NAN BIAKAM LE SADUHTHAH A SI AI RI!
========
Fale hna, Hitin in hal hna ning law: Thantlang Ralhraang khur nan luhhnawh lio ah khan-Duh lo in al khawh nan si lo maw? Ka ngamh lo ti in a zaam kho nan si ko tung? Ka dam lo ti in ziah nan rak tlun ko lo?
Mah vialte kuan le meithal thawng kha ziah nan rak kirtaak ko lo e? Ziah hme nan nunnak a him nakding lam pakhatte zong maw nan hngalh lo? Rak kir ulaw a hnu zong ah duhsah in nan doh ko lo e?
Lam maw nan tlau?
Hitin nan ruah ca ah maw a si?: Chinram le Chin miphun ca ah nunnak thaap in Ralhraang hna he phuhlam zuamcawhnak biakam a tuah cang mi nan si mu! Nan ngakchia rih rua ka ti nan rak patlingtuk e! Chinram le Chin miphun ca ah nan nunnak nan rak sian ko cu! Kan upattuk hna!
Nan luatnak ding ah kirnak lam nan hngalhtuk ko bu in Chinram le Chin miphun zaamtak le hnulei ah kaar khatte kir taak zong nan rak tim hrimhrim lo mu! Ralhraang hna khur chung i nan va luh i Chinram le Chin miphun ca ah nan min nan i chaal i nan au thawng kha ka hnathlaam in ka van theih i ka kam kaa seh i, ka kuttum kan renghpi ve hna. Sihmanh sehlaw nan hmai kan khaap hna lo.
Kan Chinram le Chin miphun nih a tuar nakcun kanmah nih tuar ko usih nan ti maw? Kan ram ca ah nan pek mi a ngantuk e! Nan liam lai ah khan nan sia a herhtuk lai tiah ka ruah nain…Nan merem in nan i din cang lai mu…Zeicatiah nan biakam le saduhthah pei a si kha…Salute. Chinpasal tha hna; Nan thawng nih Vulei kili a hnih e. Nunnak in Miphun caah tuanbia tial tu Valtha hna, Bawipa Zisuh tangchung ah hmangam lungdai te in mu.
Thantlang Khua SAC Ralkap Sakhaan Lak Kahdohnak Ah CDF Minung 5 An Nunnak A Liam. Chin ramkulh, Thantlang khuachung hrambunh SAC LIB 269 cu CNA, CDF phufonh nih an kah hna i Company (တပ်ခွဲ) 1 an lak khawh, SAC ralkap 2 a nung in an tlaih khawh hna, meithal zuun 6 an lak khawh i CDF minung 5 nih ram le miphun caah an nunnak an pek tiah CNF-Headquarters nih cathanh a chuah.
August 14 zinglei sml 5:00am hrawng thawk in CNA, CDF-Zophei, CDF-Thantlang hna bawm in Thantlang khuachung hrambunh SAC LIB 269 an kah hna hi a si i himnak an laknak Company 1 an lak khawh i SAC ralkap 2 zong a nung in an tlaih hna. CDF hriamtlai minung 5 an nunnak a liam hi a si tiah theih a si.
Kahdohnak chung in ram le miphun caah a nunnak a pe mi hna cu; Salai Cung Hmun Thu (CDF-Thantlang), Salai Ram Hei Lian (CDF-Thantlang), Salai Lal Hnin (CDF-Zophei), Salai Ṭial Cung Bik (CDF-Zophei) le Salai Tin Peng Lian (CDF-Zophei) hna an si tiah theih a si.
CNA, CDF phufonh nih an lak khawh mi sakhaan cu SAC nih vanlawng in bom voi 3 nak tlawm lo a rak thlak i Hakha hrambunh LIB 266 zong nih hriamngan kah a bawmh lengmang hna tiah theih a si.
SAC ralkap nih kahdohnak he zeihmanh aa pehtlai lo mi Loklung khua ah hriamngan a kah i mipi inn 4 a rawh bantuk in minung 1 zong hliam a tuar tiah theih a si.
Cu bantuk in SAC kahdohnak vanlawng nih Khuafo ah bom a thlak ṭhan i biakinn le mipi inn 3 a rawk tiah theih a si. SAC nih Khuafo hi a voihnihnak bom a thlak a si cang i a luancia 2023 March 30 zong ah bom voi 4 a rak thlak cang i sualnak ngei lo mipi 8 an nunnak a rak liam, minung 11 nih hliam an rak tuar leng ah mipi inn 13 a rak rawk.