Tutan kan dohhthlennak hi a ho nu a ho pa hmanh nih mah ruahnak le duhnak in kan hruaimi a silo!
===========
Tutan kan dohhthlennak hi a ho nu a ho pa hmanh nih mah ruahnak le duhnak in kan hruaimi a silo. Phunghram tha tein kan i ngeih. Mizapi dohthlennak a si. Ramchung mino thazaang, mizapi ngeihchiah, ramleng chawva tiin kan i fonh dih. Kutka kau piin on a si. Hi dohthlennak ah hriamtlaih thengtheng kan ti lo. Mah le itel khawhnak lam paoh in itel cio a biapi. Hard power (Hriamtlaih) le Soft Power (CDM hei ti phot ko ning).
Hriam tlaih in dohthlennak kan tuah ahhin kan ipalh sual lai tiah kan hlan i hriam a tlaimi Karen Kachin le Shan te pawl an cawlcanghning le an tuanbia tha tein kherhlainak (Case study) kan tuah. Kanmah chung zongah kanmah kan siah kan naule an si ah sualnak kan tuah ahcun biaceihnak zung a um. Biaceih bawi an um i Palek zong an um.
Kan Ral kan tlaihmi hna le kanmah ralkap biaceihnak kong zong felfai tein kan tthen. Judiciary Officer timi Biaceih bawi tha tein kan ngei i biaceihnak zung cungah CDF Hakha Council nih siseh OC,EC nih pakhat hmanh nawl kan ngei lo. Biaceih bawi nih hi kong ah keimah lawngin bia ka khiak ngam lo i OC or EC ah ka ceih piak ulaw a timi a um a si le kan ruahkhan pi.
Cucaah a tutan kan dohthlennak ahhin kan thiam lomi le kan tuah sualmi zong cu a um len ko men lai. Kan tlamtling kan fimthiam kan i ti bak lo. Amah belte hi ralhrang hna he cabuai cungah remdaihnak kong i ruahding ti a si ahcun mifim pawl kha rak kal te ko uh kannih cun kan kal kho lai lo. Cun Min Aung Hlaing te he biaruah ding in nan kal sual a si ahcun tuanbia ah a ummi kan orhlei kut in daihnak ca min kan thut i kan kehlei in meithal kan itlaih tiah timi bel kha rak icinken te uh.
Nihin kan ram hi hriamnam le thisen nunnak thap loin ram tha ah kan ser khawh lai a timi mifim hruaitu cu hmuh kan duhtuk ve ta…Kannih pawl cu party thimnak lio in kan miphun sinak (Identity) kan rak dirpi kan duhmi ram hruaining chuak kho ve seh tiah hehchet kanmah khap tawkte kan rak izuam sek ve nain zeihmanh kan chuahpi kho lo. Hriam kan vun tlai i cathiam le mifim pawl nih nan puarhrang nan kan ti hoi.
Mizapi thawhmi phaisa ningcang loin kan hmang sual maw? Kan mipi kan in tu in kan in vel sual hna maw? Tu hriam itlaih in ram kan khelnak ahhin kan mipi harnak kan in pe tuk sual hna maw? Kannih nih cun kan nunnak thap in kan in kilven hna tiah dahkaw kan iruah ve. Kan nu le kan pa kan unau kan hawikom kan ram caah tiin dahkaw khuasik ruahsur nilin in buin nan fanu fapa dawt hna ramtang ah nilethla kan rel. (Tial lengmang ahcun a sau tuk lai i rel zong nan huam sual lai lo hmailei nundam a um ahcun cauk tuin ichuah te seh). Salai Vakok
Hmailei tampi a cuan kho le, khuaruat kho a chung um mino nih raltha tein nan kalpi a hau ko. Ramchung dohthlennak a tuahtu phu cungah thil hngal tuk lo fundraising phu nih nawlngeihnak an ngeih tukmi hi a tha bak lo. Cu ti ka ti tikah fundraising phu poah khi thil theilo an si dih ka tinak cu si lo. Asi khawh ahcun ramdang ummi nih phaisa an thawh tik ah direct in an bawmh duhmi phu, sinah phan kho seh law a tha bik, a kar lak fundraising phu sin ah um loin.
Mi dang hnulei in a thlithup hritlaih bantuk in tlaih a hmangmi kan tam. Hriamtlaih dohthlennak le hriamtlaih lo dohthlennak hi keh le orh bantuk in a si tiah ka ruah (moral lei si loin strategy lei ahcun). Ituknak zong hi a tlawm khawh chung tlawm in Chinram ahcun tlawmter a hau ko, cu ti lo cun national suicide bantuk a si kho.
Chinram kha militarization a si nak hnga lo a hlan CNF policy bantuk kha tha ko ka hei ti. Cu ti ka ti tik ah ralhrang pawl doh hi kan ngawl lai tinak cu asi bak lo. Hi bantuk strategy kongah hin cun ithlak khawh cio ah atha tiah ka ruah ko. A hleice in kanmah le kanmah kar lak, phukhat le phukhat karlak ‘dialogue’ cu tam khawh chung in a tam cu kan herh bak. Nan lung thawng ko seh, nan mawh hrim lo, kan dihlak in kan mawh bak cio lo. Pumpak zong in kan ichawn te lai. Credit: Lian Thawng Hnin