Kawkareik Khua, Taung-kya-in Palek Sakhaan le Ralkap Sakhaan An Lak
===============
karen ram, Kawkareik peng um Taung-kya-in palek sakhaan le ralkap sakhaan pakhat an lak khawh hnu ah dothlennak phu pawl nih khuachung kahdohnak an ṭhawnter chin lai tiah NUG kuttang Special Operation Force (S.O.F) nih thawng an thanh.
December 27 zinglei sml 5:00am thawk in KNLA, KNDO, S.O.F, Federal Wings, Kalung Column le dothlennak phu pawl nih KNU Brigade 6 hmunhma, Kawkareik peng, Taung-kya-in sianginn le palek sakhaan ah hmunhma a khuar mi ralkap pawl an kah hna i December 28 zaan sml 8:00pm hrawng ah tlamtling tein an lak khawh tiah theih a si.
Kahdohnak chung ah ralkap lei 14 an thi i hriam chiah in a sungpe mi minung 11 an um bantuk in hriam phun 28 le kuanzen tampi an lak khawh.
Kahdohnak chung ah mipi dothlennak phu lei in hriamtlai 1 nih ram le miphun caah a nunnak a pek i 10 hliam an tuar tiah theih a si.
Cun ralkap lei nih vanlawng le hriamngan an kah caah khuate pawl mipi inn 10 leng a rawk i mipi tampi hriamngan ruang ah hliam an tuar hna tiah theih a si.
Paletwa-Kyaukdaw Mawṭaw Lam Ah A Um Mi Ralkap Ṭin-ma Byuha Sakhaan AA Nih An Lak.Rakhine ram, Kyaukdaw peng, Ṭin-ma khua ah a um mi ralkap Taungshay byuha tlang sakhaan cu AA nih an lak khawh tiah theih a si.
Kyaukdaw peng ah a um mi ralkap Ṭin-ma byuha tlang sakhaan cu AA nih 2023 December thla thawk in kahdohnak tuah hram an thawk i 2024 January 1 ah sakhaan an lak khawh, ralkap lei nih January 1 zing sml 6:00am hrawng ah hriamngan an kah thluahmah, vanlawng in bom an thlak, a phir phir in aa kap kho mi missile pawl hmang in pehzulh in kahdohnak an tuah tiah Khit Thit nih a langhter.
Cu byuha tlang sakhaan cu January 1 chun sml 12:00pm hrawng ah AA nih an lak khawh hi a si i hmunhma zohfelnak zong an tuah khawh cang. Cun ralkap cheukhat zong hriam chiah in a sung an pek tiah Zalen nih a langhter ve.
Hramhram In Uknak Lak Hnu Kum 3 Chung Ah Hngakchia 500 Leng An Thah Hna. Myanmar ram ah hramhram in uknak lak a si hnu kum 3 chung ah ralkap nih sualnak ngei lo minung 4,270 leng an thah cang hna i cu chung ah 11.8/% a si mi minung 505 hi cu kum tling lo hngakchia an si hna tiah Assistance Association for Political Prisoners (AAPP) nih a thanh.
Atu cazin hi 2021 February 1 in 2023 December 31 tiang AAPP nih a khawmhsuat mi a si i khawmhsuat khawh mi leng ah a thi mi an tampi rih lai tiah a langhter.
A thi mi chung ah nu 705 an i tel i tlaih hnu ah thah a tong mi minung 1,547 tiang an phan tiah an thanh.
Sagaing ramṭhen chung ah a thi mi minung a tam bik an si i minung 2,000 deng an phan. Cu hnu ah Mandalay, Magway, Yangon, Bago le Taninthary hna nih an zullh.
Pau Dothlennak chung ah minung 25,656 an tlaih/hren cang hna i cu chung ah minung 19,858 hi atutiang thong an thlak rih hna tiah AAPP nih cun a tial.Cu tlaih/hren mi hna chung in nu 5,150 an i tel fawn i hngakchia 706 an i tel.
Cun ralkap nih mipi cung ah van lei kahdohnak, bomthlaknak telh in ralkap phu nih hremnak, tlaihremnak hna a karh i a caan a sau ngai cang mi Myanmar ramchung buainak ruang ah Myanmar ram mipi 2 million leng nih innlo an zaamtak tiah UN nih a langhter ve.Credit : The Chinland Post