Aizawl Khuapi Ah Rithaisii Tamlak He Myanmar Mi Pakhat Tlaih A Si. February 17(Zarhte zan) ah khan Mizoram Excise and Narcotics Department le YMA, Bawngkawn ṭangṭi hna nih Crystal Meth kg 1 leng a rit mi le Methamphetamine tlang 166,000 cu Aizawl khuapi, Bawngkawn Brigade sang ah Myanmar mi pakhat sin in an tlaih.
Rithaisii ngeitu ah puh mi le tlaih a tong mi hi Kalaymyo peng, Tahan Pinlung khuasa mi Hrangtinkhara, kum 49 a si, tiah Mizoram media nih an langhter. YMA le Excise and Narcotics Department nih an tlaih mi Methamphetamine hi a dihlak kg 17 le gram 135 a si.
Rithaisii hi Myanmar ram in luhpi a si i, India ram state dangdang ah kalpi ding in timhtuah a si tiah tlaih a tong mi nih cun a chim. Rithaisii khamnak upadi bantuk in taza cuai a si i, biaceihzung ah hruai colh a si, tiah AIR News Aizawl nih a ṭial. The Chin Post
Thawngpang dang: Karenni ramkulh, Shadaw peng, Thanlwin tiva nichuahlei hmun um SAC ralhmai sakhan 2 cu ralhrang pawl nih an chuahtaak, tiah Karenni Nationalities Defence Force (KNDF) nih nizan February 17 ah an thanh.
Cu sakhan 2 cu Hueon SAC ralhrang sakhan le Kyarhpasatgyi SAC ralhrang sakhan hna an si i 2024, February 13 ah ralhrang pawl nih an chuahtaak, tiah an langhter.
Karenni-Thailand ramri pehtlaihnak caah a biapi ngai mi SAC ralhmai sakhan hna an si i February 14 ah KNDF Battalion 21 le KNPLF ṭangṭi phu nih hmunhma zohfelnak an tuah lio ah facang cheukhat le hriamthil cheukhat zong an laak, tiah Karenni Nationalities Defence Force (KNDF) nih thawng an thanh mi ah an langhter chih. Lungmili Post