Ministry Of Boarder Affairs Kuttang Um University Le Degree College Ah Ralkap Training Pek An Si Lai!
===========
Myanmar ram hmunkip kahdohnak a chuah cang hnu in SAC ralkap thazang a zor tuk ruang ah SAC nih Ministry Of Boarder Affairs kuttang um University, Degree college sianghleirun cacawn minung 500 leng cu atu October thla chung ah ralkap training pek ding in timhtuahnak a ngei cang tiah theih a si.
Mah sianghngakchia hna chung in Sagaing ramṭhen, University of the Development of the National Races of the Union (Sagaing-Ong Taw) le Nationalities Youth Resources Development Degree Collage (Dagon Seikkan-Yangon) Degree college ah cacawn mi hna an si. Ministry of Boarder Affairs kuttang um sianginn pawl ah ralkap traning pek ding in Ministry of Defence sin ah October 6 ah Boarder Affairs zung nih thawngthanhnak a tuah cang tiah Myanmar Now nih a tial.
University le Degree College cio ah traning tuah ahcun pawngkam hunhimnak a um lo caah ralkap training pek tawnnak hmun le sianginn ah training pek ding in timhtuahnak an ngei. Ralkap training a kai ding mi sianghngakchia thim mi ah Sagaing in minung 187, National Races of the Union and Nationalities Youth Resources Development Yangon in minung 192, National Races of the Union and Nationalities Youth Resources Development sagaing in minung 193, an dihlak mino 572 an si.
Ministry of Boarder Affairs kuttang a um mi University, Degree college cacawn mi hna hi hlan lio tein ralkap bantuk in thutdir ningcang, le ralkap uknak phun in sianginn ah phunglam an ser cang mi a si tiah kum 9 mino a si lio tein No. 2 Mindat Nahtahlah နတလ sianginn a rak kai cang mi ralkap Captain Tun Myant Aung nih a chim.
Kawlram dihlak ah Na-Ta-La sianginn 29 a um i, Chin ramkulh chung ah a tambik a um i a chang ah Kachin ram a si. Chin ramkulh chung ah hin Na-Ta-La sianginn 9 le nu kutzung thiamcawnnak zong a um tiah Chin ramkulh ramri le humhimnak zung cazin ning in theih a si.
Ye Khua Ah SAC Ralkap An Kah Hna, Captain 2 Telh In 27 An Thi. Mon ram, Ye khua ah a um mi SAC ralkap pawl cu dothlennak phu pawl nih an kulh hna i karceh in an kah hna caah Captain 2 telh in ralkap 27 an thi i meithal zuun 13 le kahdohnak thilri pawl zong an lak khawh tiah theih a si. October 20 zinglei ah, Ye khua hlei ah hmunhma a khuar mi SAC ralkap 100 leng cu dothlennak phu pawl a si mi Daw Na phu, YGF,MSRF le ABSDF Battalion 1 hna nih kulh in an kah hna caah Captain 2 telh in SAC ralkap 27 an thi tiah PVTV nih a langhter.
Kahdohnak chung ah dothlennak phu lei 12 an i hliam ve i 2 hi fak ngai in an i hliam tiah theih a si. Kahdohnak chung in SAC ralkap meithal tampi, bom pawl le hriam tampi leng ah phone 7, Icon 2 le Icon two Way Radio 3 hna an lak khawh tiah theih a si.
Sekan Khuachung Ah Hmunhma A Khuar Mi SAC Ralkap Pawl Hriam Cheukhat CNDF Nih An Lak. Sagaing ramṭhen, Kalay peng, October thla hramthawk lei ah a cang mi SAC ralkap le mipi hriamtlai phu hna karlak, Sekan khua kahdohnak ah SAC ralkap lei hriam cheukhat cu CNDF nih an lak khawh tiah The Rili Voice nih a langhter.
“Kahdohnak a chuah in ni 10 a rauh hnu ah hmunhma zohfelnak an va tuah lio ah an hmuh mi pawl an si. Tuan deuh ahcun SAC ralkap lei nih Sniper in an kah lengmang hna caah an rak la kho lo nain CNDF Brigade 1 Commander hruainak in an lak khawh ṭhan” tiah CNDF lei ṭuanvo ngeitu nih The Rili Voice ah a chim. SAC ralkap pawl sin in an lak khawh mi hna cu 40MM 12, 5.56 kuan 488, Bomb 1, 9MM kuan 28 le ralkap Uniform hna an si.