Tibual Sakhan In A Zaammi SAC Ralkap 29 Cu Vaphai Khua In Manipur Lei Ah Helicopter In An Kalpi Hna
===========
A luancia November 15 ni ah Falam peng Tibual sakhan in Mizoram lei ah a rak zaammi SAC ralkap 29 cu Vaphai khua in India ralkap Helicopter nih Manipur lei ah a kalpi hna, Manipur in Myanmar lei ah an kalpi hna lai zumh a si.
Chin ramkulh, Falam peng Tibual sakhan in a zaammi SAC ralkap 29 cu Assam Rifles nih Mizoram, Vaphai khua ah ni 5 tluk an zohkhenh hna hnu nihin November 19, zinglei suimilam 11 hrawng ah Indian Air Force Helicopter 2 in Manipur lei ah an kalpi hna kong All India Radio news Aizawl nih a ṭial.
Hi kong he pehtlai in Vaphai khuachung ummi pakhat nih cun, “India Helicopter cu voi 3 hrawng a rak ra i, kan zumhnak ah Tibual sakhan in a rak zaammi SAC ralkap pawl an thiar hna a si lai. A ruang cu; cu hlan ah nihin bantukin Helicopter a ra bal lo. India Helicopter cu Champhai lei ah a zuang i Manipur lei ah a ṭumpi ṭheo lai, tiah zumh cio a si ko,” tiah The Chin Post ah a chim.
“Tibual sakhan in a zaammi SAC ralkap 29 cu Vaphai khua an phanh hnu ah ah nikhua a chia peng i, cu ruang ah Helicopter nih a laak khawh hna lonak a si lai. Nihin cu nikhua a vun i hawk i khua a ṭhat ngai caah an vun laaknak hna a si kan zumh,” tiah Vaphai khua ummi pakhat nih cun a chim chap.
CNDF Nih Tibual Sakhan An Laak Hnu Ah SAC Ralkap Thantar An Hrawh I CNDF Thantar An Thlai. Chin ramkulh, Falam peng, Tibual SAC ralkap sakhan cu CNDF nih an laak hnu ah SAC ralkap nih an rak thlaimi thanthar cu an hrawh i CNDF thantar an thlai, tiah theih a si. CNDF nih Tibual sakhan an laak khawh hnu ah sakhan sakremhnak an ngei i JCB hmang in hmunram thianhfelnak zong an tuah, tiah theih a si.
SAC ralkap nih an chuahtakmi Tibual sakhan chung ah an kaltakmi hriamnam zeimawzat cu CNDF nih an laak i, rawlruk chung ah facang dip 61 le eidin dang pawl zong an laak khawh. Cu pin ah innzuat saṭil vok le ar zong an rak laak hna kong CNDF nih an rak thanh.
CNDF Nih Special Operation An Kalpi Thla Khat Chung Ah Sakhan 3 An Laak Kong An Thanh. Shanram chaklei hriamtlai phu unau thum nih an rak thawkmi 1027 Operation cohlan le dirpinak langhternak ah Chin National Defense Force(CNDF) nih Special Operation an kalpimi ah tualchung hriamtlai phu cheukhat hna he sakhan 3 an laak khawh kong cathanh an chuah.
A luancia November 3, zinglei suimilam 4:30 ah CNDF, SR2, TDA, RCDF, ABSDF le MOD hriamtlai phu hna nih Khampat sakhan cu kah hram an rak thawk i a ni thumnak November 5 ah an rak laak. Cu pin ah November 7 ah Khampat khuachung Khah-Lah-Yah 228 sakhan zong an rak laak khawh. Cu sakhan laak kahdohnak ah cun SAC ralkap hriamnam zeimawzat zong an rak laak kong an thanh.
November 3 ni ṭhiamṭhiam ah CNDF, RKDF le SR hriamtlai phu hna nih Kalaymyo peng Myuaksii palik sakhan cu an kah i a thaizing November 4 ni ah an laak khawh. Cu palik sakhan laak kahdohnak ah cun SAC ralkap 10 an thi i tualchung hriamtlai phu hna nih hriamnam tam ngai zong an rak laak khawh, tiah an langhter.
November 14, zan ah CNDF nih Falam peng Tibual sakhan cu kah ding in timhlamhnak an ngei ko nain sakhan chung um SAC ralkap pawl cu Mizoram ah an zaam dih caah November 15, zinglei suimilam 4:30 hrawng ah Tibual sakhan cu an laak khawh. Sakhan chung ah ralkap pawl nih an kaltakmi hriamnam zeimawzat, facang dip 60 hrawng le innzuat saṭil vok le ar hna zong CNDF nih an laak, tiah CNDF nih cathanh an chuah. CNDF nih an laakmi hriamnam cheukhat hmanthlak le cathanh an chuahmi ca cu anmah social media facebook page ah an taar.
Khampat Khua Ah NUG Ukhruainak In Rianṭuan Hram Thawk An Timh. Tualchung hriamtlai phu hna nih ni 10 tluk an uk cangmi Khampat khua ah ukhruainak thar he rianṭuan cang ding in NUG nih timhlamhnak an ngei, tiah theih a si. Tualchung hriamtlai phu nih an rak laakmi Sagaing ramṭhen, Tamu peng Khampat khua ah ukhruainak thar he rianṭuan hram thawk an i timhnak kong cu NUG tang pengkomh ukhruaitu phu le hriamtlai phu sin in theih a si.
Kalay-Tamu lampi cung Khampat khuachung SAC ralkap sakhan cu tualchung hriamtlai phu nih ni 5 chung an rak kah i November 7 ah Khampat khua cu an rak laak khawh. “Khampat khua dirhmun cu a hlan bantukin a ṭha cang, siizung le sianginn zong NUG ukhruainak tang ah tharchuah in caan a rauh hlan ah a rannak in on khawh ṭhan kan zuam lai,” tiah Tamu pengkomh Battalion 2 in ṭuanvo ngei pakhat nih a chim.
“Khampat khuachung cu sang 9 in ṭhen a si i sang 5 cu sangbawi an i thim kho cang, sang 4 an taang i thimnak tuah ding in timhlamh lio a si. Atu dirhmun ah cun Tamu pengkomh, Tamu peng Pah-Ah-Phah hruainak in kalpi cuahmah a si rih,” tiah pengkomh Pah-Ah-Phah phu chungtel pakhat nih a chim.
Tualchung hriamtlai phu nih khua an laak hnu in le hmunram thianhfelnak an ngeih hnu in khuami zong an umnak ah an kir kho cio i SAC ralkap sakhan umnak no. 1 sang telh in sang dang zong ah chawdawr le dawr dang tete zong a hlan bantukin an on dih ṭhan cang hna, tiah tualchung mi nih an chim.
Shan ramkulh chaklei hriamtlai phu unau thum le ṭangṭi phu hna nih October 27 in an rak thawkmi 1027 Operation kahdohnak an kalpi hnu in khuapi 4 an laak lioah Sagaing ramṭhen Khampat, Kawlin le Chin ramkulh Rihkhawdar khua zong tualchung hriamtlai phu nih an laak khawh ve.