Kum 2 Chung Dothlennak Ah SAC Ralkap 30,000 Hrawng An Thi!
===========
Mipi dothlennak kum 2 chung ah kahdohnak voi 9,900 hrawng a chuak i SAC ralkap 30,000 hrawng kan thah khawh hna tiah NUG nih a thanh. SAC kekal ralkap chung ah Light Infantry Battalion (LIB) 214 le Infantry Battalion (IB) 307 a um i vawlei lei ralkap 65,000 hrawng a um lai tiah an ruahdamh. Vanlei ralkap, tilei ralkap le Reserve (လက်ရုံးတပ်) telh in ralkap thazang hi a zapi 225,000-240,000 hrawng an um kho.
Kum 2 chung dothlennak ah ralkap thazang 12.5% hrawng hi a sung. Kahdohnak chung ah a thi mi ralkap leng ah a zaam mi, kahdohnak tuah ding lungtlin lo ruang ah thongthlak mi zong hi a thong in an um lai tiah ruahdamh a si.
Dothlennak chung ah SAC ralkap a thazang a der thluahmah kha hmuh khawh a si i pyusawthi, pyithusit, BGF, ralkap pension pawl, kum tling lo ralkap pawl a khawmh hna lawng siloin ralkap nupi pawl, Non-CDM pawl zong hriam a tlaihter hna i kahdohnak ralram ah hman ding timhtuahnak a ngei. Dothlennak a hramthawk kum 1 chung ah SAC ralkap sakhaan 28 lawng an rak lak khawh nain a kum 2 nak ahcun sakhaan 107 tiang an lak khawh i kum 1 chung ah sakhaan lak kahdohnak alet 3 leng an tuah khawh.
Sagaing, Magway, Mandalay, Yangon, Bago, Naypyitaw hna lungrual tein kahdohnak voi 70 leng an tuah khawh i voi 65 hi sml 24 chung ah kahdohnak an tuah mi a si i hmakhat te ah kahdohnak tuahṭi khawh mi a si caah kahdohnak lei ah kan ṭhangcho ti zong kha hmuh khawh a si tiah NUG nih a langhter.
Dothlennak thazang a ṭhawnnak hmunhma pawl ah SAC ralkap hriamngan 120MM, 81MM, 60MM, Machine Gun pawl le kuanzen pawl zong an lak khawh i Sagaing ramṭhen, Homalin peng, Shwepyiaye khua kahdohnak ah SAC Helicopter 1, Mese kahdohnak ah SAC K-8 vanlawng 1 an hrawh khawh hna i Chin ramkulh, Hakha peng, Chuncung kahdohnak ah Tank 2 an hrawh khawh.
Mipi dothlennak chung ah mipi sin aa rak fonh mi (CDM) ralbawi pawl an um i Kayah ram, Mese kahdohnak ah BGF B1004 le B1005 hna cu dothlennak phu lei an ṭang. Dothlennak chung ah mipi lei aa rak fonh mi ralkap 3,234, palek 10,536 tiah an zapi 13,771 an um cang i zohfelnak tuah cuahmah lio mi ralkap le palek 14,000 leng an um.
CDM ralkap le palek 400 leng cu PDF hriamtlai he bawm in rian an ṭuan hna i SAC ralkap sin ah biakamnak a tuah i mipi a hrem mi hna cu phungning tein dantat an si lai tiah NUG nih ralrinnak a thanh.
Yinmarbin Ah Thing A Fir Mi SAC Ralkap An Kah Hna, 5 An Thi. Sagaing ramṭhen, Yinmarbin peng ah thing a fir mi SAC ralkap pawl an kah hna i 5 an thi, hriam zong an lak khawh tiah Kyaukgyi PDF nih thawng an thanh. September 6 zinglei sml 8:00am hrawng ah Yinmarbin peng, Sithu thinghual ah thing a fir mi SAC ralkap 100 hrawng cu Yinmarbin pengkomh B21, B22, B23 le ULF hna bawm in an kah hna, kahdohnak hi sml 2 leng a rau.
