SAC Ramri Congtu Palik 29 Bangladesh ah an Zaam Ṭhan.Rakhine ramkulh ah SAC ramri congtu palik rian a ṭuan mi minung 29 cu nihin March 11 ah Bangladesh ram ah meithal he an zaam, tiah Dhaka Tribune nih a ṭial.Hi SAC palik 29 hi Myanmar-Bangladesh ramri ah ni zeimawzat an rak i thup cang i, eidin tirawl ngeih ti lo in ṭaamhal in an um hnu ah Bangladesh ram ah an rak luh hi a si, tiah Dhaka Tribune nih a langhter.
Bangladesh ah a lut mi SAC ramri congtu palik 29 cu dum pakhat chung ah Bangladesh ralkap nih an chiah chung hna i, hmun dang ah ṭhial an timh hna.November 2023 thawk in a cang mi Rakhine le Chinram chung kahdohnak ruang ah India le Bangladesh ram lei ah a zaam mi SAC ralkap hi milu 500 leng an si cang, tiah theih a si.
Good News : KNU/KNLA nih Myawaddy Khua Pawng i SAC Ralkap Sakhaan a Laak.Kayin ramkulh, Myawaddy khua he meng 8 lawng aa hlatnak hmun ah a um mi Phalu SAC ralkap sakhaan cu nihin March 11 zaanlei ah KNU/KNLA nih an laak, tiah theih a si.
KNU/KNLA ralkap pawl nih Phalu SAC ralkap sakhaan cu caan rau lo te ah an laak khawh colh, tiah minung pakhat nih Irrawaddy thawngzamhnak ah a chim. Myawaddy peng chung ah a um mi Thingkanngyinawng SAC ralkap (Kha Ma Ya 355) sakhaan le palik sakhaan zong KNU/KNLA nih an laak khawh cang i, Kha Ma Ya 356 le 357 sakhaan pahnih laak chap ding in an doh cuahmah, tiah theih a si.
Thawngpang Dang Rak Rel Chih : Paletwa ah AA nih Ukhruainak Rian a Kalpi Mi hi Thil Dik Lo a Si tiah Chinland Cozah nih a Chim.Chin ramkulh, Paletwa peng ah Rakhine hriamtlai AA/ULA nih ukhruainak lei rian a kalpi mi hi thil kal ningcang a si lo, taih Chinland Cozah Cheif Minsiter Pu Pa Thang nih a chim.”AA nih Paletwa ah ukhruainak lei a kalpi mi hi thil kal ningcang lam hmaan a si lo. Tlangcungmi pakhat le pakhat karlak ah lung i rual lonak a chuahpitu a si. An tuah lo ah a ṭha bik ko. Kan chim cang bang in ramkhel lei ton biaruahnak in chimphoih kan i zuam hmasa lai,” tiah a chim.
Paletwa kong he pehtlai in AA/ULA le Chinland Cozah karlak ah ceihhmainak ngeih hmasa awk thil dangdang an um len rih, tiah Pu Pa Thang nih a langhter. Paletwa cu January 14, 2024 ah AA nih a laak i, Paletwa peng chung ukhruainak le ṭhanchonak lei rian zong ṭuan hram kan thawk cang lai, tiah March 4 ah AA/ULA nih theihternak a tuah.Credit : The Hakha Post