ThawngPang Tha TakTak! Myanmar Ralzaam Ca Ah UNOCHA Nih US Dollar Nuai 7 Bawmhnak Pek Timh.
2023 October thla dongh thawk in Myanmar ram chung ah kahdohnak a fah chin lengmang ruang ah umnak khua chuahtak in ral a zaam mi 660,000 leng an karh, atu tiang ah Myanmar ram chung ah inn-lo chuahtak in a zaam mi 2,625,000 leng an phan i ralzaam hna ca ah US dollar nuai 7 bawmhnak pek timh a sinnak kong UNOCHA nih January 10 ah an thanh.
2023 October 26 ni thawk in tlangcung hriamtlai phu, tualchung hriamtlai phu dang le SAC ralkap kar kahdohnak a fah ruang ah Shan ramkukh chaklei le thlanglei, Karenni ramkulh, Rakhine ramkulh, Sagaing ramṭhen, Mandalay ramṭhen, Bago ramṭhen, Karen ramkulh, Mon ramkulh le Tanintharyi ramkulh le Chinram in umnak a chuahtak mi 660,000 an phan, tiah an thanh.
2023 December thla dongh tiang ah bawmhnak tangka US dollar nuai 886 chuak ding in timhlamh a si nain nuai 296.94 lawng a chuah ruang ah UN le mi bawmchantu phu nih ralzaam mi nuai 3.1 lawng bawmhnak an pek khawh hna, tiah an langhter.
Ralzaam bawmhnak ca ah a chuak mi tangka cu Myanmar ram chung minung hawi cung zawnruahnak he rian a ṭuantu phu sin ah US dollar nuai 7 pek a si lai i a ralai mi zarh chung ah ralzaam mi bawmhnak pek thawk a si lai, tiah an langhter chih.
Tukum 2024 Myanmar ram chung ralzaam hna ca ah bawmhnak tangka US dollar nuai 994 a herh tiin UNOCHA nih an thanh i, cu bawmhnak tangka in ralzaam nuai 5.3, an nunnak ca le an herh mi bawmhnak ding ca ah minung hawi cung zawnruahnak he bawmhnak pek chap an herhnak kong cu UNOCHA nih an thanh mi ah an langhter chih.
Tlaih A Tongmi Media Rianṭuan 50 Leng Cu A Rannak Chuah Ding In Independent Press Council Myanmar-IPCM Nih Nawlnak An Tuah.
SAC ralkap nih hramhram in an tlaih i thong an thlak mi hna Media rianṭuan minung 50 leng cu an zate in a rannak chuah ding in Independent Press Council Myanmar-IPCM nih nizan January 10 ah SAC sin ah nawlnak an tuah.
A luancia January 4, Independence Day ah SAC nih Myanmar ramchung hmunkip thongtla minung 9,600 leng cu luatnak a pek hna i, cu chung ah Media rianṭuan pathum Kaung Set Lin (MPA), Tun Than Aung le Toe Aung (Mekong Media) zong an i tel ve.
SAC ralkap nih hramhram in nawlngeihnak an laak hnu ah Media rianṭuan mi 170 an tlaih mi hna chung in minung 118 cu an thlah ṭhan cang hna nain midang 52 cu chuah duh lo in thong an thlak rih hna, tiah IPCM nih an langhter.
Media rianṭuan mi hna cu rampi nih a ngeihmi phunglam le Media zulhphung he aa tlak ning in thawnglatu an si bantukin phungning tein rian a ṭuan mi an si i a zalong mi Media rianṭuannak dohkalh in hnahnawhnak a petu vialte le hramhram in tlaih i thong thlak a hmangmi vialte cu IPCM nih fakpi in kan doh ve hna, tiah an langhter.
Tlaih a tong mi Media rianṭuantu vialte chuah le phungning tein Media rianṭuannak a him khawh nakhnga papek in kalpi an timhnak kong cu IPCM nih an langhter i Independent Press Council Myanmar-IPCM cu ramchung ramleng Myanmar Media vialte i fonh in 2023 December 22 ni ah dirh a sinak zong an thanh mi ah cun an langhter chih.Credit : The Chin Post