Phyu Peng SAC Ralkap Sakhan Kahdohnak Ah SAC Ralkap 20 An Thi
===============
Bago ramṭhen, Phyu peng Kanyutkwin khuapi, Konetey khua pawng um SAC ralkap sakhan 5 kahdohnak ah SAC ralkap 20 an thihnak kong cu Tawwin Daung Column nih an langhter.
Nihin January 4, zinglei suimilam 3:00 ah Yangon-Mandalay lam hlun Kanyutkwin khuapi, Konetey khua pawng um SAC ralkap sakhan 5 cu PDF ṭangṭi phu nih an kah i SAC ralkap 20 an thi, sakhan a zaamtak mi zong a tam, tiah theih a si.
Nihin January 4, zinglei kahdohnak ah tualchung mi pakhat a thihnak kong le Kanyutkwin khuapi he aa naihnak ah a ummi meng 142 thir hlei a cahnak kong zong tualchung mi hna nih an chim.
Pyu peng le Kyauktaga peng kar a ummi thir hlei a cahnak, Kanyutkwin khuapi he meng 2 aa hlatnak Taungkone khua ah kahdohnak aa thawknak le kahdohnak chung ah tualchung mi pakhat a thihnak kong cu tualchung mi pakhat nih Khit Thit Media ah a chim.
Iran Ram Ralkap General A Thih Camtuak Philhlonak An Tuah Lioah Bomb A Puak I Minung 100 Leng An Thi.2020 ah US nih drone in bomb an rak thlak i a thimi Iran ram General Qasem Soleimani a thih camtuak philhlonak an tuah lioah bomb voi hnih a puak i minung 100 leng an nunnak a liam pin ah hliamtuar mi zong an um, tiah theih a si.
General Qasem Soleimani a thih kum 4 tlin camtuak an tuahnak hi Iran ram nichuah thlanglei Kerman khuapi ah a si i, a voi khatnak bomb a puah hnu minutes 20 hrawng a rauh ah a voi hnihnak a puak ṭhan, tiah theih a si.
Bomb a puahtu hi mizei phu dah an si ti cu nawlngeitu nih thanhnak an tuah rih lo nain US cozah nih cun IS bantuk phu nih an tuahmi a si lai ti an zumhnak cu an langhter.
Iran President Ebrahim Raisi nih cun hi bantuk tuahsernak hi minung lungthin a pu lomi tuahsernak a si, tiah a chim. Iran cozah hruaitu pakhat zong nih hi tuahsernak cung ah lehrulhnak kan tuah lai, tiah a chim ve.
Russia le Turkey telh in a dang ram tampi zong nih hi bomb puah tuahsernak cung ah fak piin duhlonak an langhter i UN General Secretary zong nih bomb puahnak a tuahtu hna nih ṭuanvo an laak lainak kong a chim ve. Iran ngandamnak lei Minister nih bomb puah ruang ah nunnak a liammi 95 an phan i hliamhma pumi 211 an si, tiah a chim.Credit : The Chin Post