Sweden ram hruaitu pawl cu Putin ṭih ah zan an ihnglih khawh lonak kum 2 leng a si cang. Zeitik caan paoh ah Russia nih a rak kan phomh khawh mi a si an ti caah NATO chungtel kan luh longah Putin kut in kan him lai ti a si.
Cu ruangah NATO chungtel luhnak cu 18 May, 2022 ah khan an rak sawk. NATO chungtel ram 31 chungah ram 29 nih Yes an ti i, ram hnih (Turkey le Hungary) nih an rak duh lo. Nain Turkey le Hungary hruaitu pawl he zeimawzat an i chawnh biak hnu in Turkey parliament nih 24 January, 2024 ah mee an thlak in Sweden cu NATO chungtel ah cohlan dingin biachahnak an tuah.
Nain Hungary nih Yes ti ve a hauh ve caah Sweden hruaitu Ulf Kristersson le Hungary hruaitu Viktor Orbán cu 23 February, 2024 ah tonnak an ngei i, Viktor nih raltuknak vanlawng 4 na ka cawkter lai i, NATO chungtel luh dingin kan cohlan ve lai a ti i cu ti cun an pahnih lungtlinnak an ngei.
26 February 2024 ah Hungary parliament nih mee an thlak ve i, Sweden cu NATO chungtel ah cohlan dingin biachahnak an tuah ve. Tucu NATO chungtel ram dihlak (ram 31) nih an lung a tlin dih cang caah a ruahhlan ah NATO meeting an ngei lai i, Sweden cu chungtel ah cohlan a si ve cang lai.
Sweden mipi cheukhat bel cu an i lawm lem lo. Kum 200 leng raltuknak ah khatlei khatlei ṭang lo (neutral) in kan rak um tawnmi cu NATO chungtel kan luh ruangah kan duh zong duh lo zongah ral tuk kan hau ve cang lai. Raltuknak ah i tel ve cu kan duh lo tiah fak piin an soisel ve.
NATO chungtel si a duhmi nih, Russia kut in kan himnak ding ahcun NATO chungtel kan luh ve hrim a hau ti a si ve. Kei zong lut duhmi lei ah ka ṭang ve. Salai Biak Tum Lia