Thawngpang Thar; Kanan Khua Tualchung Mipi 17 Ruak Vui Liam An Si Cang!
=========
Sagaing ramṭhen, Tamu peng, Kanan khua SAC ralhrang hriamngan kahnak in nunnak liammi tualchung mipi 17 ruak cu January 7, zaanlei suimilam 4:30 tluk ah vuinak caan hmang in an vuiliam hna tiah theih a si.
Nunnak Liam mi hna lak ah minung 15 hi Falam ansi i, 2 hi MTP chungtel ansi, tiah kan theih. Hliamtuar minung 20 hi sii-inn ah thisen pek hau in zohkhenh cuahmah mi ansi hna. Nunnak Liam mi 17 ruak pin ah hin midang ruak zong pehzulh in kawlhawl chih ansi rih tiah Zofa Journal nih a langhter.
Kanaan khua ah SAC nih vanlawng in bomb a thlak ruang ah a thi mi ruak 15 an char cang. Sagaing ramthen, Khampat khua pawng ah a um mi Kanaan khua ah SAC nih vanlawng in bomb a thlak i ngakchia tel in minung 15 ruak an char cang tiah theih a si. SAC nih vanlawng in bomb a thlak hi nihin January 7, zinglei 10:30 hrawng ah a si.
SAC nih bomh a thlak lio ah zei kahdohnak hmanh a um lo tiah khuami sin in kan theih. “Baptist biakinn kulh chung le sianginn ah a thlak mi a si. Sianginn pawng ah pumpululh a chuih mi ngakchia zong an nunnak a liam,” tiah Khampat khuami pakhat nih a chim.
Hma a pu mi 30 nak tlawm lo an si i a thi mi zong an i chap kho ti zong thawng laknak nih a chim. Bomb an thlak than sual lai ti an phan caah hma a pu mi pawl zong rianrang in an chanhchuah hna i an thlop hna tiah kan theih. Kanaan khua cu Khampat he aa tlai mi khua a si. Khampat khua cu 2023 November 7 ah rammi rungvengtu ralkap phu komh nih an rak laak mi khua a si.
Kanan Khua Bomb Thlaknak Ah Ruak 15 Char A Si Cang. Sagaing ramṭhen, Tamu peng, Khampat khuapi pawng Kanan khua Biakinn cu SAC ralkap nih nihin January 7, zing suimilam 9:00 hrawng ah raltuknak vanlawng Jet Fighter in bomb lung 10 hrawng an thlak ruang ah aa pum liomi ngakchia telh in tualchung mi ruak 15 char a si cang, tiah theih a si. Kanan khua Biakinn bomb thlaknak kong he pehtlai in Kanan khuami pakhat nih cun, “Atu bantukin thil a cannak a ruang cu Dalan thawng peknak ruang ah a si,” tiah a chim.
Khampat Khuapi, Kanan Khua Biakinn Ah SAC Ralkap Nih Bomb An Thlak Ruang Ah Tualchung Mi 11 Nunnak Liam. Sagaing ramṭhen, Tamu peng, Khampat khuapi, Kanan khua no.5 sang um Biakinn cu SAC ralkap nih bomb an thlak ruang ah a pummi ngakchia pahnih telh in tualchung mi 11 a nunnak a liam, tiah tualchung mi nih Yangon Khit Thit Media ah an chim.
Nihin January 7, zinglei suimilam 10:30 hrawng ah Tamu peng, Khampat khuapi, Kanan khua Biakinn cu raltuknak vanlawng A5 in pound 250 tluk a ritmi bomb 4 an thlak ruang ah ngakchia pahnih telh in tualchung mi 11 an nunnak a liam. Biakinn chung ah aa pummi a tam-u cu hliam an pu, tiah theih a si.