Myanmar Now Hmanthlak Thawnglatu Cu Kum 20 Thong Thlak Ding In SAC Nih Bia An Ceih!
===========
Myanmar Now media ah hmanthlak thawnglatu(Photo Journalist) rian a ṭuanmi Sai Zaw Thaik cu September 6 ah Insein thonginn ah kum 20 thong thlak ding in le rianhrang ṭuanter dingin bia an khiahpiak, tiah Myanmar Now nih a langhter. Sai Zaw Thaik cu Rakhine ramkulh, Mocha thlichia a rak hran lioah thawng laak dingin a kal i May 23 ah Sittwe khuapi SAC ralkap nih an rak tlaih.
Myanmar Now nih a langhter ningah Sai Zaw Thaik hi zei section in dah taza an cuai ti cu fiang in hngalh a si lo nain kokek harnak he aa pehtlai mi upadi, i pehtlaihnak upadi le rampi limhang zorternak upadi in taza an cuai, tiah a langhter.
Sai Zaw Thaik cu SAC ralkap nih an tlaih thla thum a rauh hnu, September 6 ah a voikhatnak Insein biaceih zung ah chuahpi a si i kum 20 thong thlak ding in le rianhrang ṭuan dingin bia an khihpiak colh. Biaceihnak an tuah lioah sihni auh zong an sianh lo i khoika biaceih zung hmanh ah kai ṭhan khawh lo ding in an tuah, tiah theih a si.
Myanmar Now media ah rian a ṭuanmi hna hi SAC nih an voihnihnak an tlaihnak a si cang. A voikhatnak cu 2021 February 28 ah Yangon khuapi, Maynikone ah mizapi nih lam an rak zawh lioah thawng a rak latu Ke Zun Nwe cu an rak tlaih cang.
SAC nih nawlngeihnak an laak hnu in thawng latu 150 leng an tlaih cang hna i cu chung ah 100 leng an luat cang nain zeimawzat an taang rih. Hmanthlak thawnglatu Sai Ngaing cu SAC ralkap kut in a nunnak a rak liam.
Kum Hnih Chung Dohthlennak Ah Kahdohnak Voi 9,900 A Chuak I SAC Ralkap Lei In 30,000 Hrawng An Thi. Kum hnih fai dohthlennak chung ah kahdohnak voi 9,900 a chuak i SAC ralkap lei in 30,000 hrawng an thi, tiah NUG nih an thanh.
SAC ke ralkap chung ah ral a tu kho mi hi minung 65,000 hrawng an si i van ralkap, ti ralkap le zung rianṭuantu hna telh in ralkap thazaang dihlak hi minung 225,000-240,000 hrawng an si lai. Kum hnih chung dohthlennak ah SAC ralkap zatuak 12.5 an thi cang, tiah NUG nih cun an thanh.
SAC Ralkap chung in a zaammi le raltuk huam ti loin cunglei nawl al ruangah thong a tlami zong hi a thong leng an si lai. Cu pinah kum hnih chung ah SAC ralkap thazaang a zor tuk caah pyusawhti, pyitusit, ramri hngak ralkap, ralkap hlun, kumtling lo ralkap thar zeimawzat an laak lawng si loin ralkap nupi hna, Non-CDM hna tiang in hriamnam an pek hna, tiah NUG nih cun an langhter.
A hlan ah cun SAC ralkap cu a kham lawng in kan rak kham hna nain atu cu kan luhhnawh in kan nam ve cang hna lai. Anmah lei zong an thazaang a der tuk cang caah SAC ralkap headquarters Naypyidaw um palik le ralkap zong thazaang chap in a kham lawng in kham an i tim cang, tiah NUG nih cun an langhter. Dohthlennak kum khat chung ah SAC ralkap sakhan 28 lawng kan laak khawh i, a kumhnihnak ah sakhan 107 kan laak khawh. Kum khat chung ah SAC ralkap sakhan let thum leng kan laak khawh, tiah an thanh.
Kum hnih chung ah SAC ralkap hriamhme le hriamngan tampi kan chuh khawh hna leng ah Humalin peng, Shwepyiaye khua kahdohnak lioah SAC ralkap Helicopter pakhat, Mese khua kahdohnak ah K-8 Helicopter pakhat kan hrawh khawh. Chin ramkulh ah Tank pahnih kan hrawh khawh fawn, tiah an langhter.
SAC ralkap nih nawlngeihnak an laak ruang ah CDM a tuah mi SAC ralkap hi minung 3,234 an si i, palik hi minung 10,536 an si, an dihlak minung 13,771 an si. Ṭha tein chekhlatnak kan tuahmi dihlak hi palik le ralkap fonh ah 14,000 leng an phan. Cu chung ah rank sang pipi zong an i tel, tiah an thanh.
CDM ralkap le palik 400 leng hi PDF ah an lut i SAC lila an doh ṭhan. SAC lei ṭang in rian a ṭuanmi le mizapi cung ah sualnak ṭha lo a tuahtu poh cu upadi ningin dan tat an si lai, tiah NUG nih an thanh.
Indaw Ah Tualchung Mi Pahnih Cu Thih Hlan Lo Thong Thlak Ding In SAC Nih Bia An Khiahpiak Hna. Sagaing ramṭhen, chaklei Indaw peng SAC biaceih zung ah kum 20 hrawng nu pakhat le pa pathum cu September 2 ah SAC nih bia an ceih hna i, pahnih cu thih hlan lo thong thlak ding in biaceihpiak an si pinah midang pahnih cu kum saupi thong thlak dingin bia an khiahpiak hna, tiah Indaw Revolution – IR nih September 4 ah an thanh.
Zaw Myo Naing, Tin Maung Win, Kyaw Thet le Thida Win hna cu kum 20-30 tluk mino an si i 2023 July thla ah Indaw khuapi luhnak chek gate ah SAC ralkap nih an rak tlaih hna. PDF an ṭanpi hna tiah sualpuh an si ruangah Zaw Myo Naing le Tin Maung Win cu ralhrang dohnak upadi, section 50(j), 52(a) in taza an cuai hna. Cun, Kyaw Thet cu rampi rawiphiarnak section 124(c) in taza an cuai i, Thida Win cu section 50(a) le (b) in taza an cuai ve, tiah theih a si.
Cu hnu thla hnih a rauh hnu, September 2 ah Zaw Myo Naing le Tin Maung Win cu thih hlan lo thong thlak ding in le a dang pahnih cu kum 7 veve thong thlak dingin bia an khiahpiak hna. Hi kong ah Indaw Revolution – IR in ṭuanvo ngeitu nih cun hi hna pali hi PDF he pehtlaihnak a ngeimi an si hrimhrim lo, tiah RFA ah a chim. “Thong thlak a tongmi pali hna chung ah Zaw Myo Naing le Kyaw Thet lawng hi Indaw pengmi a si i a dang pahnih hi Sagaing ramṭhen thlanglei in a rami an si. An konglam hlathlai ding zong a har ngai,” tiah a chim chap.
Sagaing ramṭhen, Indaw telh in peng 14 cu SAC ralkap nih 2023 February thla thawk in martial law tangah a chiah i Indaw khuapi luhnak hmun thum cu palik le ralkap nih an hngah, tiah theih a si. SAC kuttang Telegram channel nih cun, Nah Mah Khah kuttang biaceih zung nih minung 235 bia an ceihpiak hna i thong an thlak cang hna, tiah an langhter. Credit: The Chin Post