Update Thar; Ralhrang biathli chirhchanh in a tialmi ah ralhrang lei in officer pahnih 2 an thihnak kong!
===========
Tutan Thantlang ikahnak hi Khit Thit nih voi 3 hrawng a tial i a tial hmasa mi voi 2 cu Chin Media chirhchanh in a tial. Atu a tialmi hi ralhrang hna an biathli chirhchanh in a tial. Chin Media chirhchanh in a tialmi le ralhrang biathli chirhchanh in a tialmi hi ai thlautuk lo. Cu belte ralhrang biathli chirhchanh in a tialmi ah ralhrang lei in officer pahnih 2 an thihnak kong le a tlaumi 14 hrawng an umnak kong zong a langhter chih. Cucaah Khit Thit nih a tialmi hi a palh tuk lai lo dah.
Thantlang Khua Tilim Operation-3 Kahdohnak Ah SAC Ralhrang 30 Leng An Thi; 50 Leng Hliam An Tuar. Thantlang peng Tilim Operation-3 ah SAC ralhrang 30 leng an thih pin ah 50 leng hliam an tuar tiah CDF-Thantlang nih August 30 ni ah a langh ter.
“Tilim Operation-3 kahdohnak chung ah Chin ralkap tangti phu CNA minung 5, CDF-Zophei minung 5, CDF-Thantlang minung 4 le CDF-Hakha minung 1, an dihlak minung 15 nih ram le miphun caah nunnak an pek. SAC ralhrang meithal zun 5 le kuan zong kan lak chih” tiah CDF-Thantlang nih an langh ter.
SAC Ralhrang Major Kyaw Soe Min Telh In 37 An Thi I Hriamnam He 14 An Tlau. August 28, Thantlang kahdohnak ah SAC ralhrang Major (Bohmu) Kyaw Soe Min telh in 37 an thi i hriamnam he 14 an tlau tiah SẮC ralhrang chung i thawngpetu chirhchan in Khít Thit Media nih a tial.
August 28 kahdohnak ah khan a hmun ah SAC ralhrang a thi mi hi Major Kyaw Soe Min telh in 24 an si i hliam a tuar mi 60 chungin August 29 ah 13 an thi than. Hakha siizung ah a um mi chungin a zual ngai mi le a thi ko lai tiah zumh mi an um len tiah theih a si.
Tilim Operation 03 Ah SAC Ralkap 30 Leng An Thi i 50 Leng An I Hliam. Chin ramkulh, Thantlang peng, Thantlang khuachung ah a um mi SAC ralkap Battalion le a pawngkam ah a mi SAC ralkap sakhaan 5, khuachung hmun dang ah a um mi SAC ralkap sakhaan hme 2 le Hakha Thantlang karlak ah a um mi Auto tlang hna cu CNA, CDF phufonh nih an kah hna tiah CDF-Thantlang nih cathanh a chuah.
August 27-28 ah atu bantuk in CNA, CDF phufonh nih Thantlang khua hrambunh SAC ralkap Battalion le a pawngkam ah um mi sakhaan 5, khuachung hmun dang ah a um mi SAC ralkap sakhaan hme 2 le Hakha-Thantlang karlak ah a um mi Auto tlang hna cu Tilim Operation 03 min in kahdohnak an tuah hi a si tiah an langhter.
Kahdohnak chung ah SAC lei 30 leng an thi i 50 leng an i hliam, SAC ralkap meithal zuun 5 le kuanzen pawl zong an lak khawh tiah cathanh chung ah hmuh khawh a si. Kahdohnak chung ah CNA, CDF-Thantlang, CDF-Hakha le CDF-Zophei hna an i bawm i mipi hriamtlai phufonh lei in CNA ralkap 5, CDF-Thantlang hriamtlai 4, CDF-Hakha hriamtlai 1 le CDF-Zophei hriamtlai 5 tiah an zapi 15 nih ram le miphun caah an nunnak an pek tiah CDF-Thantlang nih August 30 ah thawng a thanh.
Tilim Operation-3 kahdohnak cu August 27 le 28 ah tuah a si i Thantlang khua chung ralhrang sakhan telh in a pawngkam umhmun an khuar nak sakhan 5 pin ah khuachung ah hmunhma an lak nak hmun 2 le Auto tlang hna ah kahdohnak an tuah hi a si. Hi kahdohnak ah CNA, CDF-Thantlang, CDF-Zophei le CDF-Hakha hna an i tel tiah kan theih.
Thantlang Kahdohnak A Hnubik Thawngpang; Thantlang SAC Ralhrang Le Mipi Hriamtlai Phu Karlak Kahdohnak Ah Ralhrang Bawi 1 Telh In 37 An Thi 14 Ralthuam He An Tlau. August 28, Chin ramkulh Thantlang khuachung kahdohnak ah SAC ralhrang bawi (Major) Kyaw Soe Min telh in minung 37 an thi i ralthuam he 14 an tlau tiah theih asi.
August 28, kahdohnak khan a hmun ah SAC ralhrang a thi mi zat cu ralbawi (Major) Kyaw Soe Min telh in minung 24 ansi tiah Khit Thit Media nih a langhter. August 29, khan SAC ralhrang hliam tuarmi minung 60 chung in minung 13 an thi chap. Atu dirhmun zongah hliamtuar Hakha sii-inn pi aa thlopbul mi chungin a thi dingmi zong an um rih lai tiah zumhnak an ngei.
SAC Ralkap L.T Colonel 1 Le Captain 1 Cu Ralkap Phungning Lo Un An Um Tiah A Sangcem Mi Thong Le Thihdan Pek An Tong. Yangon ramṭhen, Mingaladon ralkap Medical University in Sii lei doctor Captain Ye Yint Shwe cu online in SAC bawizik Min Aung Hlaing thatlonak kong a tarlangh tiah SAC biaceihnak zung nih Thihdan an pek. L.t Colonel Aung Khant zong mipi ralkap sin ah thawng a petu a si tiah thong kum 40 tla ding in dan an tat tiah Mizzima Daily nih a chim.
Ralkap Medical University ah sii lei he pehtlai in Mingaladon Medical Univesity batch 16 chuak Sii lei (M.Med.Sc) a kumhnihnak a cawn lio ah ralkap siibawi Captain Ye Yint Shwe cu Min Aung Hlaing soiselnak kong online ah a post ruang ah ralkap biaceih zung nih August thla ah a sangcem mi thihdan an pek hi a si.
Thihdan pek a tong mi Captain Ye Yint Shwe hi NUG Ministry Health & Education Minister Dr. Zaw Wai Soe he naihniam chungkhat an si ruang ah mah bantuk in a sang cem mi thihdan an pek hi a si ko tiah ralkap lei in thawngpe nih an chim. Amah bantuk in August thla chung ah Ralkap Medical University batch 4 sianginn chuak L.t Colonel Aung Khant zong mipi ralkap sin ah thawng petu a si tiah lunghrinhnak he ralkap biaceih zung nih thong kum 40 tla ding in nawl an chuah.
SAC ralkap nih hramhram in uknak a lak hnu ah anmah chung in a duh lo tu ralkap tampi an um i, atu lio Myanmar ram buainak le harnak ah SAC lutlai duhlo ruang ah CDM a tuahtu ralkap le SAC chung ah buainak tampi a um, mah le mah lunghrinh ruang ah rianphuah le thongthlak a tong mi ralbawi ngan an tam ngai tiah theih a si. Credit: The Chinland Post, The Chin Post, Lungmili Media