Arakan Army(AA) He Pehtlaihnak A Ngei Tiah Taza Cuaimi Minung 61 An Luat
=========
Arakan Army(AA) he pehtlaihnak an ngei ti ruangah phungning lo in a ummi phu he pehtlaihnak upadi section 17(1) in taza cuaimi minung 61 cu an sualnak kan ngaihthiam hna i kan thlah cang hna, tiah SAC nih August 2 ah an thanh.
Sittwe khuapi in minung 12, Thantwe in 16, Kyaukphyu in 10, Buthitaung in 9, Ann in 5, Maungtaw in 4, Kyaukdaw in 2, an dihlak minung 61 nih luatnak an hmuh, tiah theih a si. AA he pehtlaihnak an ngei tiin SAC nih an tlaihmi hna tampi an um rih. Hi hna zong hi an chuah dih hna ding a si. An thlahmi hna nakin an tlaih ti hna lo ding tu hi a biapi deuh, tiah Pyituh Hluttaw palai hlun Phe Than nih RFA ah a chim.
Phungning lo in a ummi phu hna he pehtlaihnak an ngei ti ruangah taza cuaimi le thong tlami minung 100 leng an um rih, tiah theih a si. SAC nih August 1 ah thongtla minung 7,749 cu luatnak a pek hna i cu chungah ramdang mi 125, tlangcung hriamtlai phu(EAO) chungtel 22 le EAO he pehtlaihnak a ngeimi 71 zong an i tel, tiah theih a si.
Bilin Tiva A Lianh Ruangah Minung A Thong In Harnak An Tong! Mon ramkulh, Bilin peng ah Bilin tiva a lianh ruangah minung a thong in harnak an tong, tiah mi bawmchantu phu hna sinin theih a si. Ruah faak tuk in a sur ruangah Bilin tiva cu a lian i August 2 thawk in ti cu ṭhan lei a panh ruangah ti nih Bilin khuapi sang 5 a phum. Sang le khuate 15 hrawng in tualchung mi a thong leng nih an umnak hmun an chuahtak, tiah mi bawmchantu phu hna nih an chim.
Bilin peng mi bawmchantu pakhat nih a chim ning ah, a buaktlak in sang pakhat ah minung 200 tluk harnak an tong. Bilin peng chung kip ah ti a lian i tiva kam ah a ummi inn le thlam hna zong ti nih a phum dih hna.
Bilin khuapi ah bawmhchanhnak sakhan 10 nak tlawm lo a um i phungki biakinn le sianginn zong tilianh ruangah a zaam mi hna ca ah hun a si nain tilian ruangah har a tong mi hna cu mi bawmchantu phu hna nih an zohkhenh hna. SAC lei in an bawmhchanhmi a um rih lo, tiah theih a si.
Bilin peng ah hin July 30 in ti a lian i, tilian ruangah harnak a tongmi an tam caah eidin facang le dinti thiang an herh tuk, tiah theih a si. Tilian cu nizan August 2 ah 14 centimetre in a zor nain Bilin khuapi ti a phak nakding 1022 centimetre a si lioah 1038 centimetre a phan, tiah khuacaan tuaktantu (meteorology and hydrology) zung nih nihin August 3 ah an thanh.
A Thar In Remhmi SAC Ukhruainak Council Ah Dr. Hmuh Thang Aa Tel. SAC nih ukhruainak council an remh tharmi ah Chin ramkulh USDP Chairman Dr. Hmuh Thang aa tel, tiah August 2 ah SAC nih an thanh. Dr. Hmuh Thang cu a 2023 February 18 ah SAC ukhruainak council chungtel ah a rak i tel cangmi a si.
SAC nih ukhruainak council an remh tharmi ah Min Aung Hlaing cu Chairman ah an thim i Vice Chairman ah SAC ralkap ralbawizik chang Soe Win a si. Secretary ah Deputy General Aung Lin Dwe le Assistant Secretary ah Deputy General Ye Win Oo hna an si, tiah theih a si.
SAC ukhruainak council chungtel ah General Mya Htun Oo, General Tin Aung San, Deputy General Moe Myint Htun, Deputy General Soe Htuat, Deputy General Yar Pyi, Wana Maung Lwin, Dr. Hmuh Thang, Shwe Kying le Yan Kyaw hna an si, tiah SAC nih cun an langhter. Dr. Hmuh Thang cu USDP in 1990, 2010, 2015 le 2020 kum thimnak ah a rak i zuam i, 1990 kum le 2015 kum ah Chin ramkulh Hluttaw palai in teinak a rak hmutu a si.