Tio Kahdohnak Ah SAC Ralhrang Sakhan In A Zaammi Ralhrang 39 Cu Mizoram Palik Nih An Tlaih Hna
=========
Chin ramkulh, Falam peng, Rihkhawdar le Ṭio SAC ralhrang sakhan laak kahdohnak ah Mizoram ah a zaammi ralhrang 39 cu Mizoram palik nih an tlaih hna i Zokhawthar palik zung ah an chiah hna, tiah CNN Chanphai News nih a chim. A zaammi SAC ralhrang pawl hi cozah nawlngeitu hna nih an buaipi lio i, cozah nih thonginn ah a khumh hna lai maw? a kuat hna lai dah timi theihfian a si rih lo.
Kahdohnak hmun ah ralhrang zeimawzat an thi, CNA, CDF-Hualngoram le ṭangṭi phu in nunnak liammi an um i, 18 tluk nih hliam an tuar, tiah theih a si. Chin ralkap CNA le ṭangṭi phu hna nih SAC ralhrang sakhan in ralthuam zeimawzat an laak chih, tiah theih a si.
India-Myanmar Ramri Um SAC Sakhan 2 Cu Chin Ralkap Hna Nih An Laak, 7 Nih Hriamnam An Chiah! India-Myanmar ramri, Chin ramkulh, Falam peng, Rihkhawdar khuapi SAC ralhrang sakhan pakhat le Ṭio sakhan pakhat cu kan laak khawh, tiah Chin ralkap CNF/CNA in chimphuannak nawlngeitu Salai Htet Ni nih a chim.
“2023, November 12 thok in Chim ralkap CNA, CDF-Hualngoram, CDF-Thantlang le tualchung hriamtlai phu hna nih fonh in kan kahdoh hna i November 13 zing ah Rihkhawdar khuapi No1. sang tlangchung ah ummi SAC ralhrang sakhan 1 cu kan laak khawh.
Zanlei sang ah No.2 sang Ṭio tiva pawng tlangcung ah ummi SAC ralhrang sakhan 1 zong kan laak khawh chap” tiah Salai Htet Ni nih RFA ah a chim. Kahdohnak ah Chin ralkap ṭangṭi phu in 10 leng nih hliamhma an tuar i nunnak liammi zong an um. SAC ralhrang lei in 5 naak tlawm lo an thi pinah ralhrang bawi (Captain) 1 telh in 7 nih hriamnam an chiah i, a tam deuh cu India ramchung ah an zaam hna, tiah a chim chap.
SAC ralhrang sakhan pawl cu CNF hmunpi he aa naih pinah India-Myanmar No.2 chawleh chawhrawlnak lampi ummi an si caah kan laak, tiah Salai Htet Ni nih a chim. Kahdohnak ah SAC ralhrang nih raltuknak vanlawng, helicopter le hriamngan pawl duhpaoh in an kah caah mipi 10 hrawng nih hliamhma an tuar. SAC ralhrang nih atu bantuk in an kah mi hriamngan kuan cu India ramchung ah a tla i nunnak liammi le hliamhma tuarmi zong an um, tiah theih a si.
Wanthu Peng Kahdohnak Ah SAC Ralhrang 3 An Thi, Meithal Zuun 4 An Laak. Sagaing ramṭhen, Wanthu peng, Minkone khua pawng kahdohnak ah ralhrang 3 an thi, meithal 4 an lak tiah NUG nih an langhter. November 14 ah Wanthu khuapi lei rallam sialmi SAC ralhrang bawi That Pyan Myint hruaimi thazaang 80 tluk cu mipi ralkap Kawlin battalion 1 nih Minkone khua pawng an phak ah an kah hna i ralhrang 3 an thi pinah meithal zuu 4 zong an laak cih, tiah theih a si.
Kahdohnak a chuahnak hmun cu Wanthu khuapi nichuahlei hmun um SAC ralhrang battalion nih hriamngan in voi 5 tluk an kah pinah Mi-35 helicopter in an kah chih caah mipi ralkap 1 nunnak a liam, tiah Khit Thit nih a ṭial.
Khah-mah-yiah 129 Battalion SAC Chungtel 126 Le An Chungkhar 134 Hna Telh In Minung 262 Cu MNDAA Sin Ah An I Fonh. Shan ramkulh chaklei Laukkai hmunram chung um Dah-kah-sah kuttang Khah-mah-yiah 129 battalion in Commander, Captain hruainak in SAC ralhrang chungtel dihlak 126 le an chungkhar hna minung 134 telh in minung 262 nih Myanmar National Democratic Alliance Army(MNDAA) sin ah pehtlaihnak an tuah i mipi sin ah an i fonh, tiah MNDAA nih thawng an thanh.
November 12, zan suimilam 8:30 tluk ah Kokang special (1), Shi-shan hmunram chung um Yan-hkuan khua hrambunh battalion pakhat simi Dah-kah-sah (Laukkai) kuttang um Khah-mah-yiah 129 battalion in Commander, Captain Kyaw Ye Aung hruaimi battalion dihlak le an chungkhar dihlak hna nih unau thum hna cu pehtlaihnak an tuah hna i mipi sin ah an i fonh, tiah theih a si.
“Atu bantuk in mipi sin ah aa fonhmi SAC ralhrang pawl cu minung pakhat ah Myanmar tangka sing (10) cio an pek hna pinah an chungkhar pawl zong minung pakhat ah sing (1) cio laksawng an pek hna i ngandamlonak a ngeimi hna zong a lak in an thlopbul hna hnu ah an duhnak hmunhma ah himte in an thlah hna” tiah MNDAA hriamtlai phu thawng thanhnak in ṭuanvo ngeitu Le Kyar Win nih a chim.
Khah-mah-yiah 129 in SAC chungtel dihlak le an chungkhar hna fonh minung 262 cu an nunnak a himkhawhnak ding le an zawnruat in mipi sinah a fonhpi khotu Commander, Captain Kyaw Ye Aung cu Myanmar ram mizapi zong nih pasalṭha pakhat ah chia in an in philh ti lailo, tiah nitlaklei unau thum hna nih thawng an thanh.