Tamu le Khampat Ah A Um Mi Ralkap LIB-228 Sakhaan An Lak kong Update!
==========
Sagaing ramṭhen, Tamu pengkomh, Tamu peng le Khampat khua ah a um mi ralkap LIB 228 sakhaan cu an lak i hriam cheukhat zong an lak khawh tiah NUG Ministry of Defense nih a thanh. November 3 zinglei sml 7:00am ah Khampat khua ah a um mi Captain Win Naing Soe nih hruai mi LIB 228 ah palek, ralkap le pyusawthi 48 nih hmunhma an khuarnak Khampat sakhaan, palek sakhaan le sizung hna cu RCDF, CNDF, WZ-1 hna nih an kah i sakhaan an lak beh tiah theih a si.
Kahdohnak chung ah ralkap lei 1 a thi i 20 hrawng hliam an tuar, ralkap lei nih vanlei kahdohnak voi 10 leng a tuah caah dothlennak phu lei 2 an nunnak a liam. Ralkap lei hriamhme phun 12, kuan 9800 leng, bom 30 leng le kahdohnak thilri pawl an lak khawh tiah theih a si.
November 3 zong ah Tamu peng, Wi-toh khuate ah ah a um mi Captain Tin Htoo Aung hruai mi LIB 228 cu palek le pyusawthi 30 hrawng nih hmunhma an khuarnak sakhaan cu KNAB, ABSDF hna nih an kah i an lak beh tiah theih a si. Kahdohnak chung ah ralkap lei 2 an thi i 3 an i hliam i dothlennak phu lei 3 (KNAB lei 2) le (ABSDF lei 1) an nunnak a liam. Ralkap lei kuttuah meithal zuun 14, kuan 3,400 leng, bom 1, bomrap 2 hna an lak tiah theih a si.
TNLA Nih Ralkap Sakhaan An Lak Chap, Vanlawng Nih A Rak Thlak Mi Sii Bawm Pawl An Char. Shan ram chaklei ah a um mi ralkap sakhaan pakhat an lak bantuk in vanlawng nih a thlak mi sii bawm 13 an lak khawh tiah TNLA nih a thanh.
TNLA Brigade 1 hmunhma, Namhkhan peng, Naung-in khuate ah a um mi ralkap sakhaan cu zinglei sml 11:00am ah an lak tiah theih a si. Cun Lashio peng, Maikyat sakhaan caah vanlawng nih a rak thlak mi sii bawm le hriam pawl aa tel mi bawm 13 cu an lak khawh tiah theih a si. Muse peng, Cin-san-kyaw lamṭhen ah tuni zing sml 11:00am ah ralkap le TNLA karlak ah kahdohnak a fak fawn.
Moebye-Pekon Ah A Um Mi Byuha Sakhaan le Adang Sakhaan 8 An Lak Tiah Dothlennak Phu Pawl Nih An Thanh. Shan le Karenni ramri, Mobye-Pekon ah a um mi ralkap byuha sakhaan le adang sakhaan 8 an lak cang tiah khuachung dothlennak phu URF nih an thanh.
Moebye, Pekon hmunhma ah a um mi ralkap sakhaan pawl, riahcaw chiahnak sakhaan pawl an kah hna i November 11 zinglei thawk in ralkap Wa-ri-su-pha-lai sakhaan, Dungduṭhan, Puaikone 3, Puaikone 1, Nyaungwai, Pikinkawkhu, Saungkan, Siika 2 ah a um mi ralkap sakhaan 8 an lak khawh tiah theih a si. Ralkap nih hriamngan in voi 500 leng a kah i kahdohnak vanlawng 2 in a rak kah hna caah Moebye, Pekon khuami 4 an thi i 6 an i hliam tiah theih a si.
Jet Fighter 2 Nih Bom A Thlak Ruang Ah Matupi Peng Mipi 13 An Thi. Chin ramkulh, Matupi peng ah a um mi Wailu khuate cu ralkap lei nih Jet Fighter 2 in bom a thlak ruang ah AA ralkap 2 le sualnak ngei lo mipi 13 hrawng an nunnak liam tiah The Matupi Times nih a langhter.
November 15 zinglei sml 7:00am hrawng ah Jet Fighter 2 in bom a thlak. A pakhatnak vanlawng nih sianginn le biakinn a kah, Middle School 2 le Presbyterian biakinn a rawk tiah theih a si.
A pahnihnak vanlawng nih mipi inn pawl a kah hramhram caah mipi inn 6 a rawk i CDM saya Ha Laung chungkhar an 5 ning in an thi.
Arakan Army (AA) nih Paletwa peng ah hmunhma an khuar caah Paletwa ramri, Matupi peng Wailu khua ah AA ralkap pawl an cawlcangh caah hramhram in a kah hi a si tiah theih a si. Phone line a ṭhat lo ruang ah khuami a nunnak liam mi dirhmun le a rawk mi dirhmun a fiang in theih a si rih lo tiah The Matupi Times nih cun a langhter.