Hpakant Peng Um Tarmahkan Palik Sakhan Cu KIA Ṭangṭi Phu Nih An Laak. Kachin ramkulh, Hpakant peng, Tarmahkan khua pawng ah SAC ralhrang le an kuttang pawl nih umhmun an khuarnak hmunhma hna cu Kachin ralkap KIA ṭangṭi phu nih nizan February 26 ah luhhnawh in an kahdoh hna i palik sakhan cu an laak khawh, tiah kahdohnak thawng latu hrampi nih a chim.
“2024, February 26, zanlei suimilam 4:30 tluk ah KIA le KPDF ṭangṭi phu nih luhhnawh in an kahdoh i zanlei suimilam 6:00 tluk ah an laak khawh. SAC ralhrang sakhan zong pehzulh in an luhhnawh” tiah Kachin kahdohnak thawng latu hrampi nih People’s Spring ah a chim.
Atu tiang kahdohnak a chuah liopi a si i Tarmahkan palik sakhan cu an laak khawh cang nain SAC ralhrang sakhan cu an la kho rih lo, tiah a chim chap. Lungmili Post
Thawngpang dang: Kumtling Mizapi SAC Ah Luh Ding In Nawl An Chuah Hnu Ah Mino 100 Leng Cu PDF-Zoland Sin Ah An Lut. SAC ralhrang nih kumtling mizapi SAC ah luh ding timi nawl an chuah hnu in zarh hnih tluk a rauh hnu ah Chinram, Tedim peng hrambunh ZFU/PDF Zoland sinah SAC ralhrang cu hriamnam he doh dingin mino 100 leng an lut ṭhan, tiah theih a si.
“2024, February 10 ah SAC ralhrang nih kumtling mizapi cu SAC ah luh dih dingin nawl an chuah hnu ah dothlennak hriamtlai phu hna cu mino cheukhat nih an pehtlaih hna. ZFU/PDF Zoland sinah mino 100 leng an rak lut” tiah PDF-Zoland in chimphuannak nawlngei Ko Htaw Ni nih Khonumthung ah a chim.Crd: Lungmili Post