KIA Brigade 6 Hmunhma Bom An Thlak Ruang Ah KIA Chungtel 5 An Thi!
=========
Shan ram chaklei, Muse peng ah KIA Brigade 6 umnak cu October 20 ah SAC ralkap nih vanlawng in bom an thlak caah chungtel 5 an nunnak a liam tiah The Irrawaddy Burmese nih a langhter. Muse pemg in meng 105 aa hlatnak, Tima khua ah hmunhma a khuar mi KIA Brigade 6 cu October 20 chun sml 2:00pm ah SAC ralkap nih Jet vanlawng pakhat in bom voi 2 a thlak.
KIA chungtel 1 nih “KIA ralkap 5 an nunnak a liam. Vanlawng in bom a rak thlak. Jet Fighting in a rak thlak caah aa hliam mi an tam” tiah The Irrawaddy Burmese ah a chim. SAC leiṭhang Telegram Channel pawl nih cun KIA nih ralkap sakhaan an rak doh caah vanlawng in an lehrulh ve hna tiah an langhter.
October 19 ah Tuluk-Myanmar ramri, Muse pengkomh, Monpaw hmunhma ah a um mi SAC ralkap sakhaan pakhat cu KIA Brigade 6 kuttang Battalion 36 nih an lak hnu a thaizing ah atu bantuk in bom an thlak hna hi a si. Cu sakhaan lak kahdohnak ah SAC ralkap lei 20 leng an thi i hriam tampi an lak khawh tiah an rak langhter.
TNLA le SAC Ralkap Karlak Kahdohnak Ah SAC Ralkap A Thi Mi An Tam. Shan ram, Nankhan khua le Mandalay ramṭhen, Mogok peng ah PSLF/TNLA le SAC ralkap karlak, October 21 ah kahdohnak a chuak i SAC ralkap lei a thi mi an tam, hriam tampi zong an lak khawh tiah TNLA lei nih an chim.
TNLA Brigade 1 hmunhma a si mi Nankham peng Hangyi khuate lei ah a lut mi SAC ralkap IB 427 le TNLA karlak ah kahdohnak a chuak i SAC ralkap ruak le hriam pawl tampi TNLA nih an lak. Cun TNLA Brigade 2 hmunhma, Mogok peng ah SAC ralkap Brigade 44 kuttang LIB 102/104, LIB 88 le TNLA ralkap hna cu Nyaungkone khua pawng ah kahdohnak a fak i SAC lei ralbawi telh in a thi mi an tam.
Kahdohnak chung ah SAC ralkap lei nih Nyaungkone khua lei ah hriamngan voi 36 an kah bantuk in Muse, Tima le Lwaimouk khua lei ah Nanphetka ralkap nih hriamngan voi 5 tiang an kah tiah theih a si. October 21 zaanlei sml 4:00pm hrawng ah Tada Oo vanlei ralkap nih Jet vanlawng 2 in bom an thlak caah Nyaungkone mipi inn 10 nak tlawm lo a kaang tiah Myanmar Now nih a langhter.
Yinmarbin Peng, Ye-oh Khua Pawng Kahdohnak Ah SAC Ralkap 10 An Thi. Sagaing ramṭhen, Yinmarbin peng, Ye-oh khua pawng kahdohnak ah SAC ralkap 10 nak tlawm lo an thi tiah ULF nih an thanh. October 19 zinglei sml 8:00am hrawng ah Pale peng, Zeephyokone khua in a rak chuak mi thazang 180 hrawng SAC ralkap le pyusawthi pawl cu Yinmarbin peng, Ye-oh khua an phak ah PDF phu pawl nih
Meters 50 aa hlatnak in an rak kah hna caah sml 2 leng kahdohnak a rau. Kahdohnak chung ah SAC ralkap 10 nak tlawm lo an thi i 20 leng hliam an tuar. Kahdohnak hi ULF nih an tuah mi a si i mipi hriamtlai lei 1 a ban ah fak tuk lo in aa hliam tiah theih a si.
Pakokku-Kamma Lam Kahdohnak Ah SAC Ralkap 16 An Thi. Magway ramṭhen, Pakokku peng, Pakokku-Kamma lam ah SAC ralkap mawṭaw pawl bomrap an puah hnawh hna i SAC ralkap 7 an thi tiah The Red Revolters (Pakokku) phu nih an thanh.
October 22 zinglei sml 8:30am hrawng ah, Pakokku khua in Kamma Khualei a rak chuak mi SAC ralkap mawṭaw 20 hrawng cu Pakokku-Kamma lam hmun khat ah bomrap lung 2 in an puah hnawh hna i mawṭaw pakhat cu lam thlang ah a tla, SAC ralkap 4 a hmun ah an thi i tampi an i hliam caah hliam a tuar mi pawl kha Pakokku sizung lei an kalpi hna i sizung ah pa 3 an thi chap tiah theih a si. Cubantuk in Pakokku-Kamma lam, Kandaw khuate pawng ah SAC ralkap mawṭaw pawl bomrap 3 in an puah hnawh hna i 9 an thi tiah Pakokku Special Task Force nih an thanh.