East Timor President Nih SAC Ralkap Vialte Cu An Hriamnam Chia Dingin A Forhfial Hna
===========
SAC ralbawi le an kuttang um ralkap hna cu hriamnam chia dingin East Timor President nih a forhfial hna.
Timor President Jose Ramos Horta nih cun, ralkap le ralbawi vialte cu mizapi ca ah rianṭuanmi an si i mizapi kuttang ah a um mi an si bantuk in mibu tlawmte runveng loin mizapi tu zohkhenh i SAC chuahtaak ding in a forhfial hna.
SAC kuttang ralbawi le ralkap hna cu rammi cung ah thahnawnnak tuah ti lo ding in le Myanmar rampi ca ah democracy lam a hmuhsaktu si ding in a nawl hna leng ah South East Asia ca zong ah thil ṭha a si lainak kong a chim chap.
A hlan deuh ah cun international communities nih Rohingya miphun buainak kong lawngte rak buaipi a si nain atu Myanmar ram buainak hi Rohingya miphun hna nakin a faak deuhmi buainak a si pinah kum 60 chung ralkap sal i an taannak in chuah an i timhnak a si caah international communities nih Myanmar kong ah cawlcanghnak fak deuh tuah a herh kong a chim.
Jose Ramos Horta cu 1994 ah phungning loin Myanmar ram chung ah rak lut in Karen ramkulh chung ah nuhrin covo le Democracy kong training peknak a rak tuah bal. Asia ram hruaitu vialte lakah amah tluk in Myanmar ram buainak kong a hngaltu an um lai lo kong East Timor president nih cun a chim. Credit: The chin post