an rak i fonh hi a si i an herh mi bawmhnak kan pek hna tiah Tonzang peng mipi uknak phu nih an chim.
“Chin miphun an si ve caah meithal in kan kap duh hna lo. Tangka chanbaunak ruang ah ralkap chung ah an um hi a si i kahdohnak a um caan ah vanlei ah meithal kan thlah sawh. Ralkap chung ah rit sii a hmang mi le zu tama lawng an taang cang. Miṭha an um ti lo tiah an chim” tiah Tonzang mipi uknak phu nih Khonumthung Burmese ah an chim. Ralkap kuttang in chuah a duh mi poah cu Tonzang mipi uknak phu nih lunglawn tein kan in don ko hna tiah an thanh.
Pinlebu Peng Ah SAC Ralkap Nih Thantar Rang An Tar, Peng 9 Mipi Ralkap Hunhimnak Tangah A Tla, Sakhan 163 An Lak Cang. Sagaing ramthen, Pinlebu khuachung ah SAC ralkap nih a sungpeknak ah thantar rang an tar cang tiah November 8 ni Mizzima Burmese nih a ṭial. Operation 1027 thawk in ni 12 chung ah SAC ralkap sakhan 163 an lak cang tiah theih asi.
MNDAA le AA ralkap nih ralkap sakhan 120, kan lak khawh tiah MNDAA biachimnak nawlngei Lee Kyarwen nih a chim. TNLA nih ralkap sakhan 33 an lak khawh cang tiah Ta’ang TV News sin in theih a si. Cucaah unau hawikom ralkap phu 3 nih November 7 tiang ah ralkap sakhan 153, an lak.
Cun KIA hruai mi mipi ralkap nih Tamu-Kalay, Khampat ralkap sakhan 1 le palek sakhan 5 le Gangaw Minywar palek sakhan 1, Karenni lei nih November 7 ni Meseih peng Pandein khua Sakhan 3 laknak ah SAC ralkap 20 nak tlawn lo an thi, hriamnan tampi an lak khawh tiah People Spring nih a ṭial. MNDAA, AA, TNLA, KIA le Karenni hruai mi le mipi ralkap hna nih Operation 1027 thawk ni October 27 in November 7 tiang ah SAC sakhan 163 an lak cang.
Cun, November 8 tiang ah peng-myo 9 cu mipi ralkap hunhimnak ah an um cang. Sagaing ramthen ah, 1. Kawlin, 2. Khampat, 3. Pinlebu, Shan ram ah 4. Chin-Shwe-Haw, 5. Phaungsai, 6. Theinni, 7. Nankham, 8. Mone Koe, 9. Kyokauk (Pansai) tiah Shanram ah peng 6, Sagaing ram ah peng 3 an dihlak khuapi –peng 9 cu mipi ralkap nih hunhimnak an lak khawh.