Khuapau Dohthlennak Chung Tlangcung Hriamtlai Hmunhma Kahdohnak!
==========
2023 September thlachung tlangcung hriamtlai phu le SAC ralkap karlak ah kahdohnak voi 207 hlei a chuak. Karen ramkulh ah voi 112 leng, Shan ramkulh chung ah voi 42 hi a tam cem an si. Thlakhat chung SAC he kahdohnak ah SAC lei 212 an thi, mipi ralkap lei mi 65 nih ram caah an nunnak an pek tiah Federal Journal nih a langhter.
1.Karenni ramkulh; September, 2023 kum Karenni peng chung ah SAC he kahdohnak voi 22 a chuak. SAC ralkap lei 51 leng an thi i, mipi ralkap 11 nih ram caah an nunnak an pek. Meseik peng chung, Thai-Myanmar ramri BP 13 sakhaan, BP 14 sakhan, BP 15 Metanwe sakhaan, BP 16 Taunghla sakhaan, Meseih Myomah Police sakhaan le Byuha-kung cu Karenni mipi ralkap nih an lak khawh. Siataw peng Kyapoahsaklay point 2957 sakhaan pahnih cu ralkap nih an chuahtak. Ramri veng ralkap (BGF) battalion 2 nih Karenni miphun ralkap phukomh (Kalalathah) phu dirh in SAC an doh ṭhan.
Meseik peng lak ṭhan ding in kahdohnak a tuah mi SAC LIB 66 Battalion cu Karenni mipi ralkap phu nih an rak doh hna. SAC ralkap sin lak mi MM 120 hriam nih SAC harnak a pek ngai. SAC ralkap bawmh chan ding a ra mi cu Demoso pawngkam in an rak kham khawh caah Karenni ramkulh ah SAC hmainor kho lo in an um.
2.Karen ramkulh (Kawthoolei umnak hmun) September, 2023 kum chung Karen (Kawthoolei umnak hmun) ah kahdohnak voi 112 a um. SAC ralkap 92 leng an thi, mipi ralkap chung in mi 44 nih ram caah nunnak an pek. Karen ramkulh chung ah a ummi KNU le PDF bu komh nih Hpa An pengkomh telh lo in adang pengkomh ah kahdohnak an um peng. July thla chung ah kahdohnak a fak ngai mi Myawaddy peng thlanglei Letkhettaung kahdohnak a um.
July 2023 kum in KNU/KNLA LIB 6, Cobra phu 1, Cia Tit Net bu, Federal Wings phukomh nih Letkhettaung Tower tung sakhaan cu July 21 ah an lak. Letkhettaung Tower tung sakhaan hi Myawaddy le TinkanNyinaung thlanglei raldohnak ah a biapi ngai mi tlang pakhat a si. Cucaah SAC lei LIB 44 ralkap phu nih Letkhettaung cu Vanlawng, hriamngan in kahdohnak a tuah peng nain nihin ni tiang an la kho hlei lo.
Mon ramkulh; September, 2023 kum chung Mon ramkulh chung kahdohnak ah record tak a um rih lo. SAC lei 4 an thi ti mi record ah a um. Nihin Mon ramkulh raldohnak zohtik ah KNU ralkap LIB 6, PDF phu foh le Mon dohthlennak bu, Ye Balu tualchung mipi ralkap le SAC ralkap karlak ah kahdohnak a um lengmang. Mah kahdohnak ah Ye le Mu Don kar lampi cu KNU battalion 27, le PDF taung Nyo ralkap phu kuttang ah a um.
Monywa Kalay lampi Yar Kyi lam, Gangaw lam in umkal khawh a si ti lo. PDF phu kuttang tang ah an um. Kalay- Maharmaing lam lawng onh a si nain PDF nawl lo in umkal khawh a si lo. Meng 80 lam a si mi Kalay-Tamu lampi ah kahdohnak a um pah lengmang.
Sagaing, Myint Kyi Na lam a ummi Gate 80% zatuak cu PDF gate hna an si. Cun, Monywa chaklei Chindwin tiva kuang hrawng, Mandalay, Ba Maw kar Ayeyarwaddy tiva kuang hrawng cu PDF kuttang deuh ah an um. SAC riahcaw chan tu tilawng pawl zong kahdohnak an tuah peng hna. Hriamnam tling a ngei lo mi PDF cu SAC vanlawng nih a kah lengmang hna. Zahan nai Pa Le peng, Ce Ning Kyi khua pawng August 7 kahnak ah Yinmarbin pengkomh PDF phu komh nih SAC ralkap 15 an thah khawh hna. SAC lei nih vanlawng in kah a bawmh lengmang hna.
