Tulio cu Shan ram chaklei thawngpang thin a tur bik!
=============
Tulio cu Shan ram chaklei thawngpang thin a tur bik. Cawn awktlak thil tampi a kan pek. Tuzaanlei tiang ah Ralhrang sakhan 30 an lak manh cang. An raltuknak min cu “Operation 1027” ti a si. A sullam cu thlahra thla ni 27 in thawk mi raldohnak tinak khi a si theo lai. A theifiang tuk rih lo mi ca ah a tawifiannak in ka run langhter than lai.
The Northern Alliance timi hi-MNDAA, TNLA le AA an si. Nichaklei Unau pathum tiah kawl nih cun an auh hna. MNDAA – Myanmar National Democratic Alliance Army hi Kokang (ku-kanh) phu an si. Ralkap 7000 leng an ngei. TNLA – Ta’ang National Liberation Army hi ralkap 8000 leng an ngei ve. AA hi ralkap 30,000 leng kan ngei ve an ti. An pathum hin ttangtti phu an si. AA hi khika ahkhin KIA le hi phuhnih hna toi ah biatak tein ralkap a sersiam i atutiang a um peng ve. An ram ah kahdohnak an ser tuklo. An konglam tu cu hnu deuh ah a dang tein kan peh telai.
Tutan an cawlcanghnak hmun hi khuapi pasarih (Chinswehaw, Laukkai, Kunlong, Mukong, Lashio, Cindy le Namcom) an si. A tulio kawl ralkap an hun lau i Shan ram chung an ralkap an hun khawmh zokzok hna i mawtaw 100 he an fuh ve colh hna. Hi raltuknak hi an i biatak ko ahcun BPLA le PDF nih bawmh ding ah ready kan si an ti. Ralhrang Palik, ralhrang ralkap le ramri hngak ralhrang pawl cu a tulio te ahcun lusammanglo bak in an sumphomh in an phomh lio hna a si. MNDAA nih kan ram ah a pahnihnak a nganbik Tuluk he chawlehnak kutka Chinshwehaw khua cu a lak diam. Lam a pih ca ah zingzaan bak in Mandalay ah thilman ai khawt colh ve.
Kokang Laukkaing khua hi USDP party mirum le milian pawl, Kawl ralbawi pawl nih thapcelhnak le rumnak khualipi ah an i sermi pakhat a si. 5 stars Hotel zong ceilak a um. Tutan an raltuknak ahhin a hlankan in hi hna pawl an cawlcangh pah hi thoh-hlanzi nih an theih tuk i heh tiah ralhrang hmaisuang camp pawl cu cunglei in thirhri an tuk ko hna ti a si. Asinain, an ralkap pawl nih an thei lo. An bawi le pawl nih an chim duh hna lo. Rin lo in an kah ciammam hna i hmunkhuar pahra tiang an chuh khawh hna.
Raltuknak ah strategy in an hun i funthup. Hriam le a ngei bak ve. An ralkap zong ralkap puitling ah an ser khawh hna i an ral a tha. Huham an ngei. Kan nih zong nih an sin hin cawn awk tampi kan ngei.
US ram ah uar a um tuk mi secretary of state zong term khat a tuan i Joint Chief of Staff zong a rak tuan mi Colin Powell nih cun, “Hlawhtlinnak hi biathlithup a ngei lemlo. A hlankan tein i timhtuahnak, teirial in i zuamnak le sunghzatlaknak chung in cawnnak i a phi tu a si deuh” tiah a ti.
Tuzing 4:00 AM thawk in Shan ram nichaklei ah Northern Alliance (MNDAA, AA, TLNA & KIA) nih operation 1027 minbunh in a biapi mi khuapi paruk i a um mi ralhrang hmun, gates pawl an tuk ciammam i hmankhat te ah Chinshwehaw khuapi an lak colh. Chinshwehaw khua an lak bak in Kokang nih China-Myanmar Union Road kan phih tiah an thanh colh. Chinshwehaw khua hi 2022 kum ah trade volume US$283.396 million tluk a si.
Naihrawng Tuluk cozah nih online scamers (online game celh mi hlen hmang) pawl heh maw tiah a dumdawi hna lio, Ralhrang nih Laiza a zalh cuahmah lio bak i caan riangmang in Shan nichaklei ralhrang chawlehnak hmun an nam. Tuluk-Myanmar chawlehnak lampi pakhat cu a pit tthup. Hi hna pawl (KIA le a naule) le Tuluk karah zeimaw thil a um theo lai. Cucu caantha i lak in an control mi ram kauh ding ah khuapi paruk bak an tuk. An thawk tlawmpal bak in statement an chuah. Ralhrang uknak a hrambongh ding ruang ah operation kan thawk an ti.
Israel, Hamas le Gaza kong ah Laimi kan caihhuam ngang lio ah hawi cu an hmaika i a um mi ral namnak ding ca, an ramkauhnak ding ca ah heh maw tiah an i zuam. Khua an ruat. Kan ram kong te hi ruat ko tuah usih, kan miphun kong hi thuk deuh in ruat ko usih. Kan raltuknak kong tu ahhin pil ko usih. Kan ralkap tuhi thawnter ko usih. Credit: Lengkawite