Tibual sakhan fa damiah rap 29 nih Mizoram i an va phanhpi khawhmi hriamnam pawl!
===========
Mipi thahnak ca hman chap te dingmi hriamnam maw an va si te rih lai, siloah chuh pet ding dah an va si hna hnga? A tang hmanthlak khi zoh hmanh u. Tibual sakhan fa damiah rap 29 nih Mizoram i an va phanhpi khawhmi hriamnam pawl an si. CNDF ṭanhtu le CNF ṭanhtu nan buai. CNF timi min cung ah “D” an telh chih i cu nihcun “justified” si ve ai zuam lio a si, kan ti ko lai.
Zofa Journal nih an chuahpimi hmanthlak a si. “Tibual sakhan kan laak khawh” tiah an von ihrocer ve kha cu hmuh cio a si. A rak kaaptu ding um ti lomi raap sakhan chung va luh sawhsawh khi si ko ti lam cu evidence a chuak cangmi video le hmanthlak in theih khawh si ko ti lam cu aho al awk um loh. Ipheh awk zong um lo. “Raap 29 an zaam” tiah an thanh. Cu raap 29 nihcun nan khua tehna an pal khawh caah rak iralring cio uh, ti phun si.
Mah cucu Mizoram lei news zong nih an thanh. Cu raap zaam pawl cu, ui tlik vok zaam phun i a zaammi cu an rak si lo ti a von fiang. Lungdam mahmah in Mizoram lei ah thlithup lam kil in an rak panh bia tu si rua. Raap zaam pawl cu India (Mizoram) palik sin i an vai i-ap tikah, an hraimnam he zei he bak an hmanthlak a hong chuak ko. Tuksapur a si.
Ral tuk hau lo tein teinak hmuh khawh ti phun theory leikap in van cuan tuah ulaw…Ituk thahnak zeihmanh chuak lo tein him le bawm tein Kawlram mipi vialte i kan ral bik a simi minung cazin hmanh ah kan chiah ti lomi hna, Kawl nih uico an ti hna i Lai nih sachia kan timi hna kha a himnak hmun ah an hriamnam he an va phan. MNDAA nih battalion ning in tuk hau loin a lakmi raap le an chungkhar fale pawl 164 an um i cu pawl (an lu bik cu Commander Kyaw Ye Aung) cu phaisa laksawng an pek hna pinah, a himnak hmun ah kan kuat hna an ti.
Atu Laimi (Chin hriamtlai phu ai ti vemi pakhat) nih raap sachia 29 bakte kha an hriamnam he a himnak an kuat hna timi he khin ai dang. An ralkap hna nih nunnak an pek cuahmah. Tulio Kawlram boruak umtu ning zong ah MAH dirhmun ai mah ti lo. A dohtu vialte an ṭan an lak lio a si.
KIA a dohtu Lisu phu lak zongah tu hi an lung ai thleng ngai cang. KIA lei deuh an dirpi hna. Karen lei ahkhin KNU an hrokhrol tuk i Chaklei Unau Pathum teinak hmuh hnu bel in an ithleng zau kho. Anmah Karen lila nih KNU cu an phomh tuk hna.
Shan ti le, nai ah TNLA i cikhat an ikap ka ti ko khah. Malay um Laipa nih Shan cu thah deng a timh hna. Nanmah pawl hi MNDAA le TNLA sal ah va cang thai te uh, a ti phah hna. Cu lio i raap bawmtu tapung fazer phu an rak um ve ding khi cu poi ngai lai.
Tulio Kawlram dohthlennak ah hriamnam a sunlawi tuk lio i, an hriamnam tling tlingkhet he raap sachia luatnak lam a onhtu phu lam cu, zei tik chan hmanh ah Kawlram tuanbia ah ai dawhmi ရာဇဝင် an ser khawh lai ka zum lo. Caṭialthiam tleicia Pu Dar (Bank Manager) nih Duh Lian holh chungah Chinmi vialte kan holh a tling dih, a rak ti. Atu Rihkhuadar khuapi cu Chin Mahameih phu nih laak a si. Ai rem dom.
Rihkhuadar khuapi lak khawhnak dingah Chin mino 7 thisen a luang. Raap sachia cu ui tlik le vok zaam in an tlik le an zaam hmuh khawh an si. Meithal le hriamnam khat ṭhup he raap sachia himbawmnak a phanhtertu phu tu hi ka lung a fiang kho lo. An hriamnam lengluang khi mipi thahnak ah maw hman an va si chap te hna hnga, siloah India cozah nih dah a hei lakpiak dih te hna hnga ti a ka ruahter ngai.
Three brotherhood alliance nih ralhrang nunnak an zuahmi hna cu, raap an hriamnam an chuh, lak piak dih hna hna hnuah aa ap mi raap an zuah hna.Tibual zaami bel cu, saikel le motor in dahra an hriamnam an i phorh ti awk in a um, an hriamnam hi a cheek in an cheek lai tiah ruah awk um timi an tam ngai. Mah le mah ihmuhthiam khawh lo. Kutpi vai thlir cio duh ruang i, ral nihsawh tuk dingmi miphun si zong cu an simh tuk ve cang ko hme cu.
Nain, zei bantuk ningcang le lam in dah ti theih hau e. Kan ram nih a tuarnak a faak tuk cang i, nihin ni ah cun, mah khua le mah peng tbk sawh lawng in a mizei paoh dirpi cu ai dawh lai lo, ka u pa. CNF kan uar lo tuk bu ah, MAH dohnak ding i a nawr khotu bik an si ko ahcun… a u le a nau hna nih kan ṭangṭi hna lai, kan dirṭi caan a si ti theih a hau rua hlah maw ka ti. Dawtnak in ka u pa… MNDAA nih raap an daihter ning le tutan thil hi cu ai khat deuh lo e. Credit: Salai C Alexander