Tibual Sakhan In Mizoram Lei Ah A Zaammi SAC Ralkap 29 Cu CNDF DS Nih A Va Thlah Hna – Salai Htet Ni
==========
Tibual SAC sakhan in Mizoram lei ah aa dormi SAC ralkap 29 cu nizan chunhnu suimilam 2 hrawng ah an hriamnam he Mizoram Saikhumphai khua an phan i, Assam rifles, Mizoram Police, VC le YMA nih an rak don hna. SAC ralkap pawl hi CNDF DS nih a va thlah hna, tiah CNA Spokesperson Salai Htet Ni nih Vaurawngzunthil biaruahnak ah a chim.
Vaphai YMA hruaitu Pu T Lalramenga chim ning ah, SAC ralkap 29 hi nizan zingka ah Mizoram lut ding in ruah an si nain lam an tlau ruangah chunhnu suimilam 2 hrawng lawng ah an phan kho. Assam rifles, Mizoram Police, YMA le VC nih nikhat le zaan khat an hngah hna. Mizoram an phanh hnu in an hriamnam cu Mizoram police le Assam rifles nih an chawn hna i, Assam rifles nih an hmunpi lei ah an kalpi hna. Assam rifles kutin Myanmar lei kuat an si lai tiah zumh a si.
CNDF DS nih cun, Mizoram police lei nawlnak bantuk in SAC ralkap a zaammi hna hi kan kap hna lo, tiah AIR thawnglatu a chimh. Tibual sakhan laaknak ah bomb in aa hliam sualmi pahnih an um nain Zokhawthar ah zohkhenh an si i, CNDF camp lei ah an kir ṭhan cang, tiah a chimchap. Hi lio ah CNA chimphuannak nawlngeitu Salai Htet Ni nih cun SAC ralkap pawl hi CNDF DS nih a va thlah hna, tiah a chim.
“Ṭio le Rih sakhan laak hnu ah Tibual kan luhhnawh ṭhan lai kan ti nain an rak theih cia caah November 14, zaan suimilam 9 ah an hriamnam he an rak chuak dih cang. A poi biknak cu CNDF DS pa nih Saikhumphai tiang a va thlah hna, meithal pakhat hmanh thisen he kan vaih lio ah an hriamnam he Mizoram ah an lut. Asinain ralhrang nih sakhan an chuahtak ahcun mipi zong an him i kanmah lei zong kan him ti mi lungput he kan i hnem ṭhan,” tiah Vaurawngzunthil biaruahnak ah Salai Htet Ni nih a chim.
Hi kong he pehtlai in CNDF Vice President Salai Peter Thang nih cun, “Tibual sakhan laaknak kong ah SAC ralkap pawl cu sakhan nan chuahtak lo ahcun nan thi dih lai tiin ralrin peknak kan tuah hna i, i ruahnak caan kan pek hmasa hna. Sakhan kap ding in kan kal ah an rak um ti lo, Mizoram lei ah an rak zaam dih cang. Kannih lei nih cun an zaam i an pal lai tiah ruahmi khua tu kha kan ven.
Mizoram lei an zaamnak kong ah CNDF DS nih a hruai hna timi cu an ruahnak sawhsawh a si, kan naule a ṭhithruainak hna ah khualtlawng mi nih an hmuh i SAC ralkap lamhruaitu ah ruat in an puhnak a si.” “Ṭio sakhan laak lio zong ah Mizoram chung ah an zaam i Helicopter in an chiah ṭhan hna ti cu atu tan a zaammi zong nih an theih dih ve ko.
Cun, hriamnam he Mizoram chung ah an lut timi kong ah SAC ralkap nih anmah pum ralvennak ca ah tiin an i tlaihmi meithal dah ti lo hriamngan dang tampi cu sakhan ah an kaltak dih, motor khat in kan laak khawh ko. Vanlawng in bomb a thlak lai phan ah an chiahmi facang dip 80 le thil dangdang zong a pamhmai tiin kan laak ko, cu hnu ah cun sakhan cu kan khangh.”
“Kannih cu hramhram in mi thah duhnak thinlung he hriam a tlaimi kan si lo, rampi zalennak ca ah tiin hriam a tlaimi kan si. Var sakhan laak lio zong ah aa pe duh lomi SAC ralkap 14 zong kap lo in a tlaih in kan rak tlaih ko hna. Hi thil cangmi kong he pehtlai in kanmah lei ah buainak zeihmanh a um lo, kannih cu sakhan laak kha a biapi ah a chia mi kan si ko nain mipi lei an buai ngai ruang ah atu bantukin Media sin ah thil sining kan chim tawnnak a si,” tiah The Chin Post ah a chim.
Motorcycle I Khawndennak In CDF CDM Siyin Chungtel Nu Pakhat A Nunnak A Liam. CDF Civic Defense Militia-CDM Siyin chungtel Mai Ciang Hawm Kim cu motorcycle i khawndennak in a nunnak a liam, tiah CDF CDM Siyin nih an thanh. Mai Ciang Hawm Kim cu a luancia November 11 ni ah motorcycle in aa khawng i ni 4 chung aa thlopbul hnu November 15, zinglei 3:30 ah a nunnak a liam, tiah theih a si.
Federal ramkomh ser khawh nakding ah CDF CDM Siyin he hmun khat ah rian a ṭuan liomi Mai Ciang Hawm Kim a nunnak a liamnak kong ah dohthlennak ah a rianṭuanṭi cu kan ngaih a chia in Mai Ciang Hawm Kim nih a kaltakmi chungkhar kan in tuarpi tuk hna, tiah CDF Civic Defense Militia-CDM Siyin nih nihin November 17 ah cathanh an chuah.