Tio sakhan in a zam i India lei ah luh aa tim mi SAC ralkap hna cu Chin ralkap nih an dawi hna i an kah hna!
=========
Tio sakhan in a zam i India lei ah luh aa tim mi SAC ralkap hna cu Chin ralkap nih an dawi hna i an kah hna. SAC ralkap in hmun dangdang in India lei ah luh an i tim rua. Cheukhat kah an tong i cheukhat cu an tong lo. A tangleo video i a zam mi hna hi an sakhan in Tuithap tiva ah an zam i va sum lei zawh in Tio tiva he i tonnak in India lei ah luh aa tim mi an si tiah video a kan kuatu nih a chim.
SAC ralkap an si lai tiah zumhmi ralkap zeimawzat cu India ramchung ah an lut. Tualchungmi hna chim ning ah ramri tan in India ah a lutmi hi ralkap 20 leng an si i, Haimual khuataw, ramri tiva tan in an lut. Tualchungmi hna nih cun an cawlcangh le thilthuam zoh ah SAC ralkap an si lai tiah an zumh. Hi kong he pehtlai in ramri tanin a lutmi ralkap hna hi SAC maw an si Chin ralkap dah an si, TCP nih fehternak kan tuahmi a um lo.
Rihkhawdar SAC Ralkap Sakhan Pakhat Kan Laak – Salai Htet Ni. Chin ramkulh, India-Myanmar ramri um Rih SAC ralkap sakhan pakhat cu CNA le CDF nih nihin November 13 zinglei ah kan laak, tiah CNA chimphuannak nawlngeitu Salai Htet Ni nih a chim.
“CNA le CDF nih Rihkhawdar SAC ralkap sakhan cu kan kah i kan laak khawh. SAC ralkap kan tlaihmi zong an um. Sakhan kan laaknak a pawng ah sakhan pakhat a um rih i laak dingin kan kah cuahmah lio a si. SAC ralkap sakhan kan laak caah Jet Fighter nih bomb a rak thlak,” tiah The Ayeyarwaddy ah a chim.
Rihkhawdar sakhan cu November 12 zan suimilam 5 hrawng in CNA le CDF Hualngo, Thantlang Drone Team nih an kah, tiah theih a si. Salai Htet Ni nih cun, “Kaphnih in a thimi kan um nain fiang in kan thei kho rih lo. SAC ralkap 5 hrawng kan tlaih hna. Cu pinah SAC ralkap a zaammi zong an um,” tiah a chim chap. Kahdohnak ruangah Myanmar leiin Zokhawthar lei ah a zaammi an karh i, YMA le zatlangbu nih an rak zohkhenh hna tiah theih a si.
AA Ralakp Nih Minbya Ah SAC Ralhrang An Kahdoh Hna I Motor 2 An Laak, Rathedaung Peng Ralhrang Sakhan Zong An Laak I An Khangh. Rakhine ramkulh, Minbya peng ah SAC ralhrang motor 2 cu Arakan Army(AA) ralkap nih bomb in an phuah hnawh hna i an kah caah an motor 2 ning in an laak khawh, tiah theih a si.
2023, November 13, zing suimilam 7:30 tluk ah Minbya peng ah SAC ralhrang pawl citmi motor 2 cu bomb in an puah hnawh hna i SAC ralhrang thimi le hliam pumi an um pinah AA ralkap nih an motor 2 ning in an laak khawh, tiah kahdohnak thawng latu pakhat nih Khit Thit ah a chim. Cu pinah Rakhine ramkulh, Rathedaung peng ah ramri hngaktu ralhrang pawl sakhan cu nihin November 13 zing ah Arakan Army(AA) ralkap nih luhhnawh in an kah hna caah an sakhan an lakpiak hna i mei in an khanghpiak dih hna, tiah a chim chap.
Kyauktaw Peng Palik Sakhan In Palik 22 Nih CDM An Tuah, Rathedaung Um Ramri Hngak Ralhrang Sakhan 2 AA Nih An Laak. Rakhine Ramkulh, Kyauktaw peng, A-pau-wa palik sakhan in sakhan uktu palikbawi pakhat le a kuttang palik 21 nih CDM an tuah, tiah Arakan Army(AA) thawnglatu nih a chim.
“2023, November 13, zing suimilam 11:00 reng lo ah Kyauktaw peng, A-pau-wa palik sakhan ah ummi ralhrang dihlak nih hriamnam chiah in AA ralkap sinah an i fonh. Rakhine ralkap AA nih hriamnam chiah ding in an chimh hna caah sakhan uktu palik bawi pakhat telh in palik 22 nih atu bantuk in hriamnan an chiah i CDM an tuah” tiah Arakan Army(AA) thawnglatu nih a chim. Cu bantuk ášhiam in Rathedaung peng ah nihin November 13 zing ah Arakan Army(AA) nih ramri hngaktu ralhrang sakhan 2 cu luhhnawh in an kah i an laak khawh hna, tiah theih chih a si.