Sagaing Ramṭhen SAC Chief Minister Motor Bomb Puahhnawh A Tong I Ralbawi Pakhat A Thi.SAC nih khinh mi Sagaing ramṭhen Chief Minister le ṭuanvo ngei dang hna nih an i cit mi motor pawl cu Sagaing khuapi Ethnic Degree College in an kir lei nizan February 22 zinglei ah tualchung hriamtlai phu nih bomb an puahhnawh hna i motor pakhat a rawh pinah ralbawi pakhat a thi, tiah theih a si.
Puahkehnak a chuahnak hmun ah cun SAC ca ah a biapi ngai mi le SAC chimnak nawlngei Major General Zaw Min Thun zong aa tel tiah thawngpang a thang nain fehternak a um rih lo.
Puahkehnak a chuahnak hmun ah cun Major General Zaw Min Thun aa tel le tel lo fehter khawh a si rih lo nain Sagaing ramṭhen SAC Chief Minister U Myat Kyaw, Border Affairs Deputy Minister Major General Pyu Thant le Sagaing ramṭhen Security and Border Affairs Minister Colonel Win Tin Soe cu an i tel, tiah fehter a si.
Tualchung hriamtlai phu nih bomb an puahhnawh mi motor ah cun SAC ralbawi pahnih an thi tiah SAC thawng laaknak hrampi nih an chim nain tualchung mi a cheu nih minung pakhat lawng a thi, tiah an chim ve.
Sagaing khuapi tualchung mi pakhat nih cun, “Zaw Min Thun aa tel le tel lo cu kan thei lo nain bomb puahkehnak hmun ah cun minung pakhat lawng a thi. Bomb puahhnawh mi motor cu an chiah ta i Sagaing khuapi lei ah an kal” tiah a chim.
SAC ralbawi pawl bomb puahhnawh an ton hnu in Monywa-Mandalay motor lampi cu nihin February 23, zing suimilam 11:00 hrawng in an phih, tiah tualchung hriamtlai phu thawng thanhpiaktu Monywa Road Information – MRI nih an thanh.
Good News :Tualchung Hriamtlai Ṭangṭi Phu Nih Sekan Khua An Laak.Sagaing ramṭhen, Kalay peng ah SAC ralkap pawl nih an rak khangh i umhmun an khuarnak Sekan khua cu Kalay hmunram ah a cawlcang mi tualchung hriamtlai ṭangṭi phu nih nizan February 22, zan suimilam 11:00 hrawng ah an laak khawh, tiah theih a si.
A liamcia 2023 September thla ah SAC ralkap pawl cu Sekan khua ah lut in inn an rak khangh i thla 6 chung hrawng umhmun an khuar hnu ah tualchung hriamtlai ṭangṭi phu nih an kah hna i nizan zan ah Sekan khua um SAC ralkap pawl an zaam dih, tiah thawng laaknak hrampi nih an chim.
“Thlanglei tualchung hriamtlai phu pawl i fonh in an ṭangṭi i a tam zong an tam ngai, Sekan khua lawng si lo in Kalay peng hmunkip ah kahdohnak an pehzulh. SAC ralkap pawl nih khuachung ah an hmanh ta mi bomb pawl thianhfelnak an ngei hna,” tiah tualchung hriamtlai phu in chungtel pakhat nih a chim.
Sekan khua kahdohnak ah cun SAC ralkap 5 hrawng an thi i, CNDF ralkap Mang Pu nih ram le miphun ca ah a nunnak a pek ve.A luancia February 21 ni thawk in Kalay peng hmunkip ah SAC ralkap le tualchung hriamtlai phu kar kahdohnak a fak i SAC ralkap hriamngan kah mi ruang ah tualchung mi thi le hliamtuar zong an um, tiah theih a si.Credit : The Chin Post