Tedim Peng Taingen Khua Ah SAC Ralkap Le Tualchung Hriamtlai Ṭangṭi Phu Kar Kahdohnak A Chuak!
===========
Chinram chaklei, Tedim peng, Kalay-Falam-Hakha motor lampi cung Taingen khua ah nizan January 12 zanlei thawk in SAC ralkap le tualchung hriamtlai ṭangṭi phu kar kahdohnak a chuak i nihin January 13 zinglei tiang kaphnih kar kadohnak a dai rih lo, tiah tualchung mi nih an chim.
“Nizan January 12, zan suimilam 8:00 hrawng ah Kalaymyo in SAC ralkap nih hriamngan kah hram an thawk i nihin zinglei tiang cat lo in an kah. Nihin zinglei suimilam 8:00 hrawng ah raltuknak vanlawng nih Taingen khua ah bomb voi hnih an thlak. Cu pin ah Kalaymyo, Taungphila tlang in hriamngan dongcat lo in an kah,” tiah tualchung mi pakhat nih a chim.
Tualchung hriamtlai phu nih a luancia November 27 ni thawk in Kalay-Taingen motor lampi cu an rak phih i, thla hnih tluk a phih hnu ah SAC ralkap ca ah a biapi ngai mi Taingen khua sakhan cu tualchung hramtlai ṭangṭi phu nih nizan January 12 zan ah an kah. SAC ralkap pawl caan saupi chung an rak um cangnak Taingen khua tualchung mi hna zong an dihlak in 2023 December thla chung ah khua chuahtak in a himnak hmun ah an zaam dih, tiah theih a si.
Paletwa Regional Military Operation Ah Ṭuanvo Pek Mi Colonel Zin Myo Swe Cu AA Nih An Tlaih. Chinram, Paletwa peng in zaam aa tim mi Paletwa Regional Military Operation ah ṭuanvo pekmi Colonel Zin Myo Swe cu nihin January 12 zinglei ah AA nih an tlaihnak kong AA ral hmaikal sin in theih a si.
“Colonel Zin Myo Swe cu Peletwa in zaam a tim i kan tlaih. Southeast Military Headquaters, no.19 Regional Military Operation ah ṭuanvo pekmi a si,” tiah AA ral hmaikal nih an chim i an tlaih hnu belte ah dikthliar in thanhnak an tuah rih lo.
Colonel Zin Myo Swe cu 1993 kum ah ralkap ah a rak lut mi a si i ralkap sianginn ṭha tein a dih mi a si. Yangon ramṭhen Ahlone peng chuak a si i History major in a graduate hnu ah no.18 ke ralkap ah riankhinh mi a si, tiah theih a si.
Paletwa Khuapi Kahdoh Ruangah Tualchung Mi 10,000 Leng Ralhrial In An Zaam. Chinram, Paletwa khuapi ah SAC ralkap le AA kar kahdohnak a chuah ruangah Paletwa khuapi pawng um tualchung mi 10,000 leng ralhrial in an zaam, tiah Paletwa Council in ṭuanvo ngeitu Salai Myo Htike nih RFA ah a chim.
Paletwa khuapi pawng ah kahdohnak a chuak i SAC ralkap nih vanlawng in bomb an thlak. Phone line zong an phih caah Paletwa khuapi chung dirhmun zong fiang in hngalh a si lo, tiah a chim chap.
SAC ralkap le AA kar kahdohnak a chuah ruangah tualchung mi 10,000 leng ralhrial in an zaam i rianrang in bawmhchanh an herh. SAC nih nawlngeihnak an laak thawk in 2023 December thla dongh tiang ah Chinram in ramchung le ramleng ah a zaam mi ralhrial sing khat leng an phan cang, tiah theih a si.
Chinram Chung Um SAC Ralkap Nih Pale Peng PDF Sinah Hriamnam An Chiah. Sagaing ramṭhen, Pale peng ah Chinram um SAC ralkap pathum nih hriamnam an chiah i lawmman tangka an pek hnanak kong Pale peng ukhruainak phu nih an thanh.
Janaury 11 ah Chinram um SAC ralkap pathum cu MA 1 zun 1, MA 3 zun 1, kutcheh bomb lung 6, kuanbawm 6, 5.56 meithal kuam 450 he Pale peng mizapi ukhruainak phu sinah an lut, tiah theih a si.
Hriamnam le zen-kuan he mizapi sinah aa fonhmi SAC ralkap pathum cu Pale peng mizapi ukhruainak phu nih pakhat ah kyats sing 70 le Pale peng mizapi bawmchantu phu in ṭuanvo ngeitu nih sing 1 an pek hna, tiah theih a si.