Taingen Lei a Kai mi Ralhrang Ralkap Pawl Kalay Lei ah an Kir Than!
=========
Taingen lei ah an kai lai tiah ruah mi SAC ralkap pawl cu Kalay lei ah an kir than, tiah Kalay khuami hna nih an chim. CNA hruai mi Chin miphun ralkap phu komh nih January 16 ah Taingen SAC ralkap camp an laak hnu ah Kalay in SAC ralkap 60 hrawng Taingei lei ah an rak kai, tiah CDF CDM-Siyin chimphuannak nawlngei nih January 17 ah The Hakha Post ah a rak chim.
“SAC ralkap 60 hrawng cu Kalay, 9-miles in Taingen lei ah an rak kai ti mi kan theih. Kan theih tiang ah Coffee dum pawng an phan. Asinain, an rak kai taktak lai le kai taktak lai lo a fiang lo. Kan ngiat ko hna.
Kanmah lei ralkap pawl Kalay lei ah an rak ṭum lai ti mi an phan caah pawngkam runvennak an tuah mi zong an si kho,” tiah a chim. Taingen lei ah a rak kai mi SAC ralkap pawl cu Tedim peng, Hiangzing khua thlang tiang an phan nain cuka hmun cun Kalay lei ah an kir than tiah a hmutu khua mi hna nih an chim.
Lailenpi Khuapi Pawng Ah MDF Nih CDF Mara Ralkap Pahnih An Tlaih Ṭhan Hna. Chinram, Lailenpi khuapi pawng ah MDF nih CDF Mara ralkap pahnih an tlaih ṭhan hna i, an dihlak 6 an tlaih cang hna, tiah CDF Mara sinin theih a si. January 19 zing suimilam 10:00 hrawngah Lailenpi khuapi pawng meng 9 ah CDF Mara Battalion 3 in Company Commander Sang Hnin le ralkap Ra Lai cu MDF nih an tlaih hna, tiah CDF Mara chimphuannak nawlngeitu nih a chim.
Company Commander Sang Hnin an tlaih lio ah cun meithal aa ken i ralkap Ra Lai an tlaih lio tu ahcun meithal aa ken lo, tiah theih a si. January 5 ah CDF Mara ralkap pahnih cu MDF nih an rak tlaih hna i CDF Mara in Brigadier Htet San le Battalion Commander Khuma nih MDF le AA ṭuanvo ngeitu cu thlah dingin nawlnak an rak tuah.
AA le MDF ṭuanvo ngeitu hna nih CDF Mara ralkap pahnih cu thlah dingin an ti ko nain January 7 ah CDF Mara Brigadier pa le Battalion Commander pa zong Shweleikwa khua ah an tlaih ṭhan hna, tiah CDF Mara nih January 17 ah an rak langhter.
MDF nih Mara hmunram chung ah theihternak tuah hmasa lo, hriamtlai phu dang duh paoh in luh chuahnak le umhmun khuar lo dingin January 18 ah an rak langhter. “MDF ralkap pawl cu Lailenpi khuapi pawng meng 9 ah umhmun khuar in CDF Mara ralkap cu an kan tlaih pah lengmang. Hi bantuk an tuahser mi hi Lailenpi uk an timh caah a si kho,” tiin CDF Mara chimphuannak nawlngeitu nih a chim.
CNF/CNA, CDF- Mara, CDF- Matupi, CDF- Lautu, CDF- Zophei le CDF- Thantlang nih 2023 November 19 ah Lailenpi khuami hna cu ralhrial chung dingin an rak chimh hna i Lailenpi khua um SAC ralkap pawl cu ni 5 an rak kah hna hnu November 24 ah an rak laak.