4. Chin ramkulh; September, 2023 kum Chin ramkulh chung ah kahdohnak voi 9 a um. SAC lei 7 leng an thi, mipi ralkap lei 7 nih ram caah nunnak an pek. Chin ramkulh chung ah CNF/CNA le CDFs mipi ralkap he ṭangṭi in SAC ralkap kahdohnak an tuah.
Chin ramkulh ah Hakha le Matupi peng umkalnak cu hlan ah nikhat lamkal a si nain nihin ah cun a thlathla in kalnak lam pi a si cang. Kalay-Hakha zong suimilam pa 7 kalnak lam a si nain raldoh caan ahcun SAC ralkap hi thla 3 hlei an rau tawn. Cun, CNA Headquarters umnak Victoria base kah ding in a rak kai mi SAC ralkap cu Hakha in Thantlang lei an rak kai lengmang nain an timhning bantuk in an si kho lo.
Chin ramkulh ah hramhram in uknak a latu SAC ralkap pawl cu mah le hmunhma cio in hriamtlaih in dothlennak an tuah caan hi kum 2 leng a phan cang. Atu bantuk kum 2 leng caan chung ah Chin miphun dothlennak phu pawl nih hmunhma 90% leng cu an tlaih khawh cang. Khuapi ti dah lo cu adang khuate kip cu mipi ralkap control nak tang ah a um cang. Khuapau Dohthlennak ah SAC tank motor pahnih a hrawk kho hmasa tu mipi ralkap thazang a ṭhawnnak ramkulh a si.
5. Kachin ramkulh; September, 2023 kum Kachin ramkulh chung ah kahdohnak voi 21 a um i SAC lei 54 leng an thi. KIA lei in 6 nih ram caah nunnak an pek. KIA le mipi ralkap ṭangṭi hna nih Kachin ramkulh um Bamaw pengkulh, Shwe Ku pengkulh, Butaoo pengkulh, Hpakan peng in Kachin- Sagaing ramri Kathar, Inn Daw, Kaw Lin, Hti Ceint, le Kachin-Shan ram chaklei ram Kok Khaine, Mu Se, Pyi Oo Lwin, Naung Cho in adang peng tampi tiang KIA an cawl cang.
Kachin ramkulh Laiza pawng Nant San Yang khua pawng ah SAC battalion phu 10 nih kahdohnak an tuah nain Laiza lei an kai kho hlei lo. KIA le PDF fonh in an kah hna. Laiza khua cu hriamngan in SAC lei nih an kah. Sihmahsehlaw mipi ralkap lei nih dmDrone in an kah ve hna caah SAC ralkap hmainor ngam lo in an um. August 7 KIA nih Hpakan peng Kathaingtaung sakhaan, Tamakhan sakhaan an lak. Kachin ramkulh chung kahdohnak pawl ah Nant San Yang kahdohnak le Hpakan kahdohnak hi minthang mi kahdohnak a si.
Shan ram ( Chaklei); July thla Shan chaklei Kutkai pawngkam ah KIA nih lam-orh kahdohnak an tuah pah lengmang. Minthang mi kahdohnak cu Kutkai peng, Kho Mun pawng Kaung Ya Pone sakhaan kahdohnak a si. SAC lei mi 24 an thi i, hriamnam tampi an lak. Cun, TNLA Ta’ang an si. July thladongh August thla hramthok ah Se Lant, 105 mile ah TNLA he kahdohnak ah SAC mi 10 leng an thi, hriamnam tampi an lak.
Shan ram ( Thlanglei); SAC ralkap uknak a lak hnu in SAC he kahdohnak a um lo mi ram a si. Sihmahsehlaw SSPP le Wa ram (UWSA) ralkap phu hna nih RCSS bu an pom chuah hna hnu in SAC lei nih SSPP bu cu hnu kir ding in March thla dih, 2022 kum in nawl chuah hnawh hna. SAC ralkap cu ramchung dihlak raldohnak caah minung thazang a ngei ti lo. UWSA bu nih Tanlwin tiva nitlak lei ah umhmun thar a lak mi cu zei a ti ngam ti lo. SSPP hmun an laknak sakhaan pawl SAC nih an ṭhawl mi zong cu zei an tuah kho hlei lo.
Burma ram (U Nu-Ne Win) chan lio ramchung ralbuai/tho lio ah, ramri a um mi Burma Communist party Headquarters Pangsai (Pangkham), Karen National Union Headquarters hlun Manerplaw, Kachin Independent Organization hlun Pajau tiang kawl cozah nih kah in hnahnawhnak an rak pek khawh.
Atu khuapau dohthlennak ahcun Myanmar ram ah ral a thawh bal lo nak Myanmar hmunlai bik (Central Myanmar) khua hna nih atu cu Naypitaw peng chung ah mipi ralkap le ṭangrual phu hna nih hnahnawhnak pek in umthiam lo in an kah cang hna.