Thing a fir mi ralkap pawl hi Yinmarbin peng Kyaukkone khua ah ni 3 hmunhma an khuar i September 6 zinglei 8:00am hrawng a leng an chuah lio ah an kah hi a si. Kahdohnak chung ah ULF lei in 6 thinphan awk um tuk lo in an i hliam i tluang tein an kir kho ṭhan tiah theih a si. Kahdohnak chung in an lak khawh mi hriam hna cu; 1. MA-1 zuun 2, 2. MA-2 zuun 1, 3. Kuanbawm 17, 4. Icon 1, 5. 56 kuan 400, 6. Phone 1 hna an si tiah theih a si.
Sagaing ramṭhen chung dothlennak phu pawl bawm in Drone Operation an tuah i SAC ralkap le pyusawthi tampi an thi, tampi an i hliam tiah Myeiktila PDF Drone phu nih thawng an thanh. Sagaing ramṭhen, Myinmu peng, Htisawng khua ah a um mi SAC ralkap sakhaan cu August 26 zinglei sml 8:15am hrawng ah Drone in bom an thlak hnawh hna i SAC ralkap 10 an thi, 7 an i hliam tiah an fehter.
Cu ni zaan sml 10:00pm hrawng ah Ayardaw peng, Ngwedwin pyusawthi khua ah SAC ralkap sakhaan cu an doh ṭhan hna. Zuu a ri i aa hilh mi SAC ralkap le pyusawthi 30 hrawng an thi ṭhan i tampi an i hliam tiah theih a si. August 29 zinglei 10:20am hrawng ah Wetlet peng, Sainainggyi lam kuihnak ah gate ser in mawṭaw umkal mi pawl sin in tangka a hal mi SAC ralkap pawl cu bom lung 18 an thlak hnawh ṭhan hna i SAC ralkap 3 an thi, 5 an i hliam tiah theih a si.
August 30 in September 1 tiang ni 3 chung pehzulh in Mandalay ramṭhen, Sinku peng, Hinta khua pyusawthi sakhaan cu Drone in lung 42 an thlak hnawh ṭhan hna i SAC ralkap le pyusawthi 16 hrawng an thi, 8 an i hliam tiah theih a si.
September 4 zaanlei sml 4:00pm hrawng ah Sagaing battalion 33 in SAC ralkap mawṭaw 2 cu Insa khua chaklei nawncek lak ah an tap i an nam len lio ah Drone in an doh ṭhan hna i 8 an thi, tampi an i hliam tiah cathanh ah an langhter. Kahdohnak chung ah Lighting Drone Force- We everywhere, Eagle Guerrilla Force, Shar Htoo Waw, Drop for Justice, Demo Pauk Kwe, Fight For Freedom, NDRF le adang PDF phu tampi an i bawm hna tiah theih a si.
Shweku Khua GAD Zung Meeting An Tuah Lio Ah Drone In Bom An Thlak Hna I 2 An Thi, 9 An I Hliam. Kachin ram, Shweku khua GAD zung cu Drone in bom an thlak hnawh i SAC ramchung lei Ministry zung rianṭuantu 2 an thi i 9 nak tlawm lo an i hliam tiah K-PDF nih thawng an thanh. September 6 ah Shweku peng GAD zung ah Meeting an tuah lio ah Drone in an doh hna hi a si.
September 6 zinglei sml 11:00am ah voikhat, 11:30am ah voikhat tiah Drone in voikhat an doh hna ah bom lung 4 an hman i atu bantuk in GAD zung rianṭuantu pawl an thih le an i hliam hi a si.
Cubantuk in bom thlak ruang ah SAC ralkap pawl nih khuachung phihkharnak hna an tuah tiah an langhter. Shweku khua GAD zung a dohtu K-PDF nih September 1 zong ah Kyaukgyi khua SAC ralkap le palek sakhaan an doh hna i SAC ralkap 5 an rak thi. Credit: The Chinland Post