UN Lei Thawngpang Bultan
=======
Atu lio hi UNHCR nih 2010, 2011, 2012 le 2013 pawl RSD, RST, OPE le DHS a auh cuahmah hna ti thawng kan theih. Kan phone kan i ralring cio dih hna lai. Hlathlainak ca kan tial hna lai i kan phone number update kan pek dih hna lai. (Catial tikah chungkhar dihlak UN card a herh lai).
Min aa mih i a thiang cangmi zong an case sining in a auh cuahmah hna caah kan phone tlaih kan daithlang lai lo. Kan case kan i ralring cio dih hna lai. Fiang deuh in theih a duh mi nih CRC zungah mah pumpak rat in ruahnak hal le hlathlai khawh asi zungzal.
2019 le 2020 ah UN Online nan rak sok i chawnh lo mi kha November le December 2023 ah min cazin kan lak. Cu min cazin kan lak mi cu UN ah kan up cang i UN lei nih thla 3 in thla 6 kar ah register tuah ding in bia an kan kamh.
Zaangfah kan nawl hna i 2019 le 2020 ah UN a sok ko nain min cazin a pe manh lo mi caah a tu 31 January 2024 hi a hnu bik min cazin pek khawh nak caan a um. A pe rih lomi nih mah pumpak in CRC zungah kal in pek khawh asi. (CRC Card aa tlaih mi asi hrim hrim lai).
2013, 2014 le 2015 UN card chuh ciami pawl zong UN nih appointment pe in interview an auh cuahmah hna. Nawlnak ca kan tial tikah kan UN Card Number (791-13C00000) le kan Id number (791-00000000) tbk kha kan i chinchiah a herh. Cun card chuh ciami zongnih kan phone number update kan pek dih hna lai.
Welcome corps in US lei i laknak zong an on cang caah fiang deuh in theih duh mi caah CRC zungah hlathlai le ruahnak hal khawh peng asi. CRC zung ah hlathlai le ruahnak hal kan rat tikah kan CRC card, UN card, birth certificate le a dangdang ken ding ah herh mi kan i ken dih hna lai. Luaite, Chairman, CRC, Malaysia
Hakha Ah Electric Mei Caan Hmaan Tein A Rat Lonak Zarh Khat Tluk A Si Cang. Chinram khuapi Hakha khuachung ah electric mei caan hmaan tein a rat lonak zarh khat tluk a si cang, tiah Hakha um mi hna sinin theih a si.
SAC nih nawlngeihnak an laak hnu in kum khat leng chung cu chunzan in electric mei an rak pek ko nain a hnu deuh cun SAC kuttang electric zung nih Hakha khuachung ah caan rikhiah in mei an pek. Sii-inn pi lei a kalmi line paoh cu mei an hmit lo nain dawr thar sang lei line a kalmi paoh cu rikhiah in mei an pek, tiah tualchung mi pakhat nih The Chin Post ah a chim.
Dawr thar, Cawbuk sang lei kap line paoh cu zing suimilam 9:00-12:00 kar mei an rak pek i 12:00-3:00 kar an hmih. Zanlei 3:00-zing 9:00 tiang an pek ṭhan. Cu bantuk in mei an rak peknak hi caan sau ngai a si cang.
Cu hnu ah zing suimilam 9:00 in chun ni tlak le zan khuadei electric mei an van ṭhan i zing suimilam 6:00-8:00 kar an hmih ṭhan tawn. Asinain atutan mei an pek ning cu hngalh khawh a si ti lo. An duh ah an van an duh ah an hmih lengmang, tiah tualchung mi pakhat nih cun a chim. Hakha um mi nih cun, rawlchuannak ah electric mei cu an hman ngai mi a si i, rawlchuan caan i mei an ngeih tawn lo caah laklawh ngai in an um tawn kong an chim.