Nikhat Chung Mindat Ah Kahdohnak Voi 2 A Chuak!
===========
Mindat khuachung ah SAC ralkap le CDF-Mindat karlak ah kahdohnak a chuak tiah theih a si. August 29 zinglei le zaanlei ah kahdohnak a chuah hi a si tiah HKL (Mindat) nih Social ah a langhter. Mindat khua, Bawathit sang le ni chuahlei palek sakhaan kha CDF nih an va kah hna hi a si.
CDF-Mindat nih SAC kuttang mawṭaw 1 an lak hnu ah atu bantuk in kahdohnak pehzulh in a chuah hi a si. Cun August thla zarh donghnak zong ah kahdohnak voi 2 a chuak i SAC chungtel 2 an thi tiah CDF-Mindat nih August 28 ah a thanh. Mindat ah khuachung kahdohnak atu le atu a chuah caah khuami hna kha CDF he nan i pehtlai tiah an tlaih mi hna zong a um.
Kanpetlet Ah Non CDM Ngandamnak Zung Rianṭuantu 60 Blacklist Cazin Ah Khumh An Si. Kanpetlet peng, cozah siizung rianṭuantu Doctor telh in ngandamnak zung rianṭuantu Non CDM minung 60 cu SAC ralkap lei ṭang minung an si tiah Backlist ah an min kan khumh hna tiah peng mipi uknak phu nih August 28 ah thawngthanhnak a tuah. Cu chung in ngandamnak zung rianṭuantu pa 13, nu 47 an si. Doctor pakhat zong aa tel.
“Kanpetlet peng chung ah Non-CDM pawl hi a tlawmte an si. Atu bantuk in blacklist thanhnak kan tuah chan cu, tuan ahcun, CDM le Non-CDM pawl thleidan khawh an si lo. Hmundang khual an tlawn tik ah CDM kan si tiah an chim. A tak ah CDM an si lo. CDM a tuah lo mi Blacklist cazin thawngthanh hnu cun, fiang tein thleidan khawh an si cang lai” tiah Kanpetlet peng mipi uknak phu nih Mizzima News ah an chim.
July 4 ni zong ah Kanpetlet peng Education zung in Non-CDM minung 322 cu Blacklist ah an min an khumh cang hna. Atu Blacklist min aa tel mi SAC minung hna cu CDF gate in a leng lei umkal khawh an si lai lo. Kanpetlet peng, khuate 100 leng ah ngandamnak zung in CDM a tuah mi 100 hrawng an um tiah theih a si.
Gangaw Ni Tlaklei Kahdohnak Chung Ah SAC Ralkap 3 An Thi, 8 Nak Tlawm Lo An I Hliam. Yaw hmunhma, Gangaw khua ah SAC ralkap le mipi hriamtlai phufonh hna karlak ah kahdohnak a chuak i SAC lei 3 an thi, 8 nak tlawm lo an i hliam tiah Yaw PDF sin in thawng theih a si.
August 27 zaanlei ah Saidu khua in Gangaw ni tlaklei ah a lut mi Gangaw hrambunh LIB 50 kuttang SAC ralkap pawl telh in pyusawhti 80 hrawng le CDF-KKG, CDF-Hakha, YPDF phufonh hna karlak ah kahdohnak a chuak.
“Anmah lei hliam a tuar mi chung in rank a sang mi bawi pakhat zong aa tel. Pathum an thih hi cu a fiang” tiah YPDF thawngthanhnak lei rianngeitu Lu Hla nih a chim. Cun SAC LIB 50 nih an kah mi hriamngan ruang ah khuami nuva an i hliam i an thlop hna lio a si tiah theih a si.
Kalaymyo Ah Thilman Le Datsii Man A Tum Than. Sagaing ramthen Kalay-YeU motor lampi a awn hnu in Kalaymyo khuachung ah thil man le Datsii man cu a hlan ning bantuk in a man an tum than cang tiah tualchung mi hna nih an chim.
SAC ralhrang le mipi hriamtlai kar kahdohnak ruang ah Kalay-YeU motor lampi cu a luan cia August 5 in a caan rikhiah in an phihkhar ruang ah Kalaymyo khuachung ah thilman a rak kai. “Aluan cia zarh chung ah Datsii langkhat ah 5000 in kan cawk i a tu ah cun 3000 tluk in cawk khawh a si cang. Arti punkhat ah 700 zong a tu ahcun 400 in kan cawk khawh cang”tiah Kalaymyo khuami pakhat nih a chim.
“Datsii man hi a tamdeuh cu a hlan sining tein an zuar cang hna, motor hi an dihlak in an lut kho rih lo, Pung in Datsii a caw mi tu cu an pe rih hna lo, motor cycle tu cu Full in an kan rawn piak ko. Pakhat tete in i hngah hau ti lo” tiah a cunglei khuami pakhat nih a chim.
Kalaymyo Sangchung Cheukhat Ah Vok Thi Mi An Hlonh Ruangah Pawngkam Mi Harnak An Tong. Sagaing ramthen Kalaymyo khuachung ah July thla thok in a tuni tiang Vok zawt in a thimi an um peng rih caah Vok a thi mi cu sangchung tilu hor ah an hlonh sawhsawh caah pawngkam mi harnak an tong tiah theih a si.
“Cheukhat cu an Vok zuatmi 10 tiang an thi, kan mah Vok zong fa a hrinnak thla 2 hnu ah rawl ei duh lo in a um i saram siibawi kan zoh ter nain a thi thiamthiam. Kan hawi lei dang Vok zong an thi hna, Vok a thimi cheukhat cu Voksa zuar mi hna nih 20,000 in an cawk hna tiin kan theih caah Voksa zong kan caw duh ti loh”tiah Kalaymyo khuami pakhat nih a chim.
“Vok a thi mi cu cheukhat nih pawngkam tilu hor kuangah an hlonh sawhsawh, August 29 ni zongah Upoh tiva ah Vok a thimi an hlonh mi cu a nam tuk caah pawngkam mi hnahnawh nak a pek hna. Vok a thi mi pawl cu vawlei ah khur cawh in phum cio hna seh law pawngkam mi ca zong ah a tha bik lai” tiah a cunglei upa nih a chim.
Kalaymyo Datsii Le Thilman A Tla Thluahmah Cang. Kalay-Kalaywa-Monywa (Mahamaing) lam an phih mi cu awn than a si hnu in nikhat hnu nikhat thilman a tla,ṭum thluahmah cang tiah khuachung um mi sin in theih a si.
Kalay-(Mahamaing lam) hi August 15 in SAC ralkap le mipi ralkap kahdohnak ruang ah phih/khar a rak si caah Kalaymyo le Chimram ah thil a kal kho ti lo caah Datsi le thilman a rak kai ngai. Mah lam phih lio ah cheukhat cu Monywa-Gangaw Hakha in Kalaymyo lei lamvel in an kal um hna.
August 26 in Mahamaing lam an awn ṭhan caah lam pih chung datsi dawr lian deuh/min ngei mi dawr hna ah datsi 1 litre 5000 mmk, a lenglei dawr hme deuh ah cun 1 litre 10000 tiang a phan. Ariti pum khat 700MMK tiang a phan. Atu Mahamaing lam an on hnu cun, Datsi 1 litre ah 3000MMK le arti pumkhat 300MMK a si cang tiah theih a si. Credit: The Chinland